Ni Moises ken ti Maur-uram a Bassit a Kayo, ni Harry Anderson

Marso 21–27

Exodo 1–6

“Linagipkon ti Tulagko”

Bayat ti panangbasam iti Exodo 1–6, panunotem dagiti tao a sursuruam. Ania dagiti kinapudno kadagitoy a kapitulo ti kasla kangrunaan a napnuan kaipapanan kadakuada? Kasano a matulongamto ida a mangtakuat kadagitoy a kinapudno?

Isuratmo dagiti Impresionmo

Yawis ti Panagbibinninglay

Maysa a kapanunotan a pangallukoy kadagiti miembro ti klase a mangibinglay no ania ti masursuroda ket mangisurat iti maysa a saludsod kas iti daytoy iti pisarra: Bayat ti panangbasam iti Exodo 1–6, ania ti nadlawmo a saanmo a nadlaw idi? Awisem ti sumagmamano a miembro ti klase a mangibinglay kadagiti sungbatda.

Isuro ti Doktrina

Exodo 1–2

Ni Jesucristo ti Mangisalakantayo.

• Nupay saan a nadakamat iti nagan ti Mangisalakan iti Exodo 1–2, makatulong daytoy a pakaammuan kadagiti miembro ti klase a mangbangon iti pammati iti misionna tapno ispalennatayo manipud iti pannakaadipen. Mabalin nga agsapul dagiti miembro ti klase iti balikas ken ragup ti balikas iti Exodo 1–2 a mangiladawan kadagiti kinarigat a napasaran dagiti Israelita. Kasano a maipada dagitoy a panangiladawan iti naespirituan a pannakaadipen wenno dadduma pay a kinarigat a pakaipasanguantayo? Kasano ti panagkalikagum dagiti annak ti Israel iti pannakaisalakan, ken kasano a simmungbat ti Dios kadakuada? (kitaen met iti Exodo 2:23–25; 3:7–8). Kasano a makagun-odtayo iti bileg ti Dios no kasapulantayo ti pannakaisalakan? Kasano a sungbatan ti Dios dagiti ararawtayo iti tulong? Mabalin a sapulen dagiti miembro ti klase dagiti nayon a nalawag a pannakaammo ken pannakaawat iti mensahe ni Presidente Russell M. Nelson “Drawing the Power of Jesus Christ into Our Lives” (Liahona, Mayo 2017, 39–42).

  

  Ni Moises kadagiti Mula a Runo, © Providence Collection/licensed from goodsalt.com

Exodo 3–4

No aramidentayo ti trabaho ti Apo, maaddaantayo iti bileg ti Apo.

• Ti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia ket mangisingasing iti panangsukisok iti Exodo 3–4 tapno ammuen no kasano a sinungbatan ti Apo dagiti pakaseknan ni Moises maipapan iti aramid ti pannakaisalakan dagiti Israelita manipud iti pannakaadipen. No inaramid dagiti miembro ti klase daytoy nga aktibidad iti pagtaengan, awisem ida a mangibinglay no ania ti nasursuroda. Wenno mabalinmo nga aramiden daytoy nga aktibidad kas maysa a klase. Kangrunaanna, mabalin a sukisoken dagiti miembro ti klase ti Exodo 3:11–18; 4:1–17, a mangsapsapul kadagiti pakaseknan ni Moises ken dagiti sungbat ti Apo iti tunggal maysa. Kasano a matulongannatayo dagiti sungbat ti Apo kadagiti panagduaduatayo maipapan kadagiti kabaelantayo a mangaramid iti trabahona?

Exodo 3:5

Nasken nga ipakitatayo ti panagraem kadagiti nasantuan a banag ken lugar.

• Kasano a mausarmo ti pagwadan ni Moises a mangparegta iti panaglilinnawag maipapan no kasano ti nasken a panangtratotayo kadagiti sagrado a banag? Kas pagarigan, kalpasan ti panangbasa iti Exodo 3:5 nga aggigiddan, mabalinmo nga i-display ti sumagmamano a sagrado a banag wenno ladawan dagiti sagrado a banag (kas dagiti nasantuan a kasuratan wenno templo) ken dagiti gagangay a banag wenno ladawan dagiti gagangay a banag (kas kadagiti libro a mainaig iti nailubongan wenno gagangay a pasdek). Mabalin a saritaen dagiti miembro ti klase maipapan kadagiti banag nga ibilbilangda a sagrado ken ibinglayda no kasano nga ipakitada ti panagraem kadagita a banag (kitaen met iti Levitico 19:30; Doktrina ken Katulagan 6:10–12). Apay a kayat ti Mangisalakan a tratuentayo dagiti sagrado a banag iti panagraem?

Exodo 5:4–9, 20–23; 6:1–13

Maipatungpalto dagiti panggep ti Apo iti bukodna a panawen.

• Mabalin a makaupay no dagiti napudno a panagkagumaantayo nga agaramid iti nasayaat ket kasla saan a maipatpatungpal—nalabit a saan nga agresresponde ti maysa a gayyem kadagiti panagkagumaantayo iti ministering wenno kasla saan a nasungbatan dagiti kararagtayo para iti maysa a nasukir nga ubing. Tapno masursuro maipapan ti isu met la a padas nga adda ken ni Moises, mabalin a basaen dagiti miembro ti klase ti Exodo 5:4–9, 20–23. Kasano a tinulongan ti Apo ni Moises a mangparmek kadagiti riknana iti pannakaupay? (kitaen iti Exodo 6:1–13). Mabalin nga ibinglay dagiti miembro ti klase dagiti padas idi dida nakita a dagus dagiti bunga dagiti panagkagumaanda nga agserbi iti Apo. Ania ti isuro ti padas ni Moises kadagitoy a kapitulo maipapan no kasano a makapagrespondetayo kadagiti isu met la a situasion? (Kitaen met iti “Dagiti Nainayon a Resources.”)

Dagiti Nainayon a Resources

Agserbitayo iti dadduma para iti Apo.

Imbaga ni Presidente Joy D. Jones no kasano a sipupudno a nagserbida nga agassawa iti naidutok nga aramiden iti ministering ngem dida nakita ti balligi manipud kadagiti panagkagumaanda. Nagutob ken nagkararag ti agassawa para iti pannarabay. Iti pananglagip iti sungbat kadagiti kararagda, kinuna ni Presidente Jones:

“Naamirismi a sipupudno nga inkarkarigatanmi ti nagserbi iti daytoy a pamilia ken nagserbi iti bishopmi, ngem nasken a saludsodenmi iti bagimi no pudno nga agserserbikami gapu ta ay-ayatenmi ti Apo. Inlawlawag ni Ari Benjamin daytoy a paggidiatan idi kinunana, “Adtoy, kunak kadakayo nga agsipud ta kinunak kadakayo a binubosko dagiti aldawko iti panagserbik kadakayo, diak tarigagayan ti agparammag, ta addaak laeng iti serbisio ti Dios’ [Mosiah 2:16; nainayon ti panangyunay-unay].

“Asino ti pudno a pagserserbian ni Ari Benjamin? Ti Nailangitan nga Ama ken ti Mangisalakan. Ti panangammo iti no asino ken ti no apay iti panagserbi iti dadduma ket matulongannatayo a mangipaawat a ti kangatuan a panangipakita iti ayat ket debosion iti Dios” (“For Him,” Liahona, Nob. 2018, 50).

Panangpadur-as iti Panangisurotayo

Ibinglay dagiti naespirituan a padas. Maysa a wagas tapno maawis ti impluensia ti Espiritu iti klasem ket allukoyem dagiti miembro ti klase a mangibinglay no ania ti insuro ti Espiritu Santo kadakuada bayat ti panagadalda kadagiti nasantuan a kasuratan iti daytoy a lawas.