Panangiladawan ken ni Debora a mangidadaulo kadagiti buyot ti Israel, © Lifeway Coleksion/licensed from goodsalt.com

Mayo 30–Hunio 5

Uk-ukom 2–4; 6–8; 13–16

“Ni Jehova Namangon iti Mangisalakan”

Laglagipem a ti Espiritu Santo ti kapatgan a mannursuro. Kasano a matulongam dagiti miembro ti klase a masuruan ti Espiritu Santo bayat ti panangilawlawagmo kadagiti kinapudno manipud iti libro ti Uk-ukom?

Isuratmo dagiti Impresionmo

Yawis ti Panagbibinninglay

Isurat iti pisarra ti nagnagan dagiti nagan ti sumagmamano nga ukom a masarakan iti Uk-ukom 2–4; 6–8; 13–16 (kas kada Debora, Barak, ni Gideon, ken Samson). Mangted kadagiti miembro ti klase iti sumagmamano a minuto a mangrebyu kadagitoy a kapitulo ket mangisurat iti baba dagiti nagan iti pisarra iti maysa a kinapudno a nasursuroda manipud ti padas dayta a tao.

Isuro ti Doktrina

Uk-ukom 2:11–19; 3:5–12; 4:1–16

Idiaya ti Apo ti pannakaisalakan no agsardengtayo nga agtulnog kadagiti bilinna.

• Ti panangamiris iti siklo [cycle] ti panagsukir, panagladingit, panagbabawi, ken pannakaisalakan ti Israel ket makatulong kadagiti miembro ti klase a mangbigbig iti bileg ti Dios iti pannakaisalakan iti bukodda a biag. Mabalin dagiti miembro iti klase nga agtrabaho iti babassit a grupo a mangsarak iti siklo a nailadawan iti Uk-ukom 2:11–19; 3:5–12. Kasano a naisalakan dagiti annak ti Israel manipud iti sikloda iti basol ken panagsagaba? Ania ti masursurotayo manipud iti libro ti Uk-ukom maipapan no kasano a makapaglibastayo manipud iti basol ken panagsagaba? Ania dagiti sumagmamano a wagas a maisalakannatayo ti Dios? Mabalinmo pay nga awisen dagiti miembro ti klase a mangsarak ken mangibinglay kadagiti nasantuan a kasuratan a mangipaneknek iti Apo a kas Mangisalakan ken Mannubbottayo (kas pagarigan, 2 Samuel 22:1–3; Salmo 40:16–17; 1 Nephi 1:19–20; Mosiah 23:21–23; Doktrina ken Katulagan 138: 23).

• Naisurat itiUk-ukom 2:19 nga inulit-ulit dagiti Israelita ti timmallikud manipud iti Dios para iti panagrukbab kadagiti didiosen. Nalabit a mabalin a gupgopen dagiti miembro ti klase daytoy a bersikulo iti maysa a kita ti pammallaag para iti bagbagida. Iti ania a wagwagas a no dadduma intayo “agruknoy” iti “sabsabali a didiosen”? Kasano a makatulong kadatayo ti Apo a mangbalbaliw iti “natagengteng a dalantayo”?

• Tapno mangirugi iti maysa a panaglilinnawag maipapan no kasano nga insalakan da Debora ken Barak ti Israel manipud kadagiti Cananeo, mabalinmo nga idawat iti maysa a miembro ti klase a gupgopen ti estoria para iti klase (mabalin a makatulong a kontaken ti miembro iti klase iti sumagmamano nga aldaw a nasapsapa tapno makapagsagana). Mabalin nga agsarita ti klase maipapan kadagiti kababalin ni Debora a nakaawis iti riknada. Kasano a naparegta ni Debora dagiti annak ti Israel a sumurot iti Apo? Nalabit a mabalinyo a basaen nga aggigiddan ti Uk-ukom 4:14 ket paglilinnawagan ti kaipapanan ti napudno a panangisao ni Debora iti: “Saan aya a ni Jehova rimmuar ita sangom?” Kasano a rummuar ti Apo iti sangotayo? (kitaen met iti Doktrina ken Katulagan 84:87–88).

Uk-ukom 6–8

Makaaramid ti Apo kadagiti milagro no agtalektayo kadagiti wagasna.

• Ti panangadal iti awag ni Gideon nga agserbi ket mabalin a mangparegta kadagiti miembro ti klase iti bukodda a serbisio. Mabalinmo a kiddawen kadakuada a mangbasa ken paglilinnawaganda ti Uk-ukom 6:11–16. Ania ti masursurotayo manipud iti daytoy a padas? Tapno matulongan ida a makasursuro manipud iti Uk-ukom 7, mabalinmo nga awisen ti maysa wenno ad-adu pay a miembro ti klase nga agpammarang a soldado ni Gideon ket isaritada ti estoria manipud iti pannirigan dagiti soldado. Mabalin nga agdamag dagiti dadduma pay a miembro ti klase kadagiti saludsod maipapan iti padas dagiti soldado. Ania dagiti pagpapadaan a makitatayo iti nagbaetan daytoy nga estoria ken ti mapaspasamak iti biagtayo? Ania ti masursurotayo maipapan iti Apo manipud iti daytoy nga estoria?

Uk-ukom 13–16

Sumangbay ti pigsa manipud iti kinapudno kadagiti katulagantayo iti Dios.

• Kasano a matulongam dagiti miembro ti klase a mangtakuat kadagiti agpada a makaparegta a kinapudno ken napapateg a ballaag manipud iti estoria ni Samson? Maysa a wagas ket mabalin a panangawis iti kagudua ti klase a mangrebyu iti Uk-ukom 14–16 a mangsapsapul kadagiti bersikulo a mangipakita a kadua ti Apo ni Samson. Mabalin a sapulen ti sabali a pay a kagudua ti klase dagiti bersikulo a mangipakita a saan a naan-anay a nagkumit ni Samson iti Apo. Idawat kadagiti miembro ti klase a mangibinglay no ania ti nasarakanda. Ania ti isuro kadatayo ti panagbiag ni Samson maipapan iti panagtungpal kadagiti katulagan nga aramidentayo iti Dios? Ti palawag ni Sister Ann M. Dibb iti “Dagiti Nainayon a Resources” ket mabalin a makatulong.

  

  Tinulid ni Samson dagiti Adigi, ni James Tissot ken dagiti dadduma

Dagiti Nainayon a Resources

Maysa a leksion manipud iti biag ni Samson.

Insuro ni Sister Ann M. Dibb: “Nayanak ni Samson nga addaan iti naindaklan a kabaelan. Naikari iti inana, ‘Rugiannanto nga ispalen ti Israel iti ima dagiti Filisteos’ [Uk-ukom 13:5]. Ngem bayat ti panagdakkell ni Samson, ad-adda a nagsapul kadagiti pannulisog iti lubong ngem iti pangiturong ti Dios. Nagaramid kadagiti pili gapu ta ‘pinagrayo[da] [isuna] unay’ [Uk-ukom 14:3] imbes a gapu ta umno dagita a pili. Inulit-ulit, nga usaren dagiti nasantuan a kasuratan ti ragup ti balikas a ‘ket isu simmalog’ [Uk-ukom 14:7] bayat ti panangisaritada maipapan kadagiti panagdaliasat, tignay, ken pili ni Samson. Imbes a bumangon ken lumatak a mangipatungpal iti naindaklan a kabaelanna, pinarmek ti lubong ni Samson, napukawna ti bilegna nga inted ti Dios, ken natay iti maysa a nakaam-ames nasapa nga ipapatay” (“Arise and Shine Forth,” Liahona, Mayo 2012, 118).

Panangpadur-as iti Panangisurotayo

Mangilatang iti oras a makaibinglay dagiti agad-adal. “No ibinglay dagiti agad-adal no ania ti nasursuroda, saanda laeng a marikna ti Espiritu ken mapapigsa dagiti bukodda a pammaneknek, no di ketdi maallukoyda pay dagiti miembro ti klase a mangtakuat kadagiti kinapudno para iti bagbagida. … Mangilatang iti oras a pakaibinglayan ti estudiante iti tunggal adalen.” (Panangisuro iti Wagas ti Mangisalakan,20.)