“Marso 14–20. Genesis 42–50: ‘Pinagagem ti Dios a Naimbag,’” Umaykayo, Sumurot Kaniak—Para iti Sunday School: Daan a Tulag 2022 (2021)
“Marso 14–20. Genesis 42–50,” Umaykayo, Sumurot Kaniak—Para iti Sunday School: 2022
Panangiladawan ni Jose ti Egipto, ni Robert T. Barret
Marso 14–20
Genesis 42–50
“Pinagagem ti Dios a Naimbag”
Kinuna ni Elder David A. Bednar, “Ti naespirituan a pannakaawat a nakaparaburantayo nga awaten … gagangay a saan a maited iti sabali a tao” (“Seek Learning by Faith,” Ensign, Sept. 2007, 67). Kasano a matulongamto dagiti miembro ti klase a makagun-od iti naespirituan a pannakaawat para iti bagbagida?
Isuratmo dagiti Impresionmo
Yawis ti Panagbibinninglay
Tapno maikkan dagiti miembro ti klase iti gundaway a mangibinglay iti maysa a banag a naammuanda a napnuan kaipapanan iti bukod ken sangapamiliaan a panagadalda iti nasantuan a kasuratan, makapagdamagka kadagiti saludsod kas kadagitoy iti rugi ti klase: Ania a bersikulo kadagitoy a kapitulo a nakaawis iti imatangmo? Ania a bersikulo a naammuam iti bagim iti panagbasa iti ad-adu ngem iti maminsan? Ania a bersikulo ti imbinglaymo iti maysa a tao? Ania a bersikulo ti nangiturong iti nalawag a panaglilinnawag iti pamiliam wenno gagayyemmo?
Isuro ti Doktrina
Mangisangbay ti talna iti panangpakawan.
-
Sakbay nga irugim ti panangilawlawag maipapan no ania ti isuro ti padas ni Jose maipapan iti panangpakawan, mabalin a makatulong a paisarita biit iti maysa a tao iti estoria iti Genesis 37; 39–45. Apay a mabalin a narigat a pakawanen ni Jose dagiti kakabsatna? Ania a padas wenno galad ti mabalin a nangted iti pigsa ken ni Jose tapno mamakawan? (kitaen, kas pagarigan, iti, Genesis 45:1–15 wenno 50:15–21). Kasano a makatulong kadatayo ti pagwadan ni Jose nga agbalin nga ad-adda a managpakawan?
Ti video “Forgiveness: My Burden Was Made Light” (ChurchofJesusChrist.org) mangted iti sabali pay a makaparegta a pagwadan ti panagpakawan. Kasano a tulongannatayo ti Mangisalakan a mamakawan kadagiti dadduma?
-
Ania dagiti bendision a simmangbay manipud iti panangpakawan ni Jose kadagiti kakabsatna? Mabalin a makaay-ayo nga idasig dagiti panaglalangen iti pamilia ni Jacob iti rugi ti estoria (kitaen, kas pagarigan, iti Genesis 37:3–11) iti kasasaadda iti udina (kitaen iti Genesis 45:9–15; 50:15–21). Ania ti papel nga akmen ti panangpakawan iti panagbalbaliw iti pamilia ni Jose? Kasano a naiduma ti nagbalbaliwan dagiti banag no saan koma a nagtallugod ni Jose a mamakawan? Mabalinmo nga awisen dagiti miembro ti klase a mangisingasing kadagiti wagas a pakatulongan daytoy nga estoria kadagiti pamilia ita a mangparmek iti panagsusupanget ken panagilem.
Genesis 45:5–11; Patarus ni Joseph Smith, Genesis 50:24–38 (iti Pangiwanwan iti Nasantuan a Kasuratan)
Dagiti aramid da Jose, Moises, ken ni Joseph Smith ti mangipaneknek iti mision ni Jesucristo.
-
Babaen iti nayon a lawag ti naisubli nga ebanghelio, ammotayo a ni Jose, a nangispal iti pamiliana manipud iti bisin, ket nangipadto pay kadagiti naindaklan a bendision a sumangbay iti maysa nga aldaw babaen kada Moises ken Joseph Smith. Ken itudo amin dagitoy a propeta iti Naindaklan a Mangisalakantayo, ni Jesucristo. Tapno matulongan dagiti miembro ti klase a makitada ti Mangisalakan kadagiti panagministro dagitoy tallo a propeta, mabalinmo ti agdrowing iti maysa a tsart iti pisarra a maipada iti maysa a masarakan iti “Dagiti Nainayon a Resources.” Makapagtitinnulong dagiti miembro ti klase a mangpunno iti daytoy. Kalpasanna mabalinda ti mangnayon kadagiti kolum a mangiladladawan iti aramid ni Jose iti Egipto, ni Moises, ken ni Joseph Smith, nga us-usaren no ania ti masursuroda manipud iti Genesis 45:5–11 ken Patarus ni Joseph Smith, Genesis 50:24–38 (iti Pangiwanwan iti Nasantuan a Kasuratan). Kasano nga ipaneknek ti panagministro wenno panagserbi a naespirituan dagitoy a propeta ken mangitudo iti mision ti Mangisalakan? (Para iti sumagmamano a pagarigan dagiti pagpadaan ti nagbaetan ti biag ni Jose ti Egipto ken ti biag ti Mangisalakan, kitaen iti Genesis 37:3 ken Mateo 3:17; Genesis 37:26–28 ken Mateo 26:14–16; Genesis 45:5–7 ken Lucas 4:18; ken Genesis 47:12 ken Juan 6:35; kitaen met iti Moises 6:63.)
LadawanNi Jose ti Egipto iti panangkitkitana iti parmata ni Joseph Smith nga umaw-awat kadagiti pinanid a balitokLadawan ni Jose ti Egipto, ni Paul Mann
Matulongannatayo ti Dios a mangsapul iti kaipapanan dagiti pannuboktayo.
-
Nupay mabalin a saan a nalawag dagiti napasaranna a nakaro a pannubok, idi agangay kinabaelan ni Jose ti nagtaliaw iti rigatna iti Egipto ken nakitana a “pinagagem ti Dios a naimbag” (Genesis 50:20). No nasarungkarantayo koma ni Jose iti kaaddana iti abut wenno iti pagbaludan, kasano ti mabalin a panangliwliwatayo kenkuana? Kasano a makatulong kadatayo ti nayebkas a kapanunotan iti Genesis 50:19–21 iti panawen ti pannubok? Nalabit nga agtallugod dagiti miembro ti klase a mangisarita maipapan kadagiti wagas a nangparaburan kadakuada ti Dios, uray no iti baet dagiti narigat a padasda. Para iti maysa a pagarigan, kitaen ti video “Unto All the World: The Sam Family” (ChurchofJesusChrist.org). Ania ti mainayon ti Doktrina ken Katulagan 122 iti pannakaawattayo iti daytoy a pagbatayan?
Dagiti Nainayon a Resources
Paneknekan ti biag dagiti propeta maipapan ken ni Jesucristo ken ti misionna.
Ti biag ni Jose iti Egipto, ni Moises, ken ni Joseph Smith ti makaipalagip kadatayo maipapan ken ni Jesucristo. Mabalin dagiti miembro ti klase ti mangpunno iti daytoy a tsart ket kalpasanna mangnayon kadagiti kolum para ken ni Jose ti Egipto (kitaen iti Genesis 45:5–11), Moises (kitaen iti Patarus ni Joseph Smith, Genesis 50:24, 29, 34–36 [iti Pangiwanwan iti Nasantuan a Kasuratan]), ken Joseph Smith (kitaen iti Patarus ni Joseph Smith, Genesis 50:26–28, 30–33 [iti Pangiwanwan iti Nasantuan a Kasuratan]).
Jesucristo | |
---|---|
Asino ti naispal? | |
Ania ti nakaispalanda? | |
Ania ti naaramid tapno maispal ida? |
Panangpadur-as iti Panangisurotayo
Agdamag kadagiti saludsod a mangyawis iti panagpaneknek. Ti panagdamag kadagiti saludsod a mangallukoy kadagiti agad-adal a mangibinglay kadagiti pammaneknekda ket mabalin nga epektibo a wagas a mangawis iti Espiritu. Kas pagarigan, no mangisursuroka iti Genesis 45:1–15, makapagdamagka iti saludsod kas iti “Ania dagiti bendision a napadasamon kas bunga ti panangpakawan iti maysa a tao?” (kitaen iti Panangisuro iti Wagas ti Mangisalakan, 32).