“Hunio 27–Hulio 3. 1 Ar-ari 17–19: ‘No ni Jehova Isu ti Dios, Sumurotkayo Kenkuana,’” Umaykayo, Sumurot Kaniak—Para iti Sunday School: Daan a Tulag 2022 (2021)
“Hunio 27–Hulio 3. 1 Ar-ari 17–19,” Umaykayo, Sumurot Kaniak—Para iti Sunday School: 2022
Supiaten ni Elias dagiti Saserdote ni Baal, ni Jerry Harston
Hunio 27–Hulio 3
1 Ar-ari 17–19
“No ni Jehova Isu ti Dios, Sumurotkayo Kenkuana”
Ti panggep dagiti nasantuan a kasuratan—ken ti klasem—ket mangbukel iti pammati iti Nailangitan nga Ama ken ni Jesucristo. Bay-am a daytoy a panggep ti mangiwanwan kadagiti pangngeddeng nga aramidem maipapan iti no ania ti isuro ken no ania dagiti saludsod a damagen.
Isuratmo dagiti Impresionmo
Yawis ti Panagbibinninglay
Tapno matulongan dagiti miembro ti klase a mangibinglay kadagiti nalawag a pannakaammo ken pannakaawat maipapan iti 1 Ar-ari 17–19, mabalinmo nga awisen ida a mangpanunot iti maysa a paulo para iti tunggal maysa kadagitoy a kapitulo. Ania dagiti bersikulo a namangpanunot kadakuada maipapan kadagitoy a paulo?
Isuro ti Doktrina
Maysa a gundaway a pakaaramatan ti pammatitayo ti awis nga agsakripisio.
-
Ti pagwadan ti balo ni Zarepat ti mabalin a mangparegta kadagiti miembro ti klasem kabayatan dagiti panawen no masubok ti pammatida. Mabalinmo ti mangrugi babaen ti panangkiddaw kadakuada a mangilista kadagiti pili nga agkasapulan iti pammati ken ni Jesucristo. Kalpasanna mabalinda a basaen ti pakaammuan iti 1 Ar-ari 17:8–16 ken agsarita maipapan iti no ania ti isuro kadakuada daytoy nga estoria maipapan iti panangaramat iti pammati. Allukoyem dagiti miembro ti klase a mangibinglay iti riknada maipapan iti balo a babai ken no kasano a mangparegta ti pagwadanna kadakuada a mangaramat iti pammatida. Kasano a maipada ti pammatina iti pammati nga impakita ni Eliseo iti 1 Ar-ari 19:19–21? Nalabit nga agtallugod dagiti miembro ti klase a mangibinglay kadagiti sakripisio nga inaramidda para iti Apo ken no kasano a binendisionanna ida.
-
Matulongannatayo pay ti estoria ti balo ni Zarepat maipapan kadagiti bendision a sumangbay manipud iti sakripisio. Mabalinmo nga idawat kadagiti miembro ti klase a mangutob no kasano ti panagrespondeda kadagiti binatog kas kadagitoy: “Diak kabaelan ti agbayad iti apagkapullo” wenno “Makumikomak la unay nga umawat iti pagrebbengan iti ministering.” Ania ti isuro kadatayo ti 1 Ar-ari 17:8–16 a mabalin a mayaplikar kadagitoy a binatog? Kasano a matulongannatayo ti pannakaammotayo iti Mangisalakan no naidawat kadatayo nga agaramid kadagiti sakripisio? Makatulong pay dagiti balikas ni Elder Lynn G. Robbins iti “Dagiti Nainayon a Resources”.
“No ni Jehova Isu ti Dios, sumurotkayo kenkuana.”
-
Ti maysa a panaglilinnawag maipapan iti 1 Ar-ari 18:17–39 ti makatulong kadagiti miembro ti klase nga agbalin nga ad-adda a managikumit iti panangsurot ken ni Jesucristo ken panagtalek Kenkuana. Kalpasan ti panangrebyu iti estoria iti klase, mabalinmo nga isurat iti pisarra ti saludsod a dinamag ni Elias kadagiti tao ti Israel: “Agpapan kaano ti panagalla-allayo iti dua a panunot?” (bersikulo 21). Paibinglay kadagiti miembro ti klase no ania ti mariknada a kayat a sawen daytoy a saludsod. Ania dagiti sumagmamano a gapu ti mabalin a “panagsardeng” (a mabalin a kayatna a sawen ti panagkedked, panagduadua, wenno panagkapsut) dagiti tao iti panagsurot iti Apo ken panagsurot ken ni Baal? Apay a no dadduma saantayo a makaikeddeng maipapan iti panangsurot ken ni Jesucristo? Mabalin nga ibinglay dagiti miembro ti klase dagiti padas a nakatulong kadakuada a nangpili a nangsurot iti Mangisalakan.
Maysa a simboliko a pannakailadawan ti 1 Ar-ari 19:11–12. Ti Propeta, © Robert Booth Charles/Bridgeman Images
Masansan nga agsao ti Apo kadagiti naulimek, gagangay a wagas.
-
Adu a tao ti agkarigatan a mangilasin no makisarsarita ti Apo kadakuada. Tapno matulongan dagiti miembro ti klase a nasaysayaat a mangilasin iti timek ti Apo, mabalinmo nga awisen ida a mangbasa iti 1 Ar-ari 19:1–12 ket mangibinglay no ania ti nasursuro ni Elias. Nalabit a mabalin nga ibinglay dagiti miembro ti klase kadagiti padas a nakaisuro kadakuada maipapan kadagiti nadumaduma a wagas a makisarita ti Apo kadakuada. Mabalin a kayatmo nga ibinglay ti video “How Can I Feel the Holy Ghost More Often?” (manipud iti “Face to Face with President Eyring and Elder Holland” [worldwide youth broadcast, Mar. 4, 2017], ChurchofJesusChrist.org).
-
Tapno matulongan ti nadaras a panaglilinnawag maipapan iti ragup ti balikas a “naalumamay a bassit a timek,” mabalinmo nga i-display dagiti banag (wenno dagiti ladawan dagiti banag) a mabalin a makatulong kadagiti miembro ti klase a mangutob iti ragup ti balikas. Mabalin a mangisingasing dagiti miembro ti klase iti dadduma pay a pagarigan. Apay a dagiti balikas a “naalumamay” ken “babassit” ti nasayaat a wagas a mangiladawan iti timek ti Espiritu? Para iti dadduma pay a pannakailadawan, mabalin a basaen dagiti miembro ti klase ti nasantuan a kasuratan kas iti Helaman 5:30; 3 Nephi 11:3–7; Doktrina ken Katulagan 6:22–23; 8:2–3; 9:8–9; 11:12–14; 36:2. Mabalin nga ibinglayda ti dadduma pay a nasantuan a kasuratan maipapan iti panangilasin iti Espiritu. Ania ti isingasing dagitoy a nasantuan a kasuratan maipapan iti no ania ti nasken nga aramidentayo tapno mangngegan ti timek ti Apo? Makatulong dagiti video “Feeling the Holy Ghost” wenno “Voice of the Spirit” (ChurchofJesusChrist.org).
Dagiti Nainayon a Resources
Ti balo ni Zarepat.
Kinuna ni Elder Lynn G. Robbins: “Naawatan ni Elias ti doktrina nga umay dagiti bendision kalpasan ti pannakasubok ti pammatitayo [kitaen iti Ether 12:6; Doktrina ken Katulagan 132:5]. Saan a managimbubukod Isuna. Kas babaonen ti Apo, adda sadiay ni Elias a mangted, saan a mangala [kitaen iti 1 Ar-ari 17:13–16]. … Maysa a gapu ti panangiladawan ti Apo kadagiti doktrina nga addaan kadagiti kadadagsenan a kasasaad ket panangikkat kadagiti pambar. No namnamaen ti Apo uray pay ti kapapanglawan a balo nga agbayad iti sentimona, ania ti ibati dayta dayta iti dadduma a mangipagarup a saan a mainugot wenno nalaka nga isakripisio?” (“Tithing—a Commandment Even for the Destitute,” Liahona, Mayo 2005, 35).
Panangpadur-as iti Panangisurotayo
Agbalin a maysa a napakumbaba a ramit ti Espiritu. “Panggepmo kas maysa a mannursuro ti saan a mangidatag iti maysa a napintas a presentasion ngem ketdi tapno makatulong iti dadduma nga umawat iti impluensia ti Espiritu Santo, nga isu ti pudno a mannursuro” (Panangisuro iti Wagas ti Mangisalakan, 10).