“Hulio 18–24. Esdras 1; 3–7; Nehemias 2; 4–6; 8: ‘Agar-aramidak iti Maysa a Dakkel nga Aramid’” Umaykayo, Sumurot Kaniak—Para iti Sunday School: Daan a Tulag 2022 (2021)
“Hulio 18–24. Esdras 1; 3–7; Nehemias 2; 4–6; 8,” Umaykayo, Sumurot Kaniak—Para iti Sunday School: 2022
Panangiladawan iti templo ti Zerubbabel, ni Sam Lawlor
Hulio 18–24
Esdras 1; 3–7; Nehemias 2; 4–6; 8
“Agar-aramidak iti Maysa a Dakkel nga Aramid”
No awisem dagiti miembro ti klase a mangibinglay no ania ti napateg kadakuada kadagiti libro ti Esdras ken Nehemias, mangibinglay met kadagiti ania man nga impresion a naawatmo bayat ti panagadalmo.
Isuratmo dagiti Impresionmo
Yawis ti Panagbibinninglay
No dadduma ti panangisurat iti pisarra kadagiti kangrunaan a balikas wenno ragup ti balikas ket mabalin a mangipalagip kadagiti miembro ti klase ti bambanag a nasursuroda manipud kadagiti nasantuan a kasuratan ken ad-adda a mangpalaka kadakuada nga agibinglay. Kas pagarigan, mabalinmo nga isurat iti pisarra ti Bangonen manen, Tarimaanen, ken Ipasdek manen ket awisem dagiti miembro ti klase a mangibinglay kadagiti bersikulo manipud iti panagbasada a mainaig iti maysa wenno ad-adu pay kadagitoy a balikas.
Isuro ti Doktrina
Mangyeg dagiti templo kadatayo iti rag-o.
-
Ti panagbasa maipapan iti rag-o a narikna dagiti Judio kabayatan ti pannakabangon manen iti temploda ket mabalin a makatulong kadagiti miembro ti klase a makarikna iti ad-adda a panagyaman kadagiti templo iti aldawtayo. Nalabit a mabalinmo nga awisen dagiti miembro ti klase a mangrebyu iti Esdras 3:8–13 ken 6:16–22 ket kalpasanna paglilinnawagan dagiti sumagmamano a wagas a nangrambakan dagiti Judio iti pannakabangon manen ken pannakaidaton ti templo. Apay a ti pannakabangon ti maysa a templo ti maysa a gapu tapno agrambak? Mabalinmo nga awisen dagiti miembro ti klase a mangibinglay no kasano a mangted iti rag-o kadakuada dagiti templo, ken ti trabaho nga aramidentayo sadiay. Ti palawag iti “Dagiti Nainayon a Resources” ti makaallukoy kadagiti miembro ti klase a mangpadas iti rag-o ti aramid iti templo.
Ladawanpamilia a magmagna kadagiti paraangan ti temploMabalin a ti templo ti pagtaudan ti rag-o iti biagtayo.
Makatulongtayo iti panagtultuloy ti aramid ti Dios iti baet ti pannakasuppiat.
-
Iladawan dagiti libro ti Esdras ken Nehemias dagiti tao a mangipatpatungpal iti napateg nga aramid iti baet ti panagsuppiat manipud kadagiti kabusorda. Tapno rugian ti panaglilinnawag, mabalinmo a damagen kadagiti miembro ti klase no ania ti “dakkel nga aramid” ni Nehemias (Nehemias 6:3) a mabalin nga idasig iti biagtayo. Ania ti napateg nga aramid nga inted ti Dios nga aramidentayo? Kalpasanna mabalinmo a basaen ti Esdras 4:4 ket paglilinnawagan no kasano ti panangpadas ni Satanas a mangpakapsut kadagiti imatayo ken mangriribuk kadatayo iti panangaramid iti trabaho ti Dios. Ania ti masursurotayo manipud ken ni Nehemias ken dagiti kaduana a trabahador iti Nehemias 2:18–20; 4:6–9; ken 6:1–3? Ania ti kayat a sawen ti “maysa a nakem tapno agaramid” iti serbisio iti Apo ? (Nehemias 4:6). Ibilangmo ti panangibinglay ti paset ti mensahe ni Presidente Dieter F. Uchtdorf “We Are Doing a Great Work and Cannot Come Down” (Liahona, Mayo 2009, 59–62), nangnangruna kadagiti maudi a dua a benneg.
-
Mabalin a mariknam a naparegtaka a mangidaulo iti panaglilinnawag a mangidasdasig kadagiti panagkagumaan ni Zerubbabel a mangbangon manen iti templo kadagiti panagkagumaantayo a dumar-ay iti templo ken aramidentayo ti pangisalakan nga aramid sadiay. Kas pagarigan, mabalinmo nga isurat ti dua a paulo iti pisarra: Zerubbabel ken Datayo. Iti babaen ti Zerubbabel, mabalin nga isurat dagiti miembro ti klase no ania ti inaramid “dagiti kabusor da Juda ken Benjamin” (Esdras 4:1) a nangpadas a nangpasardeng ken ni Zerubbabel ken dagiti tao a Judio manipud iti panangbangonda manen iti templo (kitaen iti Esdras 4). Iti babaen ti Datayo, mabalin nga ilista dagiti miembro ti klase dagiti wagas a pangpadasan ti kabusor a mangpasardeng kadatayo manipud iti idadar-ay iti templo. Kalpasanna mabalinda ti agbibinninglay iti balakad maipapan iti no kasano a makapagkalikagumtayo a manggun-od iti tulong ti Apo iti panangparmek iti dayta a pannakasuppiat.
Mabendisionantayo no agadaltayo kadagiti nasantuan a kasuratan.
-
Nalabit a mabalin nga aggigiddan a basaen dagiti miembro ti klase ti Nehemias 8:1–12 ket paglilinnawagan no kasano ti narikna ni Esdras ken dagiti taona maipapan iti Dios ken iti balikasna. Allukoyem dagiti miembro ti klase nga agibasar kadagiti nalawag a bersikulo a mangipakita no kasano ti nariknada. Awisem dagiti miembro ti klase a mangipeksa no kasano ti riknada maipapan iti balikas ti Dios. Kasano a mapasayaattayo dagiti panagkagumaantayo nga agadal iti balikas ti Dios?
Dagiti Nainayon a Resources
Padasenyo ti rag-o ti templo.
Insuro ni Presidente Russell M. Nelson:
“Mabalin a maparegtatayo iti uneg ti agmalem maipapan kadagiti padas dagiti dadduma iti templo ken family history. Ngem nasken nga adda aramidentayo a banag tapno aktual a padasentayo mismo ti rag-o. Kayatko ti mangted iti maysa a karit iti tunggal maysa kadatayo tapno makapagtultuloy ken mapapigsa ti napintas a rikna iti daytoy nga aramid. Awisenkayo a sikakararag a mangpanunot no ania a kita ti sakripisio—no mabalin maysa a sakripisio iti oras—a maaramidyo tapno ad-adu pay ti maileppasyo a trabaho iti templo ken family history itoy a tawen.
“Mairamantayo iti aramid ti Mannakabalin a Dios. Sibibiag Isuna. Ni Jesus ti Cristo. Daytoy ti Simbaanna. Datayo dagiti annakna iti katulagan. Mapangnamnamaannatayo” (Russell M. Nelson and Wendy W. Nelson,“Open the Heavens through Temple and Family History Work,” Ensign, Okt. 2017, 39).
Panangpadur-as iti Panangisurotayo
Iramanmo ti nagannak dagiti agtutubo. No mangisuroka kadagiti agtutubo, ibinglaymo no ania ti isursurom kadagiti nagannak kadakuada. Matulongandaka a makaawat kadagiti kasapulan dagiti agtutubo ken no kasano a matulongam ida. Daytoy ti mabalin pay a nasayaat a wagas a mangyallukoy iti panaglilinnawag ti pamilia maipapan iti no ania ti sursuruen dagiti agtutubo iti klase. (Kitaen iti Panangisuro iti Wagas ti Mangisalakan,27.)