Ladawan ti awan nagyanna a tanem ni Maryna Kriuchenko

Abril 11–17

Paskua ti Panagungar

“Agballiginto a Mangalimon ken ni Patay”

Bayat ti panagsaganam a mangisuro maipapan iti Paskua ti Panagungar, panunotem no kasano a matulongam dagiti miembro ti klase a makagun-d iti naun-uneg a panagyaman ken pammaneknek iti panangsubbot a sakripisio ni Jesucristo ken Panagungar.

Isuratmo dagiti Impresionmo

Yawis ti Panagbibinninglay

Nalabit a mabalinmo nga awisen dagiti miembro ti klase a mangibinglay no ania ti inaramidda ken ti pamiliada tapno mapapigsa ti pammatida ken ni Jesucristo ken ti Pannubbotna kabayatan ti panawen ti Paskua ti Panagungar.

Isuro ti Doktrina

Gapu ta pinarmek ti Mangisalakan ti patay, agbiagtayonto manen.

• Gapu ta Paskua ti Panagungar ita nga aldaw, ibilang ti panangrebyu iti pakaammuan iti nasantuan a kasuratan maipapan iti umuna a Paskua iti Panagungar—ti Panagungar ni Jesucristo (kitaen iti Juan 20:1–17). Mabalinmo nga awisen ti maysa a miembro ti klase a mangisalaysay iti estoria kadagiti bukodna a balikas. Mabalinmo pay nga ipabuya ti video a “He Is Risen” (ChurchofJesusChrist.org). Mabalin a magustuan dagiti miembro ti klase ti panagkanta kadagiti himno maipapan iti Mangisalakan ken panagbasa kadagiti mainaig a nasantuan a kasuratan (nailista dagiti reperensia iti baba ti tunggal kanta iti Hymns). Kalpasanna mabalin nga ibinglay dagiti miembro ti klase dagiti paggugustoda a ragup ti balikas manipud kadagiti himno ken dagiti riknada maipapan iti Mangisalakan.

• Tapno matulongam nga agyaman ti klasem no kasano a paneknekan ti Daan a Tulag ni Jesucristo, mabalinmo nga awisen ida a mangrebyu kadagiti nasantuan a kasuratan iti tsart iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia, kasta met kadagiti binatog iti Libro ni Mormon nga adda iti tsart. Ania ti masursurotayo maipapan ti Mangisalakan ken ti misionna manipud kadagitoy a binatog? Apay a napateg a maammuantayo ti maipapan kadagitoy a padto?

Makasaraktayo iti talna ken rag-o babaen ti Pannubbot ti Mangisalakan.

• Iramanti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia ti listaan dagiti nasantuan a kasuratan a mangiladladawan iti talna ken rag-o a sumangbay babaen ken ni Jesucristo. No binasa dagiti miembro ti klase dagitoy a nasantuan a kasuratan iti pagtaengan, allukoyem ida a mangibinglay kadagiti kapanunotan ken riknada maipapan kadagitoy. Wenno mabalinyo nga irebyu ti sumagmamano a nasantuan a kasuratan kas maysa a klase ket pagsasaritaan maipapan iti talna ken rag-o a mariknatayo gapu iti Mangisalakan ken ti Pannubbotna. Kasano a maibinglaytayo dagitoy a bendision kadagiti tao a mabalin a mangikarkarigatan a mangsapul iti talna ken rag-o iti biagda? Mabalinmo nga awisen ti maysa a miembro ti klase a mangbasa iti mensahe ni Presidente Russell M. Nelson a “Joy and Spiritual Survival” (Liahona, Nob. 2016, 81–84) kabayatan ti lawas sakbay ti klase ket umay iti klase a nakasagana a mangibinglay no ania ti isuro daytoy a mensahe maipapan iti panangsarak iti rag-o iti Mangisalakan.

• Mabalin a mariknam a naparegtaka a mangidaulo iti panaglilinnawag maipapan no kasano ti panangtulong iti dadduma a mangsarak iti talna ken rag-o ken ni Cristo. Mabalinmo nga awisen dagiti miembro ti klase a mangpanunot maipapan iti maysa a tao nga am-ammoda—nalabit maysa a tao nga iministerda—a mabalin nga agkasapulan iti suporta ken serbisioda, uray pay gagangay nga idedengngegda iti pammaneknekda ken ni Cristo ken iti Pannubbotna. Allukoyem dagiti miembro ti klase nga agibasar kadagiti nasantuan a kasuratan (kas kadagiti adda iti “Dagiti Nainayon a Resources”) bayat ti panangibilangda iti serbisio a mabalinda nga ited wenno pammaneknek a mabalinda nga ibinglay a pangpapigsa kadagiti adda iti aglawlawda. Awisem ti sumagmamano a miembro ti klase a mangibinglay kadagiti kapanunotanda maipapan iti panagserbi kas iti inaramid ni Jesus.

Grey Day Golgotha, ni J. Kirk Richards

Babaen ti Pannubbotna, adda pannakabalin ni Jesuscristo a mangtulong kadatayo a mangparmek iti basol, ipapatay, pannubok, ken pagkapsutan.

• Maysa a wagas a pakatulongan kadagiti miembro ti klase a mangutob kadagiti bendision a sumangbay babaen ti Pannubbot ti Pangisalakan ket mangisurat iti pisarra kadagiti paulo a Basol, Ipapatay, Dagiti Pannubok, ken Dagiti Pagkapsutan. Idawat iti tunggal miembro ti klase a mangbasa iti maysa kadagiti nasantuan a kasuratan a nakalista iti “Dagiti Nainayon a Resources” ket mangutob no kasano a makatulong ti Mangisalakan kadatayo a mangparmek kadagiti banag a naisurat iti pisarra. Mabalin nga isurat dagiti miembro ti klase iti pisarra dagiti reperensiada iti nasantuan a kasuratan iti baba ti maysa wenno ad-adu pay kadagiti paulo ken ibinglayda ti pammaneknekda maipapan ti Mangisalakan ken ti Pannubbotna.

• Makatulong kadatayo dagiti estoria ken analohia tapno maawatantayo ti Pannubbot ni Jesucristo. Kas pagarigan, mabalinmo nga awisen ti maysa a miembro ti klase a mangibinglay iti maysa kadagiti estoria wenno analohia iti mensahe ni Elder Walter F. González’ “The Savior’s Touch” (Liahona, Nob. 2019, 90–92) wenno ti mensahe ni Sister Neill F. Marriott “Abiding in God and Repairing the Breach” (Liahona, Nob. 2017, 10–12). Ania ti isuro kadatayo dagitoy nga estoria maipapan iti Pannubbot ni Jesucristo? Awisem nga agtrabaho dagiti miembro ti klase iti kada paris a mangpanunot kadagiti bukodda nga estoria wenno analohia.

• Ania ti masursurotayo manipud kadagiti sumaganad a bersikulo maipapan iti pateg nga imbayad ni Jesucristo para iti pannakaisalakantayo: Isaias 53:3–5; Mosiah 3:7; Doktrina ken Katulagan 19:16–19? Ania ti gatad a binayadan ti Nailangitan nga Amatayo? (kitaen iti Juan 3:16).

Dagiti Nainayon a Resources

Dagiti Nasantuan a Kasuratan maipapan iti Pannubbot ni Jesucristo.

• Isaias 61:1–3

• Ezequiel 36:26–28

• Mateo 11:28–30

• Lucas 1:46–55

• Taga Roma 8:35–39

• Alma 7:10–13

• Alma 11:42–45

• Moroni 10:32–33

• Doktrina ken Katulagan 19:15–19

• Moises 5:9–12

Panangpadur-as iti Panangisurotayo

Agyamanka kadagiti sursuruam. “Saan koma a nakaipamaysa unay ti pasnekmo iti adalen tapno malipatam ti agyaman kadagiti agad-adal kadagiti kontribusionda. Nasken a maammuanda a pagyamanam ti kinatallugodda a mangiburay kadagiti nalawag a pannakaawat ken pannakaammoda ken pammaneknekda” (Panangisuro iti Wagas ti Mangisalakan,33).