“Mayo 23–29. Josue 1–8; 23–24: ‘Bumilegka ken Umingelka,’” Umaykayo, Sumurot Kaniak—Para iti Sunday School: Daan a Tulag 2022 (2021)
“Mayo 23–29. Josue 1–8; 23–24,” Umaykayo, Sumurot Kaniak—Para iti Sunday School: 2022
Panangiladawan ken ni Moises a mangor-orden ken ni Josue, ni Darrell Thomas
Mayo 23–29
Josue 1–8; 23–24
“Bumilegka ken Umingelka”
Bayat ti panangbasam iti Josue 1–8 ken 23–24, ibilangmo ti balakad nga “iti aldaw ken iti rabii pampanunotemto” (Josue 1:8). Ikasom dagiti parikna nga umay. Dagitoy ti mabalin a mangiturong iti panangisuro kadagiti kapanunotan para iti klasem.
Isuratmo dagiti Impresionmo
Yawis ti Panagbibinninglay
Awisem dagiti miembro ti klase a mangibinglay iti maysa a binatog manipud iti panagbasada iti daytoy a lawas a nangpadakkel iti pammatida ken ni Jesucristo. Kas pagarigan, mabalin a nautobda dagiti wagas a mangipalagip kadakuada iti mision ni Josue maipapan ken ni Jesucristo. Apay nga agyamantayo kadagiti estoria iti libro ni Josue?
Isuro ti Doktrina
“Bumilegka ken umingelka.”
-
Naibaga ken ni Josue, “Bumilegka ken umingelka” iti sumagmamano a gundaway (kitaen iti Deuteronomio 31:7, 23; Josue 1:6–7, 9). Nalabit a mairanud dagiti miembro ti klase manipud iti panangilawlawag no ania ti kayat a sawen ti Apo iti daytoy a ragup ti balikas. Mabalinda a sukisoken ti Josue 1:1–9 para iti balakad nga inted ti Apo ken ni Josue tapno makatulong kenkuana nga agbalin a natibker ken natured. Mabalinda pay nga ibinglay dagiti pagarigan dagiti tao nga am-ammoda nga addaan kadagitoy a kababalin. Kasano nga imparang ni Josue ti pigsa ken tured kadagiti pakaammuan a masarakan iti libro ni Josue? (kas pagarigan, kitaen kadagiti kapitulo 3, 6, ken 8). Mabalin nga ibinglay dagiti miembro ti klase no kasano ti panangikarigatanda nga agbalin a natibker ken natured para ken ni Cristo.
Mabalin a parang-ayen ti balikas ti Dios ti dalantayo.
-
Tapno maallukoy dagiti miembro ti klase iti bukod ken sangapamiliaan a panagadalda iti nasantuan a kasuratan, mabalinmo a basaen ti Josue 1:8 kas maysa a klase. Ania ti masursurotayo manipud iti daytoy a bersikulo maipapan iti no kasano ti agadal kadagiti nasantuan a kasuratan? Nalabit a mabalin nga ibinglay dagiti miembro ti klase no ania ti ar-aramidenda nga “agutob” iti nasantuan a kasuratan iti “aldaw ken rabii.” Kasano nga inaramid ti Apo a “parang-ayen ti dalantayo” ken inikkannatayo iti “naimbag a banag” bayat ti panagadaltayo iti balikasna?
Ladawanbabai nga agbasbasa kadagiti nasantuan a kasuratanMabalin ti balikas ti Dios a “parang-ayen ti dalan[tayo]” (Josue 1:8).
Mapadasantayo dagiti “datdatlag” ti Dios.
-
Nalabit a pagsayaatan dagiti miembro ti klase ti maysa nga ababa a panangrebyu iti pakaammuan dagiti Israelita iti ibaballasiwda iti Karayan Jordan. Mabalinmo a bingayen ti klase iti kada paris ket awisem ti tunggal paris a mangisarita iti estoria iti tunggal maysa, nga agsisinnublat a mangisao iti maysa a binatog iti maminsan (allukoyem ida nga agsapul iti Josue 3 no kasapulanda ti tulong a manglaglagip iti estoria). Kalpasanna, kas maysa a klase, mabalinda a paglilinnawagan dagiti ania man a detalye a napateg kadakuada. Ania ti masursurotayo manipud iti daytoy nga estoria a makatulong kadatayo a mangpadas kadagiti “datdatlag” ti Apo iti biagtayo? (bersikulo 5). Ania dagiti “datdatlag” nga inaramidnan para kadatayo? Apay a napateg nga addaan kadagiti naespirituan a padas ti tunggal kaputotan a mangisuro kadakuada a “ni Jehova … ket nabileg”? (Josue 4:24).
-
Uray no kasapulantayo amin ti maaddaan iti bukodtayo a padas a mangpapigsa iti pammatitayo, napateg met ti pananglaglagip iti inaramid ti Apo para kadagiti kapuonantayo. Segun iti Josue 4, ania ti inaramid dagiti Israelita a nangtulong kadagiti masakbayan a kaputotantayo a manglaglagip iti panagballasiw iti Karayan Jordan? (kitaen iti Josue 4:1–7). Ania ti ar-aramidentayo tapno masigurado a saan a malipatan dagiti masakbayan a kaputotan dagiti padastayo?
Mangisangbay ti panagtulnog iti bileg ti Dios iti biagko.
-
Isingasing tibalabala itoy a lawas iti Umaykayo, Sumurot Kaniak—Para kadagiti Indibidual ken Pamilia ti panangidasig kadagiti pannakiranget dagiti Israelita a maibusor kadagiti Cananeo iti Josue 6–8 kadagiti bukod a pannakirangettayo a maibusor iti sulisog. Mabalinmo nga idawat kadagiti miembro ti klase no ania dagiti kapanunotan wenno impresion nga adda kadakuada bayat ti panagbasada kadagitoy a kapitulo a pampanunotem daytoy a panangidasig. Wenno mabalinmo nga itudo kadakuada dagiti nalawag a bersikulo a kasla adda pakainaiganda kadagiti pannakirangetttayo a mangliklik iti basol, ket mabalinda nga isarita maipapan no ania ti isuro dagita a bersikulo maipapan iti pananggun-od ti bileg ti Dios iti biagtayo. Mabalin nga iraman ti sumagmamano kadagitoy a bersikulo ti Josue 6:1–5, 18, 20; 7:11–13.
“Agpilikayo iti daytoy nga aldaw no siasino ti pagserbianyonto.”
-
Nalabit a makatulong kadagiti miembro ti klase a mangyaplikar ti Josue 23–24 iti bagbagida no ipapanda nga isuda dagiti Israelita a dumdumngeg ken ni Josue a mangted iti daytoy a balakad iti gibus ti biagna. Mabalinmo nga ikkan ida iti sumagmamano a bersikulo a basaen a siuulimek ket kalpasanna kiddawem kadakuada a mangibinglay iti maysa a banag manipud kadagita a bersikulo a nangparegta kadakuada nga agtalinaed a napudno iti Apo. Mabalinda pay nga ibinglay no kasano a personal nga inaramidda ti pangngeddeng maipapan iti “siasino ti pagserbian[danto]” (Josue 24:15). Apay nga naaramidda daytoy a pangngeddeng?
-
Mabalinmo nga awisen dagiti miembro ti klase a mangala iti maysa a ragup ti balikas manipud iti Josue 23–24 a mangparegta kadakuada nga agpili nga agserbi iti Dios ket kalpasanna mangaramid iti maysa a poster wenno kapanunotan iti daytoy a ragup ti balikas nga i-display iti pagtaengan wenno iti social media.
Panangpadur-as iti Panangisurotayo
Mapasamak iti pagtaengan ti naespirituan a panagdur-as. Kasapulan dagiti miembro ti klasem a maaddaan iti bukod a naespirituan a padas iti ruar ti klase tapno agtalinaed a napigsa iti kinaespirituan. Mangsapul iti wagas a pangusaran iti apagbiit a kanito a kaduam ida a mangparegta kadakuada a mangsapul kadagiti naespirituan a pannakataraon kadagiti nasantuan a kasuratan iti pagtaengan—agmaymaysa ken kaduada dagiti pamiliada. (Kitaen iti Panangisuro iti Wagas ti Mangisalakan,18.)