“Mayo 2–8. Exodo 35–40; Levitico 1; 16; 19: ‘Kinasantuan iti Apo,’” Umaykayo, Sumurot Kaniak—Para iti Sunday School: Daan a Tulag 2022 (2021)
“Mayo 2–8. Exodo 35–40; Levitico1; 16; 19,” Umaykayo, Sumurot Kaniak—Para iti Sunday School: 2022
Mayo 2–8
Exodo 35–40; Levitico 1; 16; 19
“Kinasantuan iti Apo”
No addaanka kadagiti napnuan kaipapanan a padas iti panagadal kadagiti nasantuan a kasuratan, kabaelamto ti mangisuro ken agpaneknek no maam-ammom dagiti miembro ti klase iti Domingo. Ania ti maaramidmo a mangallukoy kadagiti dadduma a mangaramid iti kasta met laeng?
Isuratmo dagiti Impresionmo
Yawis ti Panagbibinninglay
Dagiti kapitulo iti daytoy a lawas a panagbasa ket mangusar kadagiti simbolo a mangisuro maipapan ken ni Jesucristo ken ti pangsubbot a sakripisiona. Mabalinmo a rugian ti klase babaen ti panangawis kadagiti miembro ti klase a mangisurat wenno mangidrowing iti pisarra iti maysa a banag a nasarakanda iti Exodo 35–40 wenno Levitico 1; 16; 19 a nangisuro kadakuada ti maipapan iti Mangisalakan. Awisen ida nga agsarita maipapan ti nasursuroda.
Isuro ti Doktrina
Kayat ti Apo nga agbalintayo a nasantuan a kas Kenkuana.
-
Bayat ti panagadal dagiti miembro ti klase iti Exodo 35–40 iti daytoy a lawas, mabalin nga inutobdan no kasano a nangiturong dagiti elemento ti nagkauna a tabernakulo iti kapanunotanda ken ni Jesucristo. No inaramidda, allukoyem ida a mangibinglay kadagiti kapanunotanda. Makatulong ti ladawan iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia iti daytoy a panaglilinnawag. Mabalinmo pay nga isarita maipapan iti no ania ti isuro dagitoy a simbolo a mainaig iti tabernakulo maipapan iti panagbalin a nasansantuan. Kasano a tumulong ni Jesucristo kadatayo nga agbalin a nasansantuan?
-
Para iti kaaduan, ti kapanunotan iti panagbalin a nasansantuan ket mabalin a kasla di maragpat. Kasano a matulongamto dagiti miembro ti klase a makaawat a ti panagbalin a nasantuan ket paset ti plano ti Nailangitan nga Ama para kadatayo? Mabalin nga aggigiddan a basaenyo ti palawag ni Presidente Henry B. Eyring iti “Dagiti Nainayon a Resources.” Ania ti kayat a sawen ti agbalin a nasantuan? Kasano a makatulong kadatayo nga agbalin a nasansantuan dagiti templotayo kadagiti ud-udina nga aldaw ken dagiti trabaho nga aramidentayo idiay? (kitaen met iti Doktrina ken Katulagan 84:19–24; 109:6–26; 128:15–18). Kalpasanna mabalinmo nga idawat kadagiti miembro ti klase a mangibinglay no kasano a nakatulong dagitoy a banag kadakuada—wenno iti dadduma pay nga am-ammoda—nga agbalin a nasansantuan.
-
Maipada ti tabernakulo dagiti Israelita iti let-ang iti adu a wagas kadagiti templotayo iti ud-udina nga aldaw. Mabalinmo nga awisen dagiti miembro ti klase a mangilista kadagiti banag a nasursuroda maipapan iti tabernakulo iti Exodo 35–40 a mangipalagip kadakuada maipapan iti no ania ti padastayo iti templo. No kasapulanda ti tulong, mabalinmo nga itudo kadakuada kadagiti bersikulo iti Exodo 40 a mangitudtudo iti belo, dagiti altar, sagrado a kawes, dagiti pannakabuggo ken pannakapulot. Kasano a matulongannatayo ti templo nga umasideg ken ni Cristo? Ania ti maaramidtayo a mangipamaysa iti panawentayo iti templo Kenkuana?
Babaen ti Pannubbot ni Jesucristo, mabalintayo a mapakawan.
-
Nupay ti kapanunotan a panagisakripisio ti ayup ket mabalin a kasla karkarna kadatayo iti agdama, adu ti masursurotayo manipud iti daytoy a kannawidan maipapan iti pangsubbot a sakripisio ni Jesucristo. Tapno mairugi ti panaglilinnawag, mabalinmo nga i-display dagiti ladawan ti Mangisalakan iti Getsemani ken iti krus (kitaen iti Libro ti Arte ti Ebanghelio, dagiti num. 56,57). Mabalin nga ibinglay dagiti miembro ti klase dagiti balikas a mariknada a mainaig iti pangsubbot a sakripisio ni Jesucristo. Kalpasanna awisem dagiti miembro ti klase a mangrebyu iti Levitico 1:1–9 wenno Levitico 16, a mangiladawan kadagiti isakripisio nga ayup, ken mangsapul kadagiti mainaig a balikas a mariknada pay a mainaig iti sakripisio ti Mangisalakan. Kasano a makatulong kadatayo a makaawat a nasaysayaat iti Pannubbot ni Jesucristo dagitoy nagkauna a sakripisio? Mabalin nga agkanta dagiti miembro ti klase iti himno maipapan iti Mangisalakan ken mangibinglay iti riknada maipapan Kenkuana.
Ladawannagkauna a tattao a mangitugtugot kadagiti daton tapno mangbangon iti tabernakuloNangted dagiti annak ti Israel kadagiti daton para iti tabernakulo nga addaan iti “siaannugot a puso” (Exodo 35:5). Panangiladawan ni Corbert Gauthier, © Lifeway Koleksion/licensed from goodsalt.com
-
Mabalin a makatulong kadagiti miembro ti klase a mangidilig kadagiti sakripisio nga indawat ti Apo kadagiti panawen ti Daan a Tulag kadagiti sakripisio a kidkiddawenna kadatayo iti agdama. Kas pagarigan, mabalinda nga ilista dagiti wagas nga aramidentayo a sakripisio para iti Apo ken iti aramidna, a kas iti panagserbi kadagiti takem, panagbayad kadagiti daton iti panagayuno, panangaramid iti trabaho iti family history, wenno panag-ministering iti tunggal maysa. Kalpasanna mabalinyo ti aggigiddan a mangbasa iti Levitico 1:1–9 ket awisen dagiti miembro ti klase a mangsapul kadagiti elemento iti daton a nailadawan kadagitoy a bersikulo a mainaig iti daton iti panagayuno a kidkiddawen kadatayo ti Apo nga itedtayo iti agdama (kitaen iti 3 Nephi 9:19–20; Doktrina ken Katulagan 64:34). Ania ti masursurotayo manipud iti Moises 5:7 maipapan iti no kasano ti nasken a panangkitatayo kadagiti sakripisiotayo para iti aramid ti Apo?
Dagiti Nainayon a Resources
Mapagbalinnatayo ti Dios a nasantuan.
Insuro ni Presidente Henry B. Eyring:
“Dakdakkel a ragsak ti aggapu iti dakdakkel a bukod a kinasantuan. … Isuro dagiti nasantuan a kasuratan kadatayo a maibilang kadagiti dadduma pay a banag, mabalintayo a mapasanto wenno makapagbalin a nasansantuan no aramatentayo ti pammati ken ni Cristo, mangipakitatayo iti panagtungpaltayo, agbabawi, agsakripisio para Kenkuana, umawat kadagiti sagrado nga ordinansa, ken agtungpal kadagiti katulagantayo Kenkuana. …
“Ti himno ‘More Holiness Give Me’ [Hymns, no. 131] ket mangisingasing iti maysa a wagas iti panagkararag para iti tulong iti panagbalin a nasansantuan. Nainsiriban nga isingasing ti awtor a ti kinasantuan a kalikagumantayo a gun-oden ket maysa a sagut a naggapu iti maysa a manangayat a Dios, a naipaay iti pananglabas ti panawen, kalpasan ti amin nga inaramidtayo” (“Holiness and the Plan of Happiness,” Liahona, Nob. 2019, 100–101, 103).
Panangpadur-as iti Panangisurotayo
Usarem ti sagrado a musika. Makapatibker iti doktrina kadagiti nasantuan a kasuratan dagiti mensahe iti himno. Kas pagarigan, ti panangkanta iti maysa a himno kas iti “More Holiness Give Me” wenno “I Stand All Amazed” (Hymns, nos. 131, 193) ket makapatibker iti sumagmamano a mensahe a naisuro iti Levitico 16 ken 19.