“Mayo 16–22. Deuteronomio 6–8; 15; 18; 29–30; 34: ‘Agaluadka Ngarud Di La ket Ta Malipatam ni Jehova,’” Umaykayo, Sumurot Kaniak—Para iti Sunday School: Daan a Tulag 2022 (2021)
“Mayo 16–22. Deuteronomio 6–8; 15; 18; 29–30; 34,” Umaykayo, Sumurot Kaniak—Para iti Sunday School: 2022
Panangiladawan ni Moises iti Bantay Nebo, © Providence Collection/licensed from goodsalt.com
Mayo 16–22
Deuteronomio 6–8; 15; 18; 29–30; 34
“Agaluadka Ngarud Di La ket Ta Malipatam ni Jehova”
Naparegta a mangisuro ni Moises kadagiti annak ti Israel batay kadagiti kasapulanda (kitaen iti Deuteronomio 6:1). Bayat ti panagadalmo iti Deuteronomio, agkalikagumka a manggun-od iti pammaregta tapno ammuen no ania dagiti pagbatayan nga isuro, agibasar iti kasapulan dagiti miembro ti klase.
Isuratmo dagiti Impresionmo
Yawis ti Panagbibinninglay
Gapu ta linaon ti Deuteronomio dagiti maudi a balikas ni Moises kadagiti annak ti Israel, mabalinmo nga awisen dagiti miembro ti klase a mangibinglay iti maysa a banag a nasarakanda iti Deuteronomio a kayatda nga iraman iti maudi a balikasda kadagiti annak wenno appokoda. Bayat ti panangibinglayda, kiddawem kadakuada a mangilawlawag no apay a pinilida dagita a balikas.
Isuro ti Doktrina
Deuteronomio 6:4–7, 20–25; 8:2–5, 11–17; 29:18–20; 30: 6–10, 15–20
Kayat ti Apo nga agayattayo Kenkuana iti amin a pusotayo.
-
Iti intero a Deuteronomio, adda dagiti binatog a mabalin a mangguyugoy kadatayo a mangpanunot maipapan iti naespirituan a kasasaad dagiti pusotayo. Tapno matulongan dagiti miembro ti klase a mangibinglay kadagiti kapanunotanda maipapan kadagitoy a binatog, mabalinmo ti mangidrowing iti maysa a sinanpuso iti pisarra. Kalpasanna bingayem dagiti sumaganad a nasantuan a kasuratan kadagiti miembro ti klase: Deuteronomio 6:4–7, 20–25; 8:2–5, 11–17; 29:18–20; 30: 6–10, 15–20. Awisem dagiti miembro ti klase a mangisurat iti pagibasaran iti uneg ti sinanpuso no mangisuro daytoy iti maipapan iti maysa a banag a nasken nga addaantayo iti puspusotayo wenno mangisurat iti pagibasaran iti ruar ti sinanpuso no mangisuro daytoy iti maysa a banag a nasken a liklikantayo. Ania ti kayat a sawen ti agkararag iti isu amin a puspusotayo iti Nailangitan nga Ama?
-
Kasano nga ilawlawagtayo iti pamiliatayo ken iti dadduma no apay nga agtungpaltayo kadagiti bilin ti Dios? Kalpasan ti panangutob iti daytoy a saludsod, mabalin a basaen dagiti miembro ti klase ti Deuteronomio 6:4–7, 20–25 wenno ti palawag iti “Dagiti Mainayon a Resources” ket ibinglayda dagiti kapanunotanda. Kasano nga apektuan dagitoy nalawag a pannakaammo ken pannakaawat (insights) ti wagas a mariknatayo maipapan kadagiti bilin wenno katulagan?
“Isurom [dagiti balikas ti Apo] a siaagawa kadagiti annakmo.”
-
No dadduma makatulong a dumngeg kadagiti kapanunotan maipapan kadagiti wagas nga isursuro ken masursuro dagiti dadduma ti ebanghelio iti pagtaenganda. Ti panaglilinnawag no kasano ti panangsurot dagiti miembro ti klase iti balakad iti Deuteronomio 6:4–9, 20–25 ket makaited iti klasem iti maysa gundaway a makasursuro manipud iti tunggal maysa. Ania ti aramidentayo a mangisuro ken “sasawen” ti (bersikulo 7) maipapan iti balikas ti Dios a kas iladawan dagitoy a bersikulo? Ania dagiti padas a maibinglaytayo a pangtarabayan ti Apo kadatayo kadagiti panagkagumaantayo?
Ti panangtulong kadagiti agkasapulan ket iramanna dagiti managparabur nga ima ken natallugod a puspuso.
-
Saantayo pay nakasangpet iti aldaw “nga awanto ti napanglaw iti biangmo” (Deuteronomio15:4), iti kasta dagiti pagbatayan maipapan iti panangtulong kadagiti nakurapay iti Deuteronomio 15 ket napateg pay laeng dagitoy, uray no nagbalbaliwen dagiti naipangruna a kannawidan maipanggep kadagiti utang ken adipen. Mabalinmo nga awisen dagiti miembro ti klase a mangrebyu kadagiti bersikulo 1–15 ken mangsapul kadagiti pagbatayan maipapan iti panangtulong kadagiti nakurapay ken agkasapulan a kayatda a paglilinnawagan. Dagiti saludsod kas kadagitoy ti makatulong iti panaglilinnawag: Ania ti kayat a sawen ti “ukrademto a di bumurong ta imam” kadagiti agkasapulan? (dagiti bersikulo 8, 11). Ania ti akem nga aramiden ti pusotayo iti panangtulong kadagiti dadduma? (kitaen kadagiti bersikulo 7, 9–10). Ania ti masursurotayo maipapan iti panangtulong kadagiti agkasapulan manipud iti pagwadan ti Apo? (kitaen iti bersikulo 15).
Awisennatayo ti Apo nga agpili iti “biag ken imbag, ti patay ken dakes.”
-
Mabalin a makaay-ayo nga idilig ti balikas ni Moises iti Deuteronomio iti sumagmamano a kaudian a pannursuro ni Lehi iti kaamaanna iti 2 Nephi 1–4. Nalabit a masarakan dagiti miembro ti klase dagiti pagpapadaan ken paggigiddiatan dagitoy a binatog: Deuteronomio 29: 9 ken 2 Nephi 4:4; Deuteronomio 30:15–20 ken 2 Nephi 2:26–29. Kasano a pinadakkel ni Lehi no ania ti insuro ni Moises? Apay a dagiti balikas a kas iti biag ken patay ket nasayaat a wagas a pangiladawan kadagiti pilitayo nga “agtungpal” wenno “umadayo” manipud kadagiti bilin ti Dios? (Deuteronomio 30:16–17). Mabalin a mangibinglay dagiti miembro ti klase no ania ti nasarakanda kadagitoy a binatog a mangparegta kadakuada a “pilien ti biag” (Deuteronomio 30:19).
Dagiti Nainayon a Resources
Agtungpaltayo kadagiti katulagantayo gapu iti panagayattayo iti Dios.
Insuro ni Presidente Linda K. Burton:
“Kadagiti amin a gapu nasken a napaspasnektayo iti panagtungpal iti katulagantayo, daytoy a gapu ti ad-adda a makaparegta iti amin—ayat. …
“‘No naan-anay nga agyamantayo iti adu a bendision nga adda kadatayo babaen ti pannakasubbot a naaramid para kadatayo, awan ti mabalin a kiddawen ti Apo a saantayo a siaanep ken sitatallugod nga aramiden’ [Joseph Fielding Smith,“Importance of the Sacrament meeting,” Relief Society Magazine, Okt. 1943, 592]. Mayannurot iti daytoy a palawag ni Presidente Joseph Fielding Smith, ti panagtungpal iti katulagan ket maysa a wagas a panangyebkas iti panagayattayo para iti di matukod, awan patinggana a Pannubbot ti Mangisalakan ken Mannubbottayo ken ti naan-anay nga ayat ti Amatayo iti Langit” (“The Power, Joy, and Love of Covenant Keeping,” Liahona, Nob. 2013, 114).
Panangpadur-as iti Panangisurotayo
Dumngeg. “Ti panagdengngeg timaysa nga aramid ti ayat. … Dawatem iti Nailangitan nga Ama a tulongannaka a makaawat no ania ti sawen dagiti miembro ti klasem. Kabayatan ti panangikasom a nasayaat kadagiti maisao ken saan a maisao a mensaheda, ad-adda a maawatamto dagiti kasapulanda, pakaseknanda, ken tarigagayda” (Panangisuro iti Wagas ti Mangisalakan,34).