Ladawan da Moses ken Aaron iti korte ni Faraon, ni Robert T. Barret

Marso 28–Abril 3

Exodo 7–13

“Laglagipenyo Daytoy nga Aldaw, Isu a Panagtalawyo iti Egipto”

Ti kabaelam a matarabay ti Espiritu iti panangisurom ket mapadur-asto a husto no addaanka iti bukodmo a naespirituan a padas iti panagadal iti Exodo 7–13.

Isuratmo dagiti Impresionmo

Yawis ti Panagbibinninglay

Mangpanunot iti maysa wenno dua a saludsod a mangallukoyto kadagiti miembro ti klase a mangibinglay kadagiti nalawag a pannakaammo ken pannakaawat ken padasda bayat ti panagadalda iti Exodo 7–13 iti bukodda ken kaduada dagiti pamiliada. Kas pagarigan, mabalinmo a saludsoden, “Ania ti nabasam iti daytoy a lawas a nangpapigsa iti pammatim ken ni Jesucristo?” wenno “Ania ti nabasam a nangparabur iti pamiliam?”

Isuro ti Doktrina

Exodo 7–12

Mapilitayo ti mangpalukneng iti puspusotayo.

• Tapno matulongan a panunoten dagiti miembro ti klase maipapan iti kinatallugodda a mangted iti puspusoda iti Dios, mabalinmo a saggaysa a pabasa kadakuada ti maysa kadagiti sumaganad a binatog iti nasantuan a kasuratan: Exodo 7:14–25; 8:5–15; 8:16–19; 8:20–32; 9:1–7; 9:8–12; 9:22–26; 10:12–15; 10:21–29; 12:29–33. Kalpasanna mabalinda nga isurat iti pisarra dagiti balikas ken ragup ti balikas a mangilawlawag no kasano a nagresponde ni Faraon iti sangapulo a sarot nga imbaon ti Dios kadagiti Egipsio. (Mabalin a kayatmo nga ipakita dagiti rebision iti Patarus ni Joseph Smith a pinatangken ni Faraon ti bukodna a puso.) Apay a nagresponde ni Faraon iti wagas nga inaramidna? Apay a no dadduma narigat i panangitulnogtayo kadagiti puso ken pagayatantayo iti Dios? Kasano a tulongannatayo ti Nailangitan nga Ama ken ni Jesucristo a mangparmek kadagitoy a rigat?

• Babaen ti panangitugot iti klase iti natangken a banag ken nalukneng a banag, matulongam dagiti miembro ti klase a makaawat no ania ti kayat a sawen ti maaddaan iti natangken ken nalukneng a puso. Mabalinmo nga ipasa ti dua a banag iti aglawlaw ti klase, idinto a basaen ti maysa a tao dagiti panangiladawan iti puso ni Faraon a masarakan iti Exodo 7–10 (kas iti Exodus 9:22–35). Apay a ti “natangken” ti nasayaat a panangiladawan iti puso ni Faraon? Ania ti isuro dagitoy a bersikulo maipapan no ania ti kayat a sawen ti nalukneng a puso? (No makatulong, mabalin a sapulen dagiti miembro ti klase dagiti nalawag a pannakaammo ken pannakaawat iti maysa wenno ad-adu pay kadagitoy a nasantuan a kasuratan: 1 Nephi 2:16; Mosiah 3:19; Alma 24:7–8; 62:41; Ether 12:27.) Kasano a tulongannatayo ti Mangisalakan a mangpalukneng iti puspusotayo? Ti video “A Change of Heart” (ChurchofJesusChrist.org) ti mabalin a mangnayon iti pannakaawatda.

• Tapno matulongan dagiti miembro ti klase a mangpanunot no apay a nangibaon ti Apo kadagiti angol [plagues] iti Egipto, mabalinmo nga awisen ti tunggal miembro ti klase a mangpili iti maysa a reperensia manipud iti sumaganad a listaan ken mangsapul kadagiti posible a gapu: Exodo 3:20; 7:5, 17; 9:14–16; 10:1–2. Mabalinmo nga awisen dagiti miembro ti klase a mangibinglay no kasano a naammuanda nga “awan sabali a kas iti [Nailangitan nga Ama ken ni Jesucristo] iti amin a lubong” (Exodo 9:14).

Exodo 12

Isuro ti Paskua ti Panagungar ken ti sakramento maipapan iti pannakaisalakan babaen ken ni Jesucristo.

• Ti panangrambak iti Fiesta ti Paskua ti mangtulong kadagiti annak ti Israel a manglagip nga insalakan ti Apo ida manipud iti pannakaadipen. Tapno matulongan dagiti miembro ti klase a makaawat iti simbolismo ti Fiesta ti Paskua, mabalinmo ti agaramid iti dua a kolum iti pisarra nga addaan iti label a Simbolo ken Mabalin a Kaipapananna, nga addaan iti ladawan ni Jesucristo iti ngato dagiti kolum. Mabalin nga adalen dagiti miembro ti klase ti Exodo 12:1–13 ket isurat iti pisarra ti ania man a banag manipud kadagitoy a bersikulo a mabalin a mangisimbolo iti pannakaisalakantayo babaen ken ni Jesucristo. Kalpasanna mabalinda a paglilinnawagan no ania ti isuro dagitoy a simbolo kadatayo maipapan iti Pannubbot ti Mangisalakan (kitaen iti “Dagiti Nainayon a Resources” para iti sumagmamano a kapanunotan). Makatulong kadakuada ti video a “The Passover” (ChurchofJesusChrist.org) a mangiladawan iti panunotda no ania ti nabasada iti Exodo 12.

  

  Kas iti kanen iti Fiesta ti Paskua, tulongannatayo iti sakramento a manglaglagip iti Mangisalakantayo, ni Jesucristo.

• Para iti sumagmamano a tao, saan a kanayon a naespirituan ti sakramento a kas iti mabalin koma. Ibilang no kasano a makatulong ti Exodo 12 iti amin a miembro ti klase a mangsarak iti naun-uneg a kaipapanan iti sakramento. Kas pagarigan, kalpasan a marebyu dagiti miembro ti klase ti Exodo 12, mabalinmo nga awisen ida a mangibinglay no ania ti mabalin a kinuna dagiti Israelita manipud iti dayta a panawen no nagsaludsod ti maysa nga anak kadakuada iti kaipapanan ti Fiesta ti Paskua kadakuada. Kalpasanna mabalin nga ilawlawag dagiti miembro ti klase no ania ti makunada no saludsoden ti maysa a tao ti kaipapanan ti sakramento kadakuada, agraman dagiti nalawag a pannakaammo ken pannakaawat a magun-odda manipud iti Fiesta ti Paskua. Mabalinmo ti mangted kadagiti miembro ti klase iti gundaway a mangutob no ania ti maaramidda a manglaglagip iti Mangisalakan iti inaldaw. Ti video “Always Remember Him” (ChurchofJesusChrist.org) ti makatulong kadakuada.

Dagiti Nainayon a Resources

Isuro ti Fiesta ti Paskua maipanggep iti Mangisalakan.

Simbolo	Mabalin a Kaipapananna
Simbolo Ti kordero (Exodo 12:3–5)	Mabalin a Kaipapananna Jesucristo
Simbolo Dara kadagiti bautek ti ruangan (Exodo 12:7)	Mabalin a Kaipapananna Ti pangsubbot a dara ni Jesucristo, a mangisalakan kadatayo
Simbolo Pannangan iti kordero (Exodo 12:8)	Mabalin a Kaipapananna Panangaramid iti Mangisalakan a paset ti biagtayo
Simbolo Napait a natnateng (Exodo 12:8)	Mabalin a Kaipapananna Ti kinapait ti pannakaadipen (basol)

Panangpadur-as iti Panangisurotayo

Dumngeg. “Ti panagdengngeg ket maysa nga aramid ti ayat. … Dawatem iti Nailangitan nga Ama a tulongannaka a makaawat no ania ti sawen dagiti miembro ti klasem. Kabayatan ti panangikasom a nasayaat kadagiti nayebkas ken saan a nayebkas a mensaheda, ad-adda a maawatamto dagiti kasapulanda, pakaseknanda, ken tarigagayda” (Panangisuro iti Wagas ti Mangisalakan,34).