“Hulio 25–31. Esther: ‘Sika Dika Mayeg … Iti Kasta a Tiempo a Kas Itoy’” Umaykayo, Sumurot Kaniak—Para iti Sunday School: Daan a Tulag 2022 (2021)
“Hulio 25–31. Ester,” Umaykayo, Sumurot Kaniak—Para iti Sunday School: 2022
Ester, ni James Johnson
Hulio 25–31
Ester
“Sika Dika Mayeg … Iti Kasta a Tiempo a Kas Itoy”
Kasano nga am-ammom unay dagiti miembro ti klase? Padasem a kaam-ammom a nasaysayaat ti maysa a miembro ti klase iti tunggal lawas. Daytoy ti mangtulongto kenka a mangibilang kadagiti kasapulanda bayat ti panagsaganam a mangisuro (kitaen iti Panangisuro iti Wagas ti Mangisalakan, 7).
Isuratmo dagiti Impresionmo
Yawis ti Panagbibinninglay
Mabalin nga ibinglay dagiti miembro ti klase iti maysa a tao a nakatugaw iti asideg ti maysa a banag nga insuro ti Espiritu kadakuada, maysa a banag a naawatanda a nasaysayaat, wenno maysa a banag nga inyarigda iti biagda bayat ti panangbasada iti libro ni Ester. Kalpasanna mabalin ti mangibinglay ti sumagmamano kadakuada iti sibubukel a klase.
Isuro ti Doktrina
Ipannatayo ti Apo kadagiti situasion a mabalintayo a bendisionan dagiti dadduma.
-
Mabalin a nakitan dagiti miembro ti klasem dagiti wagas a nangaramidan ti Apoa mabalin nga isalakan ni Ester dagiti Judio, kas naisingasing iti balabala itoy a lawas iti Umaykayo, Sumurot Kaniak—Para kadagiti Indibidual ken Pamilia. Awisem ida a mangibinglay no ania ti nasarakanda. Wenno mabalinyo nga aggigiddan a mangsapul iti sumagmamano a pagarigan (kitaen iti Ester 2:21–23; 3:10–14; 4:14–16). Ania ti maaramidtayo tapno mailasintayo ti ima ti Dios iti biagtayo? Ti palawag ni Elder Neil L. Andersen iti “Dagiti Nainayon a Resources” ket naglaon iti maysa a sungbat iti daytoy a saludsod.
-
Tapno matulongan dagiti miembro ti klasem a mangpanunot maipapan no kasano nga insagana ida ti Apo “iti kasta a tiempo a kas itoy” (Ester 4:14), awisem ida a mangbasa iti Ester 4:10–17. Kasano a nakatulong dagiti balikas ni Mardokeo ken ni Ester a mangaramid iti pangngeddeng a mangsalaknib kadagiti taona? Kas iti panangikabil ti Dios ken ni Ester iti maysa a saad a pakaisalakananna kadagiti Judio, ania dagiti sumagmamano a situasion a pangikabilanna kadatayo tapno mabendisionantayo dagiti dadduma? Kasano a makapagbalintayo a nasaysayaat a ramit dagiti imana? Ti panangbasa iti palawag ni Sister Virginia U. Jensen iti “Dagiti Nainayon a Resources” ket mabalin a mangparegta kadagiti miembro ti klase a mangpanunot kadagiti panawen idi nariknada ti panagbalinda a ramit para iti Apo. Kiddawem kadakuada a mangibinglay kadagiti padasda, no tarabayen ti Espiritu.
Ipakita ti panagayuno ti panagpannuraytayo iti Apo.
-
Mabalinmo nga usaren ti Ester 4 a mangilawlawag kadagiti bendision a sumangbay manipud iti panagayuno. Mabalinmo a parebyu iti maysa a miembro ti klase dagiti pasamak a nangiturong ken ni Ester ken iti dadduma pay a Judio tapno agayunoda. Apay a pinilida ti agayuno? Apay a pilientayo ti agayuno? Mabalin a kayatyo nga aggigiddan nga irebyu dagiti sumagmamano a mainayon a nasantuan a kasuratan maipapan iti panagayuno, a kas iti Isaias 58:6–12 ken Mateo 4:1–4; 17:14–21 (kitaen met ti Pangiwanwan iti Nasantuan a Kasuratan,“Agayuno, Panagayuno,” scriptures.ChurchofJesusChrist.org). Nalabit a mabalinmo nga ibinglay wenno ti sumagmamano a miembro ti klase iti padpadas a mangipakita no kasano a mangisangbay ti panagayuno iti bileg ti Apo iti biagtayo.
Ti panagaramid iti umno a banag masansan nga agkasapulan iti dakkel a kinatured.
-
Dagiti pakaammuan da Mardokeo ken Ester a situtured a mangitaktakder ti kinalinteg ket mabalin a mangparegta kadagiti miembro ti klase a maaddaan iti tured a mangaramid iti umno a banag. Mabalinmo nga awisen ti kagudua ti klase a mangbasa maipapan ken ni Mardokeo (kitaen iti Ester 3:1–11) ken ti sabali pay a kagudua ti klase a mangbasa maipapan ken ni Ester (kitaen iti Ester 4:10–17; 5:1–4). No addada koma ditoy ita, ania ti mabalin nga isao da Mardokeo ken Ester a mangparegta kadatayo no narigat nga aramiden no ania ti umno? Mabalin pay nga ibinglay dagiti miembro ti klase dagiti situasion idi nasken nga agtignayda a situtured. Mabalinmo nga ipabuya ti video a “Courage” (ChurchofJesusChrist.org) wenno awisem ti klase a mangkanta wenno mangbasa kadagiti balikas ti maysa a kanta maipapan iti panangitakder iti kinapudno, a kas iti “Do What Is Right” (Hymns, no. 237). Kalpasanna paglilinnawagan no ania ti isuro ti video wenno kanta maipapan iti maaddaan ti tured.
LadawanNI Ester ken ti ariNi Ester iti sanguanan ti Ari, ni Minerva K.Teichert
Dagiti Nainayon a Resources
Ti ima ti Dios.
Insuro ni Elder Neil L. Andersen:
“No dadduma makitatayo ti ima ti Apo iti biag dagiti dadduma ngem masdaawtayo no, ‘Kasano a nalawlawag a makitak ti imana iti bukodko a biag?’…
“No tungpalenyo dagiti bilinko ket agkararagkayo a sipapammati tapno makitayo ti ima ti Apo iti biagyo, ikarik kadakayo a luktannanto dagiti naespirituan a matayo a nalawlawa pay, ket makitayonto a nalawlawag a saankayo nga agmaymaysa” (“Thy Kingdom Come,” Liahona, Mayo 2015, 121–22).
“Iti kasta a panawen a kas itoy.”
Insuro ni Sister Virginia U. Jensen: “Diak mamati nga addakayo ken addaak ditoy iti daytoy naidumduma a panawen a saan a ninamnama. Mamatiak a, kas ken ni Ester idi un-unana, a datayo ‘umay iti pagarian a maipaay iti kasta a tiempo a kas itoy’ [Ester 4:14], no ti impluensiatayo, pagwadantayo, pigsatayo, ken pammatitayo mabalin nga agtakder a kas maysa a salaknib ti tumantanor a kinadakes a mangpapeggad a manglawlaw kadagiti pagtaengantayo, pamiliatayo, ken ipatpategtayo” (“Creating Places of Security,” Ensign, Nob. 1997, 89).
Panangpadur-as iti Panangisurotayo
Agibasar nga umuna kadagiti nasantuan a kasuratan. Dagiti nasantuan a kasuratan ti nasken nga umuna a pagadawan para iti panagadalmo ken panagsaganam. Dimo liplipatan a dagiti balikas dagiti agdama a propeta ti mangpunno kadagiti pagrukodan nga aramid [standard wordks] ken dagitoy pay ti nasantuan a kasuratan. (Kitaen iti Panangisuro iti Wagas ti Mangisalakan, 17–18.)