“Agosto 1–7. Job 1–3; 12–14; 19; 21–24; 38–40; 42: ‘Ngem Agtalekakto Kenkuana,’” Umaykayo, Sumurot Kaniak—Para iti Sunday School: Daan a Tulag 2022 (2021)
“Agosto 1–7. Job 1–3; 12–14; 19; 21–24; 38–40; 42,” Umaykayo, Sumurot Kaniak—Para iti Sunday School: 2022
Dagiti Pannakaukom ni Job, ni Joseph Brickey
Agosto 1–7
Job 1–3; 12–14; 19; 21–24; 38–40; 42
“Ngem Agtalekakto Kenkuana”
Ania dagiti kinapudno a pangtulongan kenka ti Espiritu Santo a sursuruem bayat ti panagadalmo iti libro ni Job? Ania ti kayatmo nga ibinglay iti klasem?
Isuratmo dagiti Impresionmo
Yawis ti Panagbibinninglay
Dagiti miembro ti klase a nagadal iti Job itoy a lawas ket mabalin a natakuatanda dagiti kinapudno a napnuan kaipapanan kadakuada. Tapno maguyugoy ida a mangibinglay, mabalinmo nga isurat iti pisarra ti Nasursurok manipud ken ni Job … ket idawat kadagiti miembro ti klase no kasano nga ileppasda daytoy a binatog.
Isuro ti Doktrina
Ti panagtalektayo iti Nailangitan nga Ama ken ni Jesucristo ket makatulong kadatayo nga agtalinaed a napudno iti amin a kasasaad.
-
Ti umuna a dua a kapitulo ti Job, a mangiladawan ken ni Satanas a nagsalsaludsod kadagiti rason iti likudan ti kinapudno ni Job, ket makatulong kadagiti miembro ti klase a mangamiris kadagiti bukodda a rason iti panagbalinda a napudno iti Nailangitan nga Ama ken ni Jesucristo. Mabalin nga irugi dagiti miembro ti klase babaen ti panangilista iti sumagmamano a rason tapno pumili iti maysa a tao nga agtungpal kadagiti bilin ti Dios. Mabalinda kalpasanna ti mangsukisok iti Job 1:6–12; 2:1 6 tapno ammuenda no ania ti kinuna ni Satanas maipapan iti kinapudno ni Job. Apay a napeggad nga agtungpaltayo laeng iti Apo a gapu ta insingasing ni Satanas? Ania ti sungbat ni Job iti Job 1:20–22; 2:9–10 a mangipalgak ti maipapan ken ni Job? Makapagsarita dagiti miembro ti klase a maipapan no apay a pilienda nga agtalinaed a napudno iti Dios.
Ladawantao a kumitkita iti ngatoJob, ni Gary L. Kapp
-
Numan adda dagiti panawen a nagkarigatan ni Job iti panagduadua ken pannakapaay, iti kamaudianna ti panagtalekna iti Apo ti nangted kenkuana iti kired a kasapulanna iti panagsagabana. Tapno agsursuro manipud iti pagwadan ni Job, mabalin dagiti miembro ti klase a sukisoken iti sumagmamano kadagiti sumaganad a bersikulo a mangilasin kadagiti sumagmamano a positibo a sungbat ni Job kadagiti pannubokna: Job 1:21; 2:10; 12:9–10, 16; 13:15–16; 19:23–27. Ania ti masursurotayo manipud kadagitoy a sungbat a makatulong kadatayo a napigsa iti kinaespirituan no mapadasantayo dagiti pannubok? Apay a napeggad ti mangipapan a dagiti pannubok ket pannusa iti basol?
-
Ti palawag ni Job iti Job 19:23–27 ket mabalin a mangparegta kadagiti miembro ti klase a mangutob ken mangibinglay iti bukodda a natured a pammati iti Mannubbot, a ni Jesucristo, sibibiag. Mabalinmo nga irugi babaen ti panangawis kadagiti miembro ti klase a siuulimek a mangutob kadagiti balikas ni Job kadagitoy a bersikulo. Kalpasanna mabalinda a paglilinnawagan dagiti saludsod kas kadagitoy: Apay a ti maysa a pammaneknek maipapan iti Mannubbottayo napateg unay kadagiti panawen ti pannubok kas iti sinagaba ni Job? Kasano a natulongannatayo ti pammaneknektayo kadagiti pannuboktayo? Ti panagkansion wenno panagbasa kadagiti balikas ti kanta iti maysa a himno maipapan ken ni Jesucristo, a kas iti “I Know That My Redeemer Lives” (Hymns, no. 136), ket mabalin a mangnayon iti nalawag a pannakaammo ken pannakaawat (insight) ken naespirituan a bileg iti panaglilinnawagyo.
Dakdakkel ti pannirigan ti Dios ngem iti pannirigantayo.
-
Adu iti libro ni Job (dagiti kapitulo 3–37) ti mangiraman ken ni Job ken dagiti gagayyemna a mangpampanunot iti saludsod “Apay a mapasamak dagiti dakes a banag kadagiti nalinteg a tao?” Idinto a saan a sungbatan a naan-anay ti Apo dagitoy a saludsod iti libro ni Job, nangipaay Isuna iti maysa a napateg a mensahe. Makatulongka kadagiti miembro ti klase a mangtakuat iti daytoy a mensahe babaen ti panangawis kadakuada a mangbasa kadagiti saludsod a dinamag ti Apo ken ni Job iti Job 38: 1–7, 18–24. Ania ti masursurotayo manipud kadagitoy a saludsod?
-
Mangted ti naisubli nga ebanghelio ni Jesucristo iti nayon a lawag a makatulong kadatayo a makaawat iti sumagmamano a rason iti panagsagaba iti lubong. Mabalin nga ibinglay dagiti miembro ti klase ti kinapudno nga ammoda gapu iti Pannakaisubli ti ebanghelio a nangted kadakuada iti dakdakkel a pannirigan ken pannakaawat maipapan iti panagsagaba. Mabalinda a sapulen ti sumagmamano kadagitoy a kinapudno iti nasantuan a kasuratan ken palawag a masarakan iti “Dagiti Nainayon a Resources.”
Dagiti Nainayon a Resources
Ti nalawag a pannakaammo ken pannakaawat iti ud-udina nga aldaw maipanggep kadagiti panggep ti panagsagaba.
Mangipaay dagiti sumaganad a nasantuan a kasuratan iti nalawag a pannakaammo ken pannakaawat maipapan kadagiti panggep iti panagsagaba:
Insuro ni Spencer W. Kimball:
“No kinitatayo a ditoy mortalidad laeng ti pagbiagantayo, ngarud ti saem, ladingit, pannakaupay, ken ababa a biag ket agbalin a kalamidad. Ngem no kitaentayo ti biag kas agnanayon a banag nga iramantayo ti napalabas a biag sakbay ti pannakayanak agingga iti agnanayon a masakbayan kalpasan ti ipapatay, kalpasanna mayurnos ti amin a pasamak iti umno a pannirigan.
“Saan kadi a nainsiriban iti [Dios] ti panangtedna kadatayo kadagiti pannubok tapno marimbawantayo dagitoy, dagiti pagrebbengan a mabalin a magun-odtayo, agbannog tapno tumangken dagiti piskeltayo, ladladingit tapno mangsubok kadagiti kararuatayo? “Saantayo kadi a maipasango kadagiti pannulisog a mangsubok iti pigsatayo, maipasango iti panagsakit tapno masursurotayo ti panaganus, makapadas iti ipapatay tapno agbalintayo nga imortal ken naitan-ok? …
“No rag-o ken talna ken gunggona ti sigud a maited iti agaramid iti nasayaat, awan koman ti dakes—tunggal tao agaramid iti naimbag ngem saan a gapu ti kinaumno ti panagaramid iti kinasayaat. Awanto ti pannubok iti pigsa, awan ti panangpasayaat iti galad, awan panagdakkel ti bileg, awan ti karbengan nga agpili” (Teachings of Presidents of the Church: Spencer W. Kimball [2006],15).
Panangpadur-as iti Panangisurotayo
Sumurot iti Espiritu. Dimo mapugtuan no kasanonto a maisuro ti tunggal adalen, ngem tarabayennakanto dagiti parikna ti Espiritu. No naespirituan a nakasaganaka, mangtedto kenka ti Apo “iti dayta a kanito, no anianto ti sawem” (Doktrina ken Katulagan 100:6), ken mabalin a ti no ania laeng ti kasapulan a denggen dagiti miembro iti klase. (Kitaen iti Panangisuro iti Wagas ti Mangisalakan,10.)