“Mayo 9–15. Numeros 11–14; 20–24: ‘Dikayo Koma Kumaniwas Ken Jehova, Wenno Dikayo Agbuteng,’” Umaykayo, Sumurot Kaniak—Para iti Sunday School: Daan a Tulag 2022 (2021)
“Mayo 9–15. Numeros 11–14; 20–24,” Umaykayo, Sumurot Kaniak—Para iti Sunday School: 2022
Mayo 9–15
Numeros 11–14; 20–24
“Dikayo Koma Kumaniwas Ken Jehova, Wenno Dikayo Agbuteng”
Maysa kadagiti kasayaatan a wagas a mangammo no ania ti ipamaysa kabayatan ti klase ket ti agsaludsod kadagiti miembro ti klase no ania ti nasarakanda a napnuan kaipapanan bayat ti panagadalda kadagiti nasantuan a kasuratan. Daytoyto ti mangipakaammo no ania ti napateg kadakuada ken no ania ti nakasagana nga adalenda.
Isuratmo dagiti Impresionmo
Yawis ti Panagbibinninglay
No dadduma ti kasapulan tapno maparegta dagiti miembro ti klase a mangibinglay kadagiti nalawag a pannakaammo ken pannakaawat (insights) manipud iti panagadalda ket ti panagdamag iti gagangay a saludsod a kas iti “Ania ti insuro ti Espiritu Santo kenka bayat ti panagbasam iti nasantuan a kasuratan iti daytoy a lawas?” Kalpasanna ikkam ida iti gundaway a mangutob ken sumungbat.
Isuro ti Doktrina
Mangpasakit iti Apo ti panangsarita a maibusor iti propeta ti Apo.
-
Ti panagbasa iti Numeros 12 ket makatulong kadagiti miembro ti klase a makaawat iti kinadagsen ti panagsasao a maibusor iti propeta ti Apo. Mabalinmo nga awisen dagiti miembro ti klase a mangbasa iti daytoy a kapitulo ken mangisarita no kasano ti marikna ti Apo maipapan kadagiti katulonganna. Batay kadagiti bersikulo 1–2, ania iti panagkunam ti kayat a sawen ti agsao a maibusor iti propeta ti Apo? Ania dagiti pagpeggadan ti panagaramid iti daytoy? Ania ti masursurotayo manipud kadagiti tignay ni Moises ken dagiti Israelita kadagiti bersikulo 13 ken 15?
“Ni Moises isu idi ti napakumbaba unay.”
-
Mabalin a masdaaw ti sumagmamano a tao a mangbasa a ti maysa a dadaulo a maingel a kas ken ni Moises, a nagtakder iti sango ni Faraon ken nagaramid kadagiti nakaskasdaaw a milagro nga addaan iti bileg ti Apo, ket maysa pay a “napakumbaba unay.” Mabalinmo nga usaren ti Numeros 12:3 a mangirugi iti panaglilinnawag maipapan iti no ania ti pudno a kinapakumbaba. Mabalinmo ti agibasar iti kaipapanan iti “Naemma, Kinaemma” iti Pangiwanwan iti Nasantuan a Kasuratan (scriptures. ChurchofJesusChrist.org). Kas maysa a klase, mabalinmo met a sapulen dagiti pakakitaan ti kinapakumbaba ni Moises iti Numeros 12.
-
Ania dagiti pakakitaan ti kinapakumbaba ni Moises a masursurotayo ? (kitaen, kas pagarigan, iti Exodo 18:13–25; Numeros 11:26–29; Hebreo 11:24–27; Moises 1:10–11). Mabalinmo met a basaen ken ilawlawag no kasano nga impakita ti Mangisalakan ti kinapakumbaba (kitaen iti Mateo 11:29; 27: 11–14; Lucas 22:41– 42; Juan 13:4–5). Ania ti isuro kadatayo dagiti pagwadan ni Moises ken ti Mangisalakan—wenno tattao nga am-ammotayo—maipapan iti kinapakumbaba? Apay a kayat ti Apo nga agbalintayo a napakumbaba?
Addaan iti pammati iti Apo, maaddaantayo iti namnama para iti masakbayan.
-
Bayat ti panangilawlawagmo iti estoria maipapan ti 12 nga Israelita nga agsuksukisok iti naikari a daga ken agipakpakaammoda, ibilangmo ti agsaludsod kadagiti miembro ti klase no kasano iti panagriknada a mabalin a pakayaplikaran daytoy nga estoriakadagiti situasion a pakaipasanguanda. Tapno makatulong, mabalinmo nga awisen dagiti miembro ti klase a mangilista kadagiti banag manipud iti Numeros 13:23–33 a mabalin nga idilig iti maysa a banag iti biagtayo. Kas pagarigan, mabalin nga ibagi ti naikari a daga iti maysa a banag a kayat ti Apo nga ipatungpaltayo, mabalin nga ibagi dagiti sinar-ay ti ubas dagiti bendision, mabalin nga ibagi dagiti higante dagiti karit a pakaipasanguantayonto, ken dadduma pay. Allukoyem dagiti miembro ti klase a mangibinglay no ania ti mariknada a mabalin a kayat ti Apo a masursuroda manipud iti daytoy nga estoria.
Nagbuteng dagiti sangapulo kadagiti Israelita nga espia; adda pammati da Josue ken Caleb. © Lifeway Koleksion/licensed from goodsalt.com
No kitaentayo ni Jesucristo a sipapammati, naespirituan nga agasannatayo.
-
Tapno matulongan dagiti miembro ti klase a mangilawlawag iti pakaammuan iti Numeros 21:4–9 ken mangbukel iti pammatida iti Mangisalakan, mabalinmo nga isurat iti pisarra dagiti saludsod a kas kadagitoy: Ania ti ibagi ti umap-apuy nga uleg? Ania ti mabalin nga ibagi dagiti kagat ti uleg? Apay a nagkedked ti sumagmamano a tao a kumita iti umap-apuy nga uleg? Kasano a mabalintayo a “kumita” iti daytoy iti agdama? Mabalin nga ibinglay dagiti miembro ti klase dagiti sungbat a masarakanda bayat ti panagbasada iti Numeros 21:4–9; 1 Nephi 17:40–41; Alma 33:18–22; ken Helaman 8:13–15. Ania dagiti sumagmamano a gagangay a banag a pangyawisan ti Mangisalakan nga aramidentayo tapno umawat iti panagagasna? Apay a no dadduma narigat nga aramiden dagiti kasta a gagangay a banag? (kitaen iti “Dagiti Nainayon a Resources” para iti sumagmamano a kapanunotan iti daytoy). Nalabit a makaibinglay dagiti miembro ti klase no kasano a ti panangaramid kadagitoy a banag ket nangisangbay iti bileg ti Mangisalakan iti biagda.
Dagiti Nainayon a Resources
“Dagiti babassit ken gagangay a banag.”
Imbaga ni Elder L. Whitney Clayton ti maysa nga obispo a nangbalakad kadagiti miembro ti ward a mapadpadasan ti nadumaduma a narigat a pannubok iti biagda:
“Masansan unay a karaman iti balakadna kadagiti miembro ti ward ti panangipamaysa kadagiti gagangay nga aramid ti pammati, a kas iti panagadal ti Libro ni Mormon[,] … panagbayad iti apagkapullo, ken panagserbi iti Simbaan nga addaan kinapasnek. Nupay kasta, masansan a ti sungbatda kenkuana ket maysa nga addaan panagduadua: ‘… Ania ti pakainaigan ti panagaramid iti ania man kadagita a banag kadagiti banag nga innak pakaipaspasanguan?’
“… Dagiti mangiranta maipapan iti panagaramid kadagiti ‘babassit ken gagangay a banag’ [Alma 37:6]—panagtungpal iti kasla babassit a wagas—ket mabendisionan iti pammati ken pigsa a nalablabes pay ngem dagiti makita nga aramid ti kinatulnog mismo ken, kinapudnona, mabalin a kasla awan pakainaiganna kadakuada” (“Whatsoever He Saith unto You, Do It,” Liahona, Mayo 2017, 98).
Panangpadur-as iti Panangisurotayo
Ipamaysa iti no ania ti kapatgan. Saan a mabalin nga isuro ti amin nga estoria wenno amin a pagbatayan. Surotem ti Espiritu, ket ibilangmo ti kasapulan dagiti miembro ti klase bayat ti panangikeddengmo no kasano ti mangbubos iti oras ti klase. Laglagipen a nasken a ti pagtaengan, saan nga iti siled ti klase, ti sentro a pagsursuruan iti ebanghelio.