Naitrono ni Ari David, ni Jerry Milia Harston

Hunio 20–26

2 Samuel 5–7; 11–12; 1 Ar-ari 3; 8; 11

“Maipasdekto ti Pagariam iti Agnanayon”

Bayat ti panangadalmo kadagiti nasantuan a kasuratan, sikakararag nga agkalikagumka a mangammo no ania dagiti pagbatayan a kangrunaanto a napateg kadagiti miembro ti klase tapno maipamaysamto dagiti kasapulanda.

Isuratmo dagiti Impresionmo

Yawis ti Panagbibinninglay

Tapno maammuan no ania ti nasarakan dagiti miembro ti klase a napateg iti panagadalda iti nasantuan a kasuratan, mabalinmo nga idawat kadakuada nga isurat ti pagibasaran para iti maysa a binatog a nangparegta kadakuada kadagiti babassit a papel ket kalpasanna ikabil dagiti papel iti maysa a container. Kalpasanna mabalin a pumili dagiti miembro ti klase iti papel manipud iti container, ket mabalin a basaen ken paglilinnawagan ti klase dagiti binatog.

Isuro ti Doktrina

2 Samuel 5:1–8

Nasken nga aramidentayo ti trabaho ti Dios iti wagasna.

• Mabalinmo nga idawat kadagiti miembro ti klase a mangbasa iti 2 Samuel 6:1–8 ket ibilangmo no ania dagiti ballaag a mabalin nga ipaay daytoy nga estoria kadatayo iti agdama. Ti palawag ni Brigham Young iti “Dagiti Nainayon a Resources” ti makatulong. Ania dagiti sumagmamano a wagas a mabalintayo a padasen nga aramiden ti trabaho ti Dios iti maysa a wagas malaksid iti no kasano nga inturongna? Apay a napeggad daytoy? Nalabit a mabalin nga ibinglay dagiti miembro ti klase dagiti padas a nakasursuruanda nga agtalek iti panangiturong nga ited ti Apo para iti pannakaipatungpal ti aramidna.

2 Samuel 11

Nasken a kanayontayo a nakaalerto ken nakasagana a makiranget a maibusor iti basol.

• Ti panagsursuro manipud kadagiti nakaladladingit a pili ni David a naisurat iti 2 Samuel 11 ti makatulong kadatayo a mangliklik kadagiti kasta met la a biddut. Nalabit a mabalin nga aggigiddan a basaen ti klase ti 2 Samuel 11:1–17 ket lasinenda dagiti pili nga inaramid ni David a nangiturong kenkuana nga agbasol. Ania koma ti maiduma nga inaramid ni David? Mabalinmo pay nga idawat kadagiti miembro ti klase a mangisurat iti maysa a binatog a makatulong a mangparegta iti maysa a tao tapno maliklikan ti basol, a maibatay iti no ania ti nasursuroda manipud iti 2 Samuel 11. Awisem ti sumagmamano a miembro ti klase a mangibinglay kadagiti kapanunotanda.

• Mabalinmo nga usaren ti 2 Samuel 11 a paglilinnawagan dagiti peggad ti pornograpia ken dadduma pay a seksual a basol. Tapno maaramid daytoy, mabalin nga aggigiddan nga irebyu ti klase ti paset ti mensahe ni Elder L. Whitney Clayton a “Blessed Are All the Pure in Heart” (Liahona, Nob. 2007, 51–53). Ania a balakad ti ited ni Elder Clayton maipapan kadagiti pagpeggadan ti pornograpia? Mabalinyo pay a buyaen ti video “To Look Upon” (ChurchofJesusChrist.org Kasano a makatulong kadatayo ti Mangisalakan a mangparmek kadagitoy a pannulisog wenno tignay?

  Nalabit a mabalin nga ibinglay dagiti miembro ti klase dagiti kapanunotan a nasarakanda kadagiti panagkagumaanda a mangsalaknib kadagiti pamiliada manipud iti pornograpia wenno mangparmek kadagiti epekto ti pornograpia. Makatulong ti Mensahe ni Sister Linda S. Reeves a “Protection from Pornography—a Christ-Focused Home” (Liahona, Mayo 2014, 15–17; kitaen met iti “Dagiti Nainayon a Resources”).

Ti templo ti balay ti Apo.

1 Ar-ari 8:22–61

Mangisangbay dagiti templo kadagiti bendision.

• Iladawan ti1 Ar-ari 8 dagiti bendision a kinalikaguman a gun-oden ni Solomon para kadagiti taona idi naileppas ti templo. Mabalinmo a bingaybingayen dagiti bersikulo 22–61 kadagiti miembro ti klase ket kiddawem kadakuada a mangibinglay iti maysa a banag a masarakanda kadagiti bersikuloda a mangparegta kadakuada iti panagdaydayawda iti templo. Mabalin nga ibinglay dagiti miembro ti klase no kasano a binendisionan ti biagda ti panagdaydayawda iti balay ti Apo.

1 Ar-ari 8:61; 11:1–11

“Ti pusona napalongdo koma ken Jehova.”

• Ania ti kayat a sawen ti “ti puso[tayo] napalongdo koma ken Jehova”? (1 Ar-ari 8:61). Maigiddiat kadi dayta manipud kadagiti tignaytayo nga agbalin a perpekto? Kasano a kastoy? Bayat ti panangutob dagiti miembro ti klase kadagitoy a saludsod, mabalinda a basaen ti 1 Ar-ari 11:1–11 ket kitaen no ania ti kuna ti Apo maipapan iti puso ni Solomon. Kasano a maliklikantayo dagiti biddut a naaramidna?

Dagiti Nainayon a Resources

Mangtimbeng iti daong.

Insuro ni Presidente Brigham Young: “Bay-an koma ti Pagarian, ti Apo ti mangtimbeng iti daong; ket no aggunay, ket agparang a kasapulan a matimbeng, no pumaigid wenno mangliklik iti dalan no dadduma, ket iti amin a langa nakadadanag a marba ti daong ti katulagan, agannad iti panangtengngel ti imam a mangtimbeng iti daytoy; saantayo koma nga agbalin a mannakibiang kadagiti saantayo a pakaseknan; bay-an a kasta, dayta ti aramid ti Apo” (Discourses of Brigham Young, sel. John A. Widtsoe [1954], 66).

Panangsalaknib kadagiti pamilia iti pornograpia.

Insuro ni Sister Linda S. Reeves: “Kasano a salaknibantayo dagiti ubbing ken agtutubotayo? Napateg a ramit dagiti filter, ngem ti kadakkelan a filter iti lubong, ti kakaisuna a gumananto iti kamaudianan, ket ti bukod nga akin-uneg a filter nga aggapu iti nauneg ken agtalinaed a pammaneknek iti ayat ti Nailangitan nga Amatayo ken ti pangsubbot a sakripisio ti Mangisalakantayo para iti tunggal maysa kadatayo” (“Protection from Pornography—a Christ-Focused Home,” Liahona, Mayo 2014, 16; kitaen met iti Joy D. Jones, “Addressing Pornography: Protect, Respond, and Heal,” Ensign, Okt. 2019, 22–27).

Panangpadur-as iti Panangisurotayo

Siguraduem a mangisursuroka iti pudno a doktrina. “Agtultuloy a saludsodem iti bagim, ‘Kasano a matulonganto ti isursurok dagiti miembro ti klasek a mangbukel iti pammatida ken ni Cristo, agbabawi, agaramid ken agtungpal kadagiti katulagan iti Dios, ken umawat iti Espiritu Santo?’” (Panangisuro iti Wagas ti Mangisalakan, 20).