“Agosto 8–14. Dagiti Salmo 1–2; 8; 19–33; 40; 46: ‘Ni Jehova Isu ti Pastorko,’” Umaykayo, Sumurot Kaniak—Para iti Sunday School: Daan a Tulag 2022 (2021)
“Agosto 8–14. Dagiti Salmo 1–2; 8; 19–33; 40; 46,” Umaykayo, Sumurot Kaniak—Para iti Sunday School: 2022
Ni Jehova Isu ti Pastorko, ni Yongsung Kim, havenlight.com
Agosto 8–14
Dagiti Salmo 1–2; 8; 19–33; 40; 46
“Ni Jehova Isu ti Pastorko”
Agplano kadagiti wagas a mangipalubos kadagiti miembro ti klase a mangibinglay kadagiti naespirituan a padas nga adda kadakuada bayat ti panangbasada kadagiti Salmo.
Isuratmo dagiti Impresionmo
Yawis ti Panagbibinninglay
Ti panangawis kadagiti miembro a mangibinglay iti no ania ti natakuatanda kadagiti Salmo ket mabalin a simple a kas iti panagdamag kadagiti saludsod kas kadagitoy: Ania ti isuro ti Espiritu kenka bayat ti panangbasam kadagiti Salmo iti daytoy a lawas? Ania dagiti salmo a nakatulong kenka a mangrikna iti nga asidegka iti Apo?
Isuro ti Doktrina
Dagiti Salmo 1; 23; 26–28; 46
Isuronatayo dagiti Salmo nga agtalek iti Apo.
-
isingasing tibalabala itoy a lawas iti Umaykayo, Sumurot Kaniak—Para kadagiti Indibidual ken Pamilia ti panangbasa iti Dagiti Salmo 1; 23; 26–28; 46 ken panangsapul kadagiti sumaganad:
-
Dagiti awis nga agtalek iti Apo
-
Dagiti balikas a mangiladawan iti Apo
-
Dagiti balikas a mangiladawan iti kappia, pigsa, ken dadduma pay a bendision nga ipaayna
-
Dagiti balikas a mangiladawan kadagiti agtalek Kenkuana
Mabalinmo nga isurat dagitoy ragup ti balikas iti pisarra ket awisem dagiti miembro ti klase nga isurat, iti abay ti tunggal ragup ti balikas, ti maysa a banag a nasarakanda iti Dagiti Salmo 1; 23; 26–28; wenno46. No kasapulanda ti tulong, mabalin nga itudom kadakuada dagitoy a bersikulo: Dagiti Salmo 1:1–4; 23:1–6; 26: 1, 6–8, 12; 27: 1, 3, 8, 14; 28: 1, 7; 46:1–3, 10. Mabalin nga ibinglay dagiti miembro ti klase ti rikna nga adda kadakuada maipapan iti Mangisalakan bayat ti panagbasada kadagitoy a salmo.
-
-
Gapu ta maipada dagiti Salmo kadagiti himno para kadagiti Israelita, mabalinmo nga awisen dagiti miembro ti klase a mangisingasing kadagiti himno a mangipalagip kadakuada kadagiti salmo a nabasada iti daytoy a lawas. Mabalinda ti agibasar iti indeks iti “Nasantuan a Kasuratan” iti gibus ti hymnbook para kadagiti kapanunotan (kitaen met iti listaan iti “Dagiti Nainayon a Resources”). Mabalin a kantaen dagiti miembro ti klase ti sumagmamano kadagitoy a himno ken ilasinda dagiti agpapada a tema iti himno ken dagiti salmo. Ania dagiti masarakantayo a mensahe ti kappia ken pammati ken ni Jesucristo?
Iturong dagiti Salmo ti pampanunottayo iti biag ken panagministro ni Jesucristo.
-
Ti panagbasa kadagiti Salmo—nangnangruna kadagiti mangitudo iti biag ti Mangisalakan—ket mabalin a maysa a naindaklan a wagas a mangpapigsa iti pammati ken ni Jesucristo. Mabalinmo a bingaybingayen ti klase iti grupo ti dua wenno ad-adu pay ket ikkam ti tunggal grupo iti maysa kadagiti sumaganad a paris dagiti reperensia: Salmo 2:1–3 ken Dagiti Aramid 4:24–28; Salmo 2:7 ken Dagiti Aramid 13:30–33; Salmo 22:1 ken Mateo 27:45–46; Salmo 22:7–8 ken Mateo 27:39–43; Salmo 22:16 ken Lucas 23:32–33; Salmo 22:18 ken Mateo 27:35; Salmo 31:5 ken Lucas 23:46. Kiddawem iti tunggal grupo a mangtakuat iti no kasano a matungpal ti padto kadagiti Salmo iti biag ti Mangisalakan ket paglilinnawagan no kasano a papigsaen dagitoy nasantuan a kasuratan ti pammaneknekda maipapan iti Mangisalakan.
Wenno mabalinmo ti mangisurat kadagiti reperensia iti nasantuan a kasuratan iti pisarra ket awisem dagiti miembro ti klase a mangiparis iti maysa a binatog manipud kadagiti Salmo iti maitutop a pasamak iti Baro a Tulag.
Mabalinmo pay nga awisen dagiti miembro ti klase a mangibinglay iti dadduma pay a reperensia iti Mangisalakan a nasarakanda iti panagadalda kadagiti Salmo (kas iti Dagiti Salmo 34:20; 41:9; kitaen met iti Lucas 24:44).
Kalpasan a paglilinnawagan dagiti miembro ti klase dagitoy a nasantuan a kasuratan, mabalinda a pagsasaritaan maipapan no apay dagitoy a napateg dagiti salmo kadagiti Judio a nakaam-ammo iti Mangisalakan. Apay a napateg dagitoy kadatayo?
“Ni Jehova isu ti pastorko.”
-
Tapno matulongan dagiti miembro ti klase a mapaglilinnawagan ti panangiladawan ken simbolismo iti Salmo 23, ibilang ti panangipakita iti ladawan a mainaig kadagiti kapanunotan iti salmo, kas kadagiti adda iti Umaykayo, Sumurot Kaniak—Para kadagiti Indibidual ken Pamilia. Kalpasanna mabalinmo nga idawat kadagiti miembro ti klase a mangilasin kadagiti napapateg a balikas wenno ragup ti balikas iti salmo ket paglilinnawagan no ania ti mabalin nga ibagida. Kas pagarigan, ania kadagitoy a ragup ti balikas kas iti “ipaiddanak kadagiti nalasbang a pagaraban” wenno “dandanum a natalna” ti makaigapu a mapanunotmo dagitoy? Ania ti mabalin nga isimbolo ti mangliwliwa a “baras” ken “sarukod”? Ania ti mabalin a kaipapanan ti “malukong[tayo]” nga agliplipias? Ania ti isuro kadatayo dagitoy a simbolo maipapan ken ni Jesucristo? Mabalinmo nga isingasing a baliwan nga isarita dagiti miembro iti klase ti salmo, a mangsukat iti sumagmamano simbolo nga addaan posible a kaipapananda a napaglilinnawagan iti klase.
Dagiti Nainayon a Resources
Dagiti himno a mainaig kadagiti Salmo.
-
Dagiti Salmo 8:3–9; 9:–2. “How Great Thou Art”(Hymns, no. 86)
-
Salmo 23. ”Ni Jehova Isu ti Pastorko,” “The Lord My Pasture Will Prepare” (Hymns, no. 108, 109)
-
Dagiti Salmo 23:6; 150. ”Praise to the Lord, the Almighty” (Hymns, no. 72)
-
Salmo 26:8. “We Love Thy House, O God” (Hymns, no. 247)
-
Salmo 27:1. “he Lord Is My Light” (Hymns, no. 89)
-
Dagiti Salmo 33: 1–6; 95: 1–6. ”For the Beauty of the Earth“ (Hymns, no. 92)
-
Salmo 37:3–9. ”Be Still, My Soul” (Hymns, no. 124)
-
Salmo 148. “All Creatures of Our God and King” (Hymns, no. 62)
Panangpadur-as iti Panangisurotayo
Usaren ti musika. “Mangawis dagiti himno ti Espiritu ti Apo, mangparnuay iti maysa a rikna ti panagraem, mamagkaykaysa kadatayo kas miembro, ken mangipaay iti maysa a wagas a pangidatonantayo kadagiti panagdaydayaw iti Apo. … “Tignayendatayo dagiti himno iti panagbabawi ken nasayaat nga ar-aramid, mangbukel iti pammaneknek ken pammati, mangliwliwa kadagiti nabannog, manglinglingay kadagiti agladladingit, ken mangparegta kadatayo nga agibtur agingga iti panungpalan” (Hymns, ix).