Sadino Man ti Papanam, ni Sandy Freckleton Gagon

Hunio 6–12

Ruth; 1 Samuel 1–3

“Ti Pusok Agrag-o ken Jehova”

Napateg ti agbalin a nakasagana a mangisuro, ngem siguraduem a mairaman kadagiti planom ti panangted kadagiti miembro ti klase kadagiti gundaway a mangibinglay no ania ti nasursuroda.

Isuratmo dagiti Impresionmo

Yawis ti Panagbibinninglay

Tapno maallukoy dagiti miembro ti klase a mangibinglay no ania ti nasursuroda itoy a lawas, mabalinmo nga awisen ida a mangisurat iti pisarra iti maysa a balikas wenno ragup ti balikas manipud iti Ruth 1–4 wenno 1 Samuel 1–3 a nangparegta kadakuada bayat ti bukod wenno sangapamiliaan a panagadalda. Basaem ti sumagmamano iti napigsa, a mangidawdawat kadagiti miembro ti klase a mangibinglay no kasano a pinaregta ida dagitoy a balikas ken ragup ti balikas.

Isuro ti Doktrina

Ruth; 1 Samuel 1–2

Mapagbalin ni Cristo a balligi ti trahedia.

• Nupay addaan dagiti miembro ti klase kadagiti bukodda a pannubok a maigiddiat kadagiti pannubok da Ruth ken Anna, mabalin a makasursuroda manipud kadagiti wagas a panagresponde dagitoy napudno a babbai iti pannakapukaw ken panagladingit. Tapno matulongan ida a mangaramid iti daytoy, mabalinmo a bingayen ti klase iti babassit a grupo ket awisem ti tunggal grupo a mangbasa iti maysa a kapitulo manipud iti Ruth 1–4 wenno 1 Samuel 1. Iti pisarra, mabalinmo nga isurat dagiti saludsod kas kadagitoy: Ania dagiti pannubok a nakaipaspasanguan da Ruth ken Anna? Kasano nga impakitada ti panagtalekda iti Apo kabayatan dagiti pannubokda? Mabalin a mangsapul dagiti grupo kadagiti sungbat iti maysa wenno ad-adu pay kadagiti saludsod ken mangibinglay no ania ti nasarakanda. Ania ti masursurotayo manipud kadagitoy a pakaammuan maipapan iti no kasano a makatulong ti Apo kadatayo kadagiti pannuboktayo?

  

  Gapu Itoy nga Ubing Nagkararagak, ni Elspeth Young

• Saan nga amin nga agkararag para iti maysa nga anak ti umawat iti maysa, ken saan nga amin a natay ti asawana ti makikallaysa manen. Ngem dagiti bukodtayo a karit, ania man dagitoy, ket mabalin a gundaway tapno umasideg iti Mangisalakan ken papigsaentayo ti pammatitayo Kenkuana. Mabalinmo nga idawat kadagiti miembro ti klase a mangbasa iti Ruth 2:11–12 ken 1 Samuel 1:9–11 ket isaritada maipapan no kasano nga inaringan dagiti pannubok da Ruth ken Anna dagiti pagnaiganda iti Apo. Mabalin met nga ibinglay dagiti miembro ti klase no kasano a napatibker ti bukodda a pammati gapu ta immasidegda ken ni Jesucristo kabayatan dagiti panawen ti pannubok.

  Tapno masuportaran daytoy a panaglilinnawag, mabalinmo nga awisen ti maysa wenno ad-adu pay a miembro ti klase nga umay a nakasagana a mangibinglay kadagiti nalawag a pannakaammo ken pannakaawat (insights) manipud iti maysa kadagiti sumaganad: Ti mensahe ni Sister Reyna I. Aburto “Babaen ti Ulep ken Raniag ti Init, Apo, Agtalinaedka Kaniak!” (Liahona, Nob. 2019, 57–60); ti benneg a napauluan iti “Ti Rag-o ti Panangparmek babaen ken ni Cristo” manipud iti mensahe ni Elder D. Todd Christofferson a “Ti Rag-o dagiti Santo” (Liahona, Nob. 2019, 16–17); wenno dagiti balikas ni Presidente Elaine S. Dalton iti “Dagiti Nainayon a Resources.” Kiddawem kadagiti miembro ti klase a mangibinglay no ania ti nasursuroda maipapan iti no kasano a makapagbalin dagiti pannuboktayo a gundaway para iti nain-indaklan a pammati ken ni Jesucristo.

1 Samuel 2:18–36; 3

Nasken a denggen ken tungpalentayo ti timek ti Apo.

• Mabalin nga adda dagiti tao iti klasem a, kas ken ni Samuel, nangngegdan ti timek ti Apo ngem saanda idi a nailasin daytoy titimekna. Mabalinmo nga awisen dagiti miembro ti klase a mangrebyu iti 1 Samuel 3, a mangsapsapul no ania ti inaramid ni Samuel a makatulong kadatayo kadagiti panagkagumaantayo a dumngeg ken agtungpal iti timek ti Apo. Mabalinmo pay nga idawat iti dua a miembro ti klase a mangtulad kadagiti interaksion da Samuel ken Eli.

• No dadduma matakuatantayo ti bagbagitayo iti maysa a situasion kas ken ni Eli—addaantayo iti gundaway a mangtulong iti maysa a tao a mangilasin iti timek ti Apo. Nalabit a makaibinglay dagiti miembro ti klase no kasano nga inaramidda daytoy para kadagiti gagayyem, miembro ti pamilia, wenno dadduma pay. Ania dagiti nasantuan a kasuratan wenno padas a naibinglaytayo a mangtulong kadagiti dadduma a makaawat no kasano a makisao ti Apo kadatayo? (kitaen, kas pagarigan, iti Doktrina ken Katulagan 6:22–23; 8:2–3; 9:7–9).

Dagiti Nainayon a Resources

Saantayo iti kaano man nga agmaymaysa.

Insuro ni Presidente Elaine S. Dalton:

“Ti panagdaliasat iti biag no dadduma iturongnatayo kadagiti dana a saan a ninamnama. Adda dagiti saan a ninamnama a pasamak iti biagtayo. Ngem babaen iti tunggal maysa kadagitoy a pasamak adda met gundaway—gundaway nga agpili iti sungbattayo ken planotayo nga agtignay. Makapagbalin dagiti rigat ti panagbiag a gundaway a mangtulong kadatayo nga umas-asideg iti Mangisalakan ken agtalek Kenkuana a naan-anay. Iti wagas ti panagbiag nga asideg Kenkuana iti inaldaw, mapadur-astayo dagiti galad ken kababalin a kas ken Cristo. …

“Kas kada Ruth ken Anna, mapadasantayonto amin ti rigat. Mabalin a saantayo man a maawatan a kanayon ti plano ti Apo para iti biagtayo, ngem daytoy ti pammaneknekko a saantayo iti kaano man nga agmaymaysa. Kanayon a kaduaennatayo, ket ikarina kadatayo, ‘Diyo makita iti gagangay a matayo, iti agdama a panawen, ti panggep ti Diosyo maipanggep kadagitoy a banag a dumtengto kalpasan daytoy a biag, ken ti gloria a sumarunonto kalpasan ti adu a panagtutuok’ [Doktrina ken Katulagan 58:3]” (“Lessons from Ruth and Hannah,” Ensign, Abr. 2006, 35, 37).

(Kitaen met iti Juan 14:18; Alma 38:5.

Panangpadur-as iti Panangisurotayo

OK laeng nga isao ti “Diak ammo.” Idinto a nasken nga ikarigatam iti amin a kabaelam a sumungbat iti saludsod dagiti miembro ti klasem, saan a namnamaen ti Apo nga ammom ti amin a banag. No saanmo nga ammo no kasano a sungbatam ti maysa a banag, annugotem dayta ken mangiburayka iti napudno a pammaneknek maipapan iti no ania ti ammom. (Kitaen iti 1 Nephi 11:16–17; Panangisuro iti Wagas ti Mangisalakan,24.)