“Abril 4–10. Exodo 14–17: ‘Agtalnakayo, ket Kitaenyo ti Panangispal ni Jehova’” Umaykayo, Sumurot Kaniak—Para iti Sunday School: Daan a Tulag 2022 (2021)
“Abril 4–10. Exodo 14–17,” Umaykayo, Sumurot Kaniak—Para iti Sunday School: 2022
Ti Nalabaga a Baybay
Abril 4–10
Exodo 14–17
“Agtalnakayo, ket Kitaenyo ti Panangispal ni Jehova”
Panunotem no kasano a mayaplikar kadagiti miembro ti klasem dagiti padas dagiti annak ti Israel. Ania kadagiti padas ti kangrunaan a makatulong a paglilinnawaganda?
Isuratmo dagiti Impresionmo
Yawis ti Panagbibinninglay
Napnuan tiExodo 14–17 kadagiti nakallalagip a pakaammuan. Mabalin nga agdrowing ti maysa a miembro ti klase iti ladawan ti pasamak manipud kadagitoy a kapitulo idinto a pugtuan ti dadduma pay a miembro ti klase no ania ti idrowdrowingna. Idawat kadakuada a mangibinglay no ania ti nasursuroda manipud iti pakaammuan.
Isuro ti Doktrina
Isalakannatayo ti Nailangitan nga Ama no surotentayo ti Espiritu.
-
Kasla maipada ti Nalabaga a Baybay iti ungto ti dalan kadagiti Israelita, ngem ammo ti Dios dagiti banag a dida ammo. Ti panangrebyu iti pakaammuan maipapan kadagiti namilagruan a panagballasiw iti Nalabaga a Baybay ket mangipalagip kadagiti miembro ti klase maipapan kadagiti panawen idi insalakan ida ti Dios kadagiti pannubokda. Mabalinmo nga idawat kadagiti miembro ti klase a mangrebyu iti Exodo 14 no ania ti kangrunaan a mangparegta kadakuada maipapan iti daytoy a pakaammuan. Kasta met nga allukoyem ida a mangibinglay kadagiti padasda iti pannakaisalakan manipud kadagiti pannubok, kasta met kadagiti bersikulo manipud iti kapitulo a mangbangon iti pammatida a maisalakannatayo ti Dios.
-
Mabalin pay a makaay-ayo nga aggigiddan a mangbasa iti Doktrina ken Katulagan 8:2–3. Ania ti isuro kadatayo dagitoy a bersikulo maipapan ken ni Moises? Kasano nga apektuan dagitoy a bersikulo ti wagas a panagpanunottayo maipapan kadagiti pasamak iti Exodo 14? Ania ti isingasing dagitoy maipapan iti no kasano ti panagkalikagum iti pannakaisalakan manipud kadagiti pannuboktayo? Ibilang no ania ti mabalin nga inayon ti palawag iti “Dagiti Nainayon a Resources” iti paglilinnawaganyo.
Ti manna a naggapu iti Dios ti pisikal a nangpakan iti israel; kasapulantayo met ti inaldaw a naespirituan a pannakataraon. Fresco ni Leopold Bruckner
Exodo 15:23–27; 16:1–15; 17:1–7
Ipaayto ti Apo dagiti kasapulantayo bayat ti panagdaliasattayo iti unos ti biag.
-
Mangted tiExodo 15–17 iti adu a pakaammuan a mangbangon iti pammati dagiti miembro ti klase iti bileg ken kinatallugod ti Apo a mangipaay kadagiti pisikal ken naespirituan a kasapulantayo. Mabalin nga adalen ti tunggal miembro ti klase ti maysa kadagiti sumaganad a binatog, a mangsapsapul kadagiti naespirituan a mensahe: Exodo 15:23–27; 16:1–15; 17:1–7. Mangted kadagiti miembro ti klase ti gundaway a mangibinglay no ania ti nasarakanda. Kasano a mausarmo dagitoy a pakaammuan a mangallukoy iti maysa a tao a saan a nakaipaay kadagiti temporal ken naespirituan a kasapulan?
-
Mabalin pay a basaen dagiti miembro ti klase dagitoy a bersikulo ken lasinen dagiti pagarigan ti panagdayamudom. Kasano a mailawlawagtayo iti maysa a tao no ania ti kaipapanan ti agdayamudom? Ania dagiti sumagmamano a bunga ti panagdayamudom a mangaramid iti daytoy a napeggad unay? Nalabit a mabalin dagiti miembro ti klase ti mangibinglay iti balakad maipapan iti no kasano ti panangliklik iti sulisog nga agdayamudom a maibusor iti Apo no mapadpadasantayo dagiti narigat a pannubok.
-
Makatulong kadagiti miembro ti klase no idasig ti manna a nailadawan iti Exodo 16 iti pannakataraon a kasapulan dagiti espiritutayo. Ania dagiti pagpapadaan a makitatayo? Ania dagiti naespirituan nga adalen a mabalin a kayat ti Apo nga isuro kadagiti Israelita babaen ti panangibaonna iti manna iti wagas nga inaramidna? (kitaen iti Juan 6:31–35, 48–58). Mabalinmo met nga ipabuya ti maysa wenno ad-adu pay kadagiti video a masarakan iti “Dagiti Nainayon a Resources.”
Mabendisionantayo no kanunongantayo dagiti lidertayo.
-
Ti pakaammuan da Aaron ken Hur a mangig-iggem kadagiti ima ni Moises ket mangipakita iti kinapateg ti panangkanunong kadagiti naawagan a mangidaulo kadatayo. Mabalinmo nga awisen ti sumagmamano a miembro ti klase a mangyakem iti padas idinto a basaen ti sabali pay a miembro ti klase iti napigsa daytoy. Kasano a maipada dagiti panagkagumaan da Aaron ken Hur a mangiggem iti ima ni Moises kadagiti panagkagumaantayo a mangkanunong kadagiti lidertayo. Kasano nga ipakitatayo a kanunongantayo dagiti lidertayo?
Dagiti Nainayon a Resources
Makaawatkayo iti bukod a direksion.
Insuro ni Sister Michelle D. Craig:
“Kas napudno a disipulo [ti Mangisalakan], makaawatka iti bukod a pammaregta ken paltiing, a maitunos kadagiti bilinna, a naipangpangruna kenka. Addaanka iti naidumduma a mision ken akem nga aramiden iti biag ket maikkankanto iti naidumduma a tarabay a mangipatungpal kadagitoy.
Adda idi dakkel a paset ti danum a binallasiw ni Nephi, ti kabsat ni Jared, ken uray ni Moises—ket saan nga agpapada ti panagballasiw ti tunggal maysa. Inaramid ni Nephi ti ‘kayo a naidumduma ti kinapintekna’ [1 Nephi 18:1]. Nagaramid ti kabsat ni Jared kadagiti bilog a ‘napintekda a kas iti malukong’ [kitaen iti Ether 6:5–8]. Ket ni Moises ‘nagna iti namaga a daga iti tengnga ti baybay’ [Exodo 14:29].
Immawat ti tunggal maysa iti bukod a pangiturong, a naipangpangruna kadakuada, ket nagtalek ken nagtignay ti tunggal maysa. Ikaso ti Apo dagiti agtulnog ken, iti sao ni Nephi, ‘isagana[nanto] ti maysa a wagas nga agpaay [kadatayo] a mangipatungpal iti banag nga imbilinna’ [1 Nephi 3:7]. Kitaen a kuna ni Nephi, ‘maysa a wagas”—saan a ‘ti wagas.’
“Maliwayantayo kadi wenno malipatantayo dagiti pangibaonan ti Apo gapu ta insagananan ti ‘maysa a wagas’ a sabali iti maysa a namnamaentayo?” (“Spiritual Capacity,” Liahona, Nob. 2019, 21).
Dagiti Video
Kadagiti video “Daily Bread: Pattern,” “Daily Bread: Experience,” ken “Daily Bread: Change” (ChurchofJesusChrist.org), nangibinglay ni Elder D. Todd Christofferson kadagiti nalawag a pannakaammo ken pannakaawat maipapan iti milagro ti manna.
Panangpadur-as iti Panangisurotayo
Allukoyem dagiti dadduma a mangibinglay iti pammaneknek. Adu kadagiti isurom ti addaan kadagiti bukod a pammaneknek maipapan iti kinapudno nga ibinglay. Awisem ida a mangibinglay kadagiti pammaneknekda babaen ti panagdamag kadagiti saludsod kas iti, “Kasano a nabendisionankayo babaen iti panagsurot iti propeta?” (Kitaen met iti Panangisuro iti Wagas ti Mangisalakan,11.)