“Marso 7–13. Genesis 37–41: ‘Ni Jehova Siaadda Idi ken Jose,’” Umaykayo, Sumurot Kaniak—Para iti Sunday School: Daan a Tulag 2022 (2021)
“Marso 7–13. Genesis 37–41,” Umaykayo, Sumurot Kaniak—Para iti Sunday School: 2022
Ladawan ni Jose ti Egipto iti pagbaludan, ni Jeff Ward
Marso 7–13
Genesis 37–41
“Ni Jehova Siaadda Idi ken Jose”
Saan a nairanta nga isurom ti amin nga aktibidad iti daytoy a balabala. Bayat ti panagsaganam a mangisuro, ikararagmo a tulongannakanto ti Espiritu a mangammo no ania kadagiti aktibidad (no ania man) iti daytoy a balabala ti kasayaatan a mangipaayto kadagiti kasapulan ti klasem.
Isuratmo dagiti Impresionmo
Yawis ti Panagbibinninglay
Tapno maallukoy dagiti miembro ti klase a mangibinglay no ania ti nasursuroda iti bukod ken sangapamiliaan a panagadalda, mabalinmo nga awisen ida a mangsapul iti ragup ti balikas iti Genesis 37–41 a mangipeksa iti maysa nga adalen wenno pagbatayan a mariknada a napateg.
Isuro ti Doktrina
Genesis 37:1–28; 39; 40:1–19; 41:9–45
“Ni Jehova siaadda idi ken Jose” iti rigatna.
-
Kas ken ni Jose, mabalin a mapadpadasan dagiti miembro ti klasem dagiti narigat a pannubok. Tapno matulongan ti klase a mangsapul iti inspirasion iti pagwadan ni Jose, mabalinmo ida a bingayen iti tallo a grupo ket idawat iti tunggal grupo a mangrebyu iti maysa kadagiti sumaganad a binatog iti nasantuan a kasuratan: Genesis 39; 40:1–19; wenno 41:9–45. Kalpasanna mabalin nga ibinglay ti tunggal grupo dagiti wagas a nangkaduaan ti Apo ken ni Jose kadagiti pannubokna. No maitutop, mabalin nga ibinglay dagiti miembro ti klase dagiti padas idi kinadua ti Apo ida kabayatan iti narigat a panawen. Kasano a masursurotayo a nasaysayaat a kumita iti sidong ti Apo iti biagtayo?
-
Makatulong daytoy nga adalen a banag a mangipakita no kasano a marimbawantayo ti rigat: mangikabil iti nalag-an a banag, kas iti maysa a bassit a plastik a bola, iti uneg ti maysa a container a nakargaan ti agarup guduana iti namaga a bagas wenno bukel ti sitaw. Awisem ti maysa a tao a mangkalog iti container a siiinnayad agingga nga agpangato ti bola. Kasano a maipada ni Jose iti bola? Mabalin dagiti miembro ti klase a mangibinglay kadagiti pagarigan ti Apo a mangtultulong ken ni Jose a mangrimbaw iti rigat manipud iti Genesis 37:5–11; 39; 40:1–19; 41:9–45. Mabalinda pay nga ibinglay dagiti panawen idi tinulongan ida ti Apo iti isu met la a wagas.
-
Mabalinmo nga idawat kadagiti miembro ti klase a mangkanta wenno mangbasa kadagiti balikas ti himno maipapan iti panagaramid kadagiti nalinteg a pili, kas iti “Do What Is Right” (Hymns, num. 237). Kalpasanna mabalin a saraken dagiti miembro ti klase dagiti nalawag a pannakaammo ken pannakaawat wenno ragup ti balikas iti Genesis 37:1–28; 39; 40:1–19; 41:9–45 a mangipakita kadagiti mensahe ti himno. Kasano a nabendisionan ni Jose, iti baet ti rigatna, idi inaramidna no ania ti umno? Kaano a nabendisionannatayo ti Apo kadagiti panawen ti rigat iti panangaramid iti umno a banag?
No napudnotayo, tarabayennatayonto ti Apo ken paregtaennatayo.
-
Nupay saan nga umawat ti tunggal maysa iti bukod a paltiing babaen dagiti tagainep, adda dagiti banag a masursurotayo maipapan iti paltiing manipud kadagiti padas da Jose, dagiti adipen ni Faraon, ken ni Faraon. Mabalinmo nga awisen dagiti miembro ti klase a mangrebyu iti Genesis 37:5–11; 40:5–8; 41:14–25, 37–38 ket ibinglay ti ania man a banag a masursuroda maipapan iti paltiing. Mabalinmo pay nga awisen ida a mangibinglay no ania ti nangtulong kadakuada nga agsagana nga umawat, makaawat, ken agtignay iti paltiing.
LadawanNi Jose iti pagbaludan nga agyul-ulog kadagiti tagtagainepNi Jose a Mangyul-ulog kadagiti Tagtagainep ti Agparparti ken Agtintinapay, ni François Gérard
Babaen iti tulong ti Apo, maadaywantayo ti sulisog.
-
Nalabit a makaibinglay dagiti miembro ti klase no ania ti nasursuroda maipapan iti panangliklik iti sulisog bayat ti panangbasada iti Genesis 39 iti daytoy a lawas. Ania ti inaramid ni Jose a mangparmek iti sulisog? (kitaen kadagiti bersikulo 7–12). Mangted dagiti video “Leave the Party” ken “Dare to Stand Alone” (ChurchofJesusChrist.org) kadagiti pagarigan dagiti tao a nangliklik iti sulisog. Ibilang ti panangidawat kadagiti miembro ti klase a mangilista kadagiti banag a maaramidtayo a maaddaan iti bileg ti Dios no maipasangotayo kadagiti sulisog. (Mabalin a sapulen dagiti miembro ti klase dagiti kapanunotan iti Mateo 4:1–11 wenno kadagiti nasantuan a kasuratan a nailista iti babaen ti “Sulisogen, Sulisog” iti Pangiwanwan iti Nasantuan a Kasuratan [scriptures.ChurchofJesusChrist.org].)
-
Kasano a mausarmo ti pagwadan ni Jose a mangtulong kadagiti miembro ti klase a mangliklik iti basol a seksual? Kas nayon iti panagrebyu iti Genesis 39:1–20, mabalin a buyaen dagiti miembro ti klase ti video “Chastity: What Are the Limits?” (ChurchofJesusChrist.org) wenno irebyu ti “Kinadalus iti Dayaw” (iti Para iti Pigsa dagiti Agtutubo [2011], 35–37). Mabalinda nga ibinglay no ania ti masursuroda maipapan iti panangliklik kadagiti kapanunotan, balikas, ken tignay a mangiturong iti seksual a basol. Ti panangrebyu iti “Panagbabawi” (iti Para iti Pigsa dagiti Agtutubo, 28–29) makatulong kadagiti miembro ti klase a makaawat iti gundaway nga idiaya ni Jesucristo kadatayo tapno agbabawi.
Nasken nga agsaganatayo para kadagiti mabalin a pagrigatan.
-
Mabalinmo nga idawat iti maysa a miembro ti klase a mangiladawan kadagiti tagtagainep ni Faraon (kitaen iti Genesis 41:15–24) ken iti sabali pay a mangibinglay kadagiti kayulogan ni Jose (kitaen kadagiti bersikulo 25–32). Ania ti insingasing ni Jose nga aramiden? (kitaen kadagiti bersikulo 33–36, 47–49). Ania dagiti adalen nga adda kadagitoy a pakaammuan para iti aldawtayo? (kitaen iti balakad ni Presidente Gordon B. Hinckley iti “Dagiti Nainayon a Resources”).
Dagiti Nainayon a Resources
Panagsagana para kadagiti panawen ti riribuk.
Kinuna ni Presidente Gordon B. Hinckley: “Allukoyenkayo a gumastos iti kalalainganna; disiplinaenyo ti bagbagiyo kadagiti panaggatangyo tapno maliklikan ti panagutang agingga a mabalin. Bayadanyo a dagus ti utangyo agingga a kabaelanyo. … Maaddaan iti urnong a kuarta, uray no bassit laeng” (“To the Boys and to the Men,” Ensign, Nob. 1998, 54).
Panangpadur-as iti Panangisurotayo
Maysa nga aramid ti ayat ti panagdengngeg. “Dawatem iti Nailangitan nga Ama a tulongannaka tapno maawatam no ania ti isao dagiti miembro ti klasem. Kabayatan ti panangikasom a nasayaat kadagiti nayebkas ken saan a nayebkas a mensaheda, ad-adda a maawatamto dagiti kasapulanda” (Panangisuro iti Wagas ti Mangisalakan,34).