Panangiladawan ken ni Jehova iti panagparangna ken ni Moises ken dagiti 70 a panglakayen ti Israel, ni Jerry Harston

Abril 25–Mayo 1

Exodo 24; 31–34

“Addaakto a Sumurot Kenka”

Bay-an koma dagitoy a balikas manipud ken ni Elder Jeffrey R. Holland a mangiwanwan ti panagsaganam a mangisuro: “Kaaduanna kadagiti tao a saanda nga umay iti simbaan laeng tapno kumitkita iti sumagmamano a baro a kinapudno ti ebanghelio. … Umayda nga agsapsapul iti naespirituan a padas. … Kayatda a mapatibker ti pammatida ken mapabaro ti namnamada” (“A Teacher Come from God,” Ensign, Mayo 1998, 26).

Isuratmo dagiti Impresionmo

Yawis ti Panagbibinninglay

Mabalin nga ipapan dagiti miembro ti klase nga ibaga ti maysa a gayyem, “Saanko a basaen ti Daan a Tulag; kasla saan a mainaig daytoy iti biagko.” Kiddawem kadakuada a sumungbat babaen ti panangibinglay iti maysa a banag a nasarakanda a napnuan kaipapanan iti kallabes unay a panagadalda iti Daan a Tulag.

Isuro ti Doktrina

Exodo 31:12–17

Dayawentayo ti Sabbath kas panangipakita iti panagkumittayo iti Apo.

• Mabalinmo nga irugi babaen ti panangkiddaw kadagiti miembro iti klase no nasken nga ilawlawagda iti maysa a miembro ti pamilia wenno gayyem no apay a naiduma ti panangtratoda iti Domingo manipud iti dadduma pay nga aldaw. Awisem ida a mangibinglay no ania ti kinunada wenno no ania koma ti mabalin nga isaoda iti masakbayan. Ti panagbasa iti Exodo 31: 12–17 wenno ti palawag iti “Dagiti Nainayon a Resources” ket makaited kadakuada kadagiti mainayon a kapanunotan. Kasano nga ipakita dagiti pilitayo iti Sabbath iti panagkumittayo ken ni Jesucristo?

• Uray pay no saan a mayaplikar dagiti pannusa a nailadawan iti Exodo 31:14–15 ipakitada no kasano ti kapigsa ti rikna ti Apo maipapan iti Sabbath. Apay a napateg unay daytoy a bilin? Makatulong ti panangilawlawag kadagitoy a nasantuan a kasuratan: Exodo 31:12–17; Isaias 58:13–14; Doktrina ken Katulagan 59:9–13.

  

  Babaen ti panagdayaw iti Sabbath, ipakitatayo ti ayattayo para iti Apo.

Exodo 32; 34: 1–17

Yadayonatayo ti basol iti Dios, ngem idiaya ti Dios ti dalan nga agsubli.

• Tapno matulongan dagiti miembro ti klase a mangutob ken mangisarita iti bukodda ti pakaammuan iti Exodo 32, umuna a kiddawem kadakuada a mangrebyu iti kapitulo nga agmaymaysa wenno kada grupo. Kalpasanna kiddawem iti sumagmamano a miembro ti klase a mangyarig iti bagbagida kadagiti Israelita a nagbalin a di makaan-anus nga agur-uray ken ni Moises nga agsubli ket inkeddengda ti agaramid iti bimmalitok a didiosen. Ania dagiti rikna a mabalin a nangiturong kadakuada iti panagrukbab iti didiosen? Mabalin a padasen dagiti dadduma pay a miembro ti klase nga allukoyen ida nga agtalinaed a napudno iti Apo ken kadagiti propetana. Mabalin nga agsarita dagiti miembro ti klase maipapan no ania ti mangparegta kadakuada a mangtungpal kadagiti katulaganda. Ania ti mabalin a maitulongtayo kadagiti agkarkarigatan a mangtungpal kadagiti katulaganda?

• Idi basaen ti tao ti Daan a Tulag, nasdaawda no dadduma kadagiti naiget a pannusa nga impakat ti Apo para iti basol. Makatulong tiExodo 34:1–9 kadakuada a mangkita nga idinto a saan nga ayunan ti Dios ti basol, manangngaasi met Isuna, mangidiaydiaya iti pammakawan kadagiti agbabawi. Nalabit a mabasa dagiti miembro ti klase daytoy a binatog ken mautobda dagiti saludsod kas kadagitoy: Ania ti masursurotayo maipapan iti Apo manipud kadagitoy a bersikulo? Apay a kasapulan a maammuantayo dagitoy a banag maipapan Kenkuana? Mabalinmo nga ilawlawag a ti Patarus ni Joseph Smith, Exodo 34:7 (iti Exodo 34:7, footnote e) mangilawlawag a ti Dios saanna nga “ayunan ti nasukir.” Ania ti mabalin a kaipapanan daytoy? Nalabit a makaibinglay dagiti miembro ti klase no kasano a nasaksianda ti asi ti Dios. Kasano a posible para iti Dios nga agbalin a naan-anay a manangngaasi ken naan-anay a nalinteg? (kitaen iti Alma 42:13–15).

• TiExodo 34:6–17 mabalin a makita kas pangiturong a makatulong kadagiti Israelita a makapagbabawi kadagiti basolda iti panagrukbabda iti didiosen (nailadawan iti Exodo 32). Ania ti masarakantayo kadagitoy a bersikulo a mabalin a nakatulong koma kadagiti Israelita nga agbabawi? Ania ti masursurotayo maipapan iti Apo ken panagbabawi manipud iti daytoy a pangiturong?

Exodo 20:11–17

Kasapulantayo ti presensia ti Dios iti biagtayo.

• Kasano a matulongamto dagiti miembro ti klase a mangyaplikar iti no ania ti kinuna ti Apo ken ni Moises iti Exodo 33: 11–17? Mabalinmo nga irugi babaen ti panangrebyu iti aramid a kasapulan pay laeng ti Dios ni Moises nga ipatungpal (kitaen iti Exodo 33:1–3). Ania ti masarakantayo kadagiti bersikulo 11–17 a nangpapigsa koma ken nagliwliwa ken ni Moises? Mabalin nga agpanunot dagiti miembro ti klase maipapan iti maysa a banag a kayat ti Dios nga aramidenda—kas iti pannakaipatungpal ti pagrebbengan iti Simbaan, maysa a pagrebbengan iti pamilia, wenno maysa a gundaway nga iti ministering. Kalpasanna mabalinda a basaen manen dagiti bersikulo. Ania dagiti nalawag a pannakaammo ken pannakaawat (insights) a magun-odtayo maipapan no kasano a tulongannatayto ti Dios?

Dagiti Nainayon a Resources

Ti Sabbath ti maysa a pagilasinan.

Inlawlawag ni Presidente Russell M. Nelson: “Idi ubingak, inadalko ti aramid dagiti dadduma a namagtitipon kadagiti listaan ti bambanag nga aramiden ken saan nga aramiden iti Sabbath. Agingga iti saan a nabayag a nasursurok manipud kadagiti nasantuan a kasuratan a ti galadko ken ugalik iti Sabbath ti mangbukel iti maysa a pagilasinan ti nagbaetak ken ti Nailangitan nga Amak [kitaen iti Exodo 31:13; Ezequiel 20:12, 20]. Iti dayta a pannakaawat, saankon a kasapulan dagiti listaan ti aramiden ken saan nga aramiden. No nasken nga agaramidak iti maysaa pangngeddeng no ti maysa nga aktibidad maitutop man wenno saan para iti aldaw ti Sabbath, simple laeng a sludsodek no kua iti bagik, ‘Ania a pagilasinan ti kayatko nga ited iti Dios?’ Dayta a saludsod ti nangaramid kadagiti pilik maipapan iti aldaw ti Sabbath a nakalawlawag” (”The Sabbath Is a Delight,” Liahona, Mayo 2015, 130).

Panangpadur-as iti Panangisurotayo

Mangisuro babaen ti Espiritu. “Ti kangrunaan a panggep ti amin a banag nga aramiden ti maysa a mannursuro iti ebanghelio—tunggal saludsod, tunggal nasantuan a kasuratan, tunggal aktibidad—ket mangawis iti Espiritu a mangpatibker iti pammati ken mangawis iti amin nga umasideg ken ni Cristo” (Panangisuro iti Wagas ti Mangisalakan, 10).