“Hulio 4–10. 2 Ar-ari 2–7: ‘Adda Maysa a Propeta iti Israel,’” Umaykayo, Sumurot Kaniak—Para iti Sunday School: Daan a Tulag 2022 (2021)
“Hulio 4–10. 2 Ar-ari 2–7,” Umaykayo, Sumurot Kaniak—Para iti Sunday School: 2020
Panangiladawan ken ni Eliseo a mangipakpakita iti adipenna iti luglugan nga apuy, © Review & Herald Publishing/licensed from goodsalt.com
Hulio 4–10
2 Ar-ari 2–7
“Adda Maysa a Propeta iti Israel”
Bayat ti panagsaganam a mangisuro, basaem ti 2 Ar-ari 2–7 nga agkakalikaguma manggun-od iti pammaregta para iti bukodmo a biag. Kalpasanna denggem dagiti parikna maipapan kadagiti mensahe a mangbendision kadagiti miembro ti klasem.
Isuratmo dagiti Impresionmo
Yawis ti Panagbibinninglay
No dadduma kasapulan dagiti miembro ti klase ti oras a mangrebyu biit kadagiti kapitulo a basaenda sakbay a mabalinda nga ibinglay dagiti nalawag a pannakaammo ken pannakaawat manipud iti bukodda a panagadal iti nasantuan a kasuratan. Padasem ti mangted iti sumagmamano a minuto para iti daytoy iti rugi ti klase; kalpasanna awisem dagiti miembro ti klase a mangibinglay iti maysa a banag a nasursuroda.
Isuro ti Doktrina
Makaaramid ti Dios kadagiti milagro iti biagtayo.
-
Bayat ti panangilawlawagmo kadagiti milagro iti 2 Ar-ari 2–6, mabalin a makatulong a kiddawem kadagiti miembro ti klase a mangilawlawag iti kaipapanan ti balikas a milagro. Mabalinmo nga ibinglay daytoy a nalawag a pannakaammo ken pannakaawat manipud ken ni Presidente Howard W. Hunter: “Dagiti [milagro] ket ti panangipakita iti bileg ti [Dios] a ditayo kabaelan nga ilawlawag wenno naan-anay a maawatan. … Dagitoy a milagro ken pagsisiddaawan ket kangrunaan a pakakitaan iti biag ken panagministro ni Jesucristo, ti mismo nga Anak ti Dios. Ngem makapakellaat ken napnuan iti pagsidsiddaawan dagita, dagiti adu a milagro ni Cristo ket mangyanninaw laeng kadagiti daddadakkel a milagro nga impakita ti Amana kenkuana ken agtultuloy nga aramidenna amin iti aglawlawtayo. … Addanto a kanayon dagiti adu a milagro no addaantayo kadagiti mata a kumita ken kadagiti lapayag nga agdengngeg” (“The God That Doest Wonders,” Ensign, Mayo 1989, 15–16). Kasano a matulongandatayo dagitoy a nalawag a pannakaammo ken pannakaawat a mangkita iti bileg ti Dios iti biagtayo?
-
Ibilangmo ti panangkiddaw kadagiti miembro ti klase a mangilista kadagiti milagro a nailadawan iti 2 Ar-ari 2–6. Ania ti masursurotayo maipapan iti Apo manipud kadagitoy a milagro? Mabalin pay nga agsarita dagiti miembro ti klase maipapan kadagiti milagro—dadakkel wenno babassit—a napadasanda wenno napadasan dagiti pamiliada. Kasano a nasaysayaat a mabigbigtayo dagiti milagro ti Dios iti biagtayo—agraman dagiti maigidiat iti no ania ti ninamnamatayo?
-
Mabalin a makita dagiti miembro ti klase a makaparegta nga idilig ti sumagmamano kadagiti milagro nga inaramid ni Eliseo iti sumagmamano nga inaramid ni Jesucristo (kitaen iti 2 Ar-ari 4:8–37 ken Lucas 7:11–16; 2 Ar-ari 4:42–44 ken Juan 6:1–13; 2 Ar-ari 5:1–15 ken Lucas 17:11–19). Ania ti isuro dagitoy a bersikulo kadatayo maipapan iti Mangisalakan ken dagiti propetana?
No napakumbaba ken natulnogtayo, maagasannatayo ni Jesucristo.
-
Maysa nga adalen a masursurotayo manipud iti panangagas iti kukutel ni Naaman ket ti kinapateg ti kinapakumbaba. Tapno mangirugi iti panaglilinnawag, mabalinmo nga isurat iti pisarra ti kinapannakkel ni Naaman ken kinapakumbaba ni Naaman. Mabalin a sukisoken dagiti miembro ti klase ti 2 Ar-ari 5:1–19 ket isuratda iti pisarra dagiti ragup ti balikas a mangiladawan iti kinapannakkel wenno kinapakumbaba ni Naaman. Kasano a maipadatayo no dadduma ken ni Naaman? Kasano a maipadatayo no dadduma kadagiti adipenna? Kasano a naammuantayo no ania ti naammuan ni Naaman?
-
Sabali pay nga adalen a masursurotayo manipud iti daytoy nga estoria ket ti pateg ti panagtungpal iti Dios iti babassit a banag. Mabalinmo nga irugi babaen ti panangbasam iti 2 Ar-ari 5:9–12 ken panagkiddaw iti kapanunotan dagiti miembro ti klase maipapan no apay a ni Naaman “pimmanaw a siluluksaw” (bersikulo 12). Apay a kaykayattayo nga aramiden ti “sumagmamano a dadakkel a banag” a kiddawen ti Dios kadatayo, imbes a dagiti gagangay a banag? (bersikulo 13). Ania ti pateg ti panangaramid kadagitoy gagangay a banag?
“Ta ad-aduda dagiti adda kadatayo ngem kadagiti adda kadakuada.”
-
Addaantayo amin iti kanito a mariknatayo ti panagmaymaysa wenno panagbuteng. Ibilang no kasano a makatulong ti panangilawlawag iti pakaammuan iti 2 Ar-ari 6:8–23 kadagiti miembro ti klase a makarikna iti kastoy. Mabalinmo a rugian babaen iti gagangay a panangkiddaw kadagiti miembro ti klase no ania ti nakaawisan ti riknada maipapan kadagitoy a bersikulo. Mabalinda pay nga ibinglay dagiti padasda idi “linuktan ti Apo dagiti mata[da]” (bersikulo 17) ket nakatulong kadakuada a makita a saanda nga agmaymaysa (kitaen met iti “Dagiti Nainayon a Resources”). Kasano a matulongantayo ti tunggal maysa a “di agbuteng”? (bersikulo 16).
Dagiti Nainayon a Resources
“Luktan dagiti naespirituan a matatayo.”
Iti panangibasar iti pakaammuan iti 2 Ar-ari 6:8–23, kinuna ni Elder Ronald A. Rasband:
“Mabalin nga awanantayo man iti luglugan nga apuy a naibaon tapno mangpukaw kadagiti butengtayo ken mangparmek kadagiti demoniotayo, ngem nalawag ti adalen. Adda ti Apo kadatayo, pampanunotennatayo ken bembendisionannatayo kadagiti wagas nga Isu laeng ti makaaramid. Kabaelan ti kararag nga idawat dagiti pigsa ken paltiing a kasapulantayo tapno ipamaysa ti pampanunottayo ken ni Jesucristo ken iti pangsubbot a sakripisiona. Ammo ti Apo a no dadduma mariknatayo ti agbuteng. Nariknak ti buteng ket kastakayo met. … Iti daytoy a Simbaan nalabit a saantayo nga umdas a makaipaay iti napateg nga impluensia iti lubong, ngem no luktantayo dagiti naespirituan a matatayo, ‘ad-aduda dagiti adda kadatayo ngem kadagiti adda kadakuada’ [2 Ar-ari 6:16]” (“Be Not Troubled,” Liahona, Nob. 2018, 18–19).
Panangpadur-as iti Panangisurotayo
Iturong dagiti agad-adal kadagiti nasantuan a kasuratan. Agingga a kabaelam, allukoyem dagiti miembro ti klase nga agtalek kadagiti nasantuan a kasuratan ken balikas dagiti sibibiag a propeta para iti pannarabay, sungbat kadagiti saludsod, ken suporta. Ti balikas ti Dios ti kaindaklanan a pagtaudan iti kinapudno. (Kitaen iti Panangisuro iti Wagas ti Mangisalakan,21.)