bantay

Segun iti tradision patien a ti Bantay Sinai ti bantay iti Egipto.

Abril 18–24

Exodo 18–20

“Amin a Sinao ni Jehova Aramidenminto”

Basaem ti Exodo 18–20, ken isuratmo dagiti impresion a maawatmo maipapan no kasano a makatulong kadagiti miembro ti klasem a makasursuro manipud kadagitoy a kapitulo. Makaiturong uray pay dagiti gagangay nga impresion iti napnuan kaipapanan a padas iti panagsursuro.

Isuratmo dagiti Impresionmo

icon iti panagbibinninglay

Yawis ti Panagbibinninglay

Tapno maawis dagiti miembro ti klase a mangibinglay no ania ti nasursuroda, mabalinmo nga isurat iti pisarra ti 18, 19, ken 20—dagiti kapitulo a binasada iti Exodo iti daytoy a lawas. Awisem ti sumagmamano a miembro ti klase a mangisurat iti abay ti tunggal numero ti kapitulo kadagiti numero dagiti bersikulo a kayatda a paglilinnawagan manipud iti kapitulo. Bayat ti panangibinglay dagiti miembro ti klase kadagiti nalawag a pannakaammo ken pannakaawatda [insights], damagen iti dadduma pay a miembro ti klase no addaanda iti insights maipapan kadagiti isu met la a binatog.

icon iti panangisuro

Isuro ti Doktrina

Exodo 18:13–26

Makatulongtayo a “makipagannong” iti aramid ti Apo.

• Mabalinmo nga allukoyen ti klasem a mangilawlawag iti balakad nga inted ni Jetro ken ni Moises (kitaen iti Exodo 18:13–26) babaen ti panangidawat kadakuada a mangarapaap a makisarsaritada iti maysa a tao a makarikna iti “napalalo ti dagsen” dagiti takemna iti Simbaan, obligasionna iti pamilia, ken dadduma pay a responsibilidad ket “mapaksuyanto” (Exodo 18:18). Kasano a makatulong ti balakad iti Exodo 18:13–26? Ania ti nayon a balakad a mabalintayo a maibinglay manipud kadagiti bukodtayo a padas?

• Ti panagsasarita maipapan iti Exodo 18:13–26 ket mabalin a mangted iti gundaway a mapaglinnawagan no kasano a makatulong kadatayo a “makipagannong” kadagiti lidertayo iti aramid ti Apo (Exodo 18:22). Ania dagiti kababalin nga insingasing ni Jetro a sapulen ni Moises kadagiti agserbi nga “agtuturay” kadagiti tao? (kitaen iti Exodo 18:21). Apay a napateg dagita a kababalin kadagiti panagkagumaantayo nga agserbi a naespirituan (minister) iti tunggal maysa? Kasano a ti naespirituan a panagserbi kadagiti miembro ti pamilia, miembro ti Simbaan, ken dadduma pay ket makatulong a “makipagannong” kadagiti lidertayo iti Simbaan? Kas paset ti panaglilinnawagyo, mabalinmo nga ipabuya dagiti mainaig a video a masarakan iti ministering.ChurchofJesusChrist.org.

  lalaki a makial-alamano iti maysa a babai

  Ti naespirituan a panagserbi iti dadduma ket maysa a wagas a mabalintayo ti makiraman iti aramid ti Apo.

Exodo 20:2–11

Nasken nga ipangrunatayo nga umuna ti Apo iti biagtayo.

• Makapagpanunotkayo kadi iti maysa nga aramiden a maitrabaho a nasaysayaat no leppasentayo nga umuna dagiti kapatgan nga addang? (Ti panangsolbar iti maysa a math equation wenno panagtulad iti maysa a potahe dagiti mabalin nga iraman a pagarigan). Ibinglaymo iti klase ti sumagmamano a pagarigan nga ammom, ket awisem ida a mangpanunot iti bukodda. Kasano a mainaig kadagiti bilin ti Dios ti umuna a panangileppas kadagiti kapapatgan nga addang iti Exodo 20:2–11? Ania ti isuro kadatayo dagiti bilin maipapan iti panangipangruna nga umuna ti Dios iti biagtayo? Ania dagiti banag a mabalin a pakasulisogantayo nga ipangruna sakbay Isuna? (Para iti sumagmamano a pagarigan, kitaen iti palawag iti “Dagiti Nainayon a Resources.”) Ti panangrebyu iti Exodo 20:2–11 makatulong kadagiti miembro ti klasem a mangutob iti panagkumitda a mangipangruna nga umuna ti Dios.

Exodo 20:2–17

Manangngaasi ti Dios.

• Kasano a matulongam dagiti miembro ti klasem a makaawat iti pateg ti Sangapulo a Bilin iti aldawtayo? Mabalinmo a bingayen ti klase iti kada paris ket awisem ida a mangbasa iti Exodo 20:2–17 ket kalpasanna paglilinnawagan no kasano a nangbendision kadakuada, iti pamiliada, ken kadagiti tao iti lawlawda, ti panagtungpalda iti tunggal maysa kadagiti bilin. Mabalinyo pay a buyaen ti video “Obedience to the Ten Commandments” (ChurchofJesusChrist.org). Ania dagiti bendision nga ikari ti Nailangitan nga Ama kadatayo gapu iti panagtungpal kadagiti bilinna? (kitaen, kas pagarigan, iti Mosiah 2:41). Kasano nga ipakita dagitoy a bilin ti ayat ti Dios para kadatayo?

additional resources icon

Dagiti Nainayon a Resources

Awan dagiti sabali pay a dios.

Insuro ni Presidente Spencer W. Kimball nga adda dagiti pagdumaan ti nagkauna a panagrukbab kadagiti naikitikit a ladawan ken ti ugali dagiti tao iti agdama. Kinunana:

“Ti panagrukbab iti didiosen ti maibilang a kadagsenan kadagiti basol. …

“Mairaman a kita dagiti moderno a didiosen wenno palso a dios dagiti kawes, pagtaengan, negosio, makina, kotse, pagaliwaksayan a bilog, ken adu a dadduma pay a material a kumayakay manipud iti dana ti kinadios . …

Maaramid dagiti saan a marikna a banag kas nakasagana a dios. Makapagbalin a didiosen dagiti digri ken surat ken titulo. …

“Adu a tao ti agbangon ken mangpunno iti alikamen ti maysa a pagtaengan ken gumatangda nga umuna iti kotse—ken kalpasanna makitada a “dida kabaelan” ti agbayad iti apagkapullo. Asino ti pagrukbabanda? Awan duadua a saan a ti Apo ti langit ken daga. …

“Adu ti agrukbab iti panaganup, panagala iti ikan, ti bakasion, dagiti piknik ken panagpasiar iti ruar iti udi ti lawas. Adda a didiosen dagiti dadduma dagiti ay-ayam iti isport, baseball, football, bullfight, wenno golf. …

“Sabali pay a ladawan a pagrukbaban dagiti tao ti bileg ken kinalatak. … Dagitoy a didiosen ti bileg, kinabaknang, ken impluensia ti kangrunaan a maidawat a kasapulan ken kasla napudpudno kas balitok a sinanbaka dagiti annak ti Israel iti let-ang” (Teachings of Presidents of the Church: Spencer W. Kimball [2006], 146–47).

Panangpadur-as iti Panangisurotayo

Agpokus iti sumagmamano a pagbatayan. “Adu ti paglilinnawagan iti tunggal adalen, ngem saanmo a nasken nga isuro ti amin a banag iti maysa a panagklase tapno masagidmo ti puso ti maysa a tao—masansan nga umdasen ti maysa wenno dua a kangrunaan a punto” (Panangisuro iti Wagas ti Mangisalakan,7).