Ni Cristo iti nalabaga a roba a napalawlawan iti nakaparintumeng a tattao

Agparintumengto Amin a Tumeng, ni J. Kirk Richards

Agosto 22–28

Dagiti Salmo 102–103; 110; 116–119; 127–128; 135–139; 146–150

“Amin nga Adda Angesna Idaydayawda Koma ti Apo”

Ania kadagiti pannursuro kadagiti Salmo a mariknam a kangrunaan a makatulong kadagiti miembro ti klasem? Bayat ti panagadalmo iti daytoy a lawas, utobem no kasano a matulongam dagiti miembro ti klase a mangsapul iti kaipapanan kadagiti balikas dagitoy a salmo.

Isuratmo dagiti Impresionmo

icon iti panagbibinninglay

Yawis ti Panagbibinninglay

Ikkan dagiti miembro ti klase iti sumagmamano a minuto a mangrebyu kadagiti salmo a nabasada iti daytoy a lawas, ket awisen ti sumagmamano a mangibinglay iti maysa a paggugustoda a binatog. Allukoyem ida a mangibinglay no ania ti insuro ti Espiritu kadakuada. Kasano a napadur-as dagiti Salmo ti bukodtayo a panagdayaw iti Apo?

icon iti panangisuro

Isuro ti Doktrina

Dagiti Salmo 102–3; 116

Maliwliwanatayo ti Apo iti sagabaentayo.

• Marikna kadi dagiti miembro ti klasem ti kas iti pannakarikna ti mannurat iti Salmo 102 ? Kasano nga umasidegtayo iti Apo no mariknatayo ti pannakaupay wenno panagdanag? Bayat ti panagadalda iti Dagiti Salmo 102, 103, ken 116 iti pagtaengan itoy a lawas, mabalin a nakasapul dagiti miembro ti klase kadagiti ragup ti balikas a mangparegta kadakuada nga umasideg iti Apo kadagiti pannubokda. Allukoyem ida a mangibinglay no ania ti nasarakanda, wenno aggigiddan a mangsapul iti sumagmamano a makaparegta a ragup ti balikas kas maysa a klase. Mabalin pay dagiti miembro ti klase a mangisarita maipapan no kasano a tinulongan ti Apo ida iti panawen ti rigat.

• Mabalin a magustuan dagiti miembro ti klasem ti mangisurat kadagiti bukodda a salmo maipapan no kasano a nakatulong ti Apo kadakuada kadagiti panawen ti pannubok. Saan a nasken nga atiddog dagitoy wenno narikut a salmo—gagangay laeng a panangipeksa iti pammati, panagyaman, ken panagdayaw. Mabalin nga agtrabaho dagiti miembro ti klase nga agmaymaysa wenno kada paris, ken mabalinda nga irebyu iti Dagiti Salmo 102, 103, ken 116 para kadagiti kapanunotan. Awisem ti sumagmamano a tao a mangibinglay kadagiti salmoda, no agtallugodda. Mabalinyo met ti aggigiddan a mangkanta kadagiti himno maipapan iti no kasano a mangliwliwa kadatayo ti Apo, a kas iti “Where Can I Turn for Peace?” (Hymns, no. 129).

  Ni Jesus a mangag-agas

  Panangagas, ni J. Kirk Richards

Salmo 119

Ti balikas ti Dios ti mamagtalinaedto kadatayo iti danana.

• Tapno mangirugi iti maysa a panaglilinnawag maipapan iti Salmo 119, mabalinmo nga awisen dagiti miembro ti klase a mangisarita maipapan iti maysa a panawen idi sinurotda ti dana a mangragpat iti maysa a pagtungpalan (mabalin a makatulong a kasarita ti maysa a tao a nasapsapa ket kiddawen kenkuana nga agsagana nga agsarita maipapan iti daytoy). Ania dagiti padas a nangparigat nga agtalinaed iti dana? Ania ti nangtulong kadakuada nga agtalinaed iti daytoy? Kalpasanna mabalinmo ti mangidrowing iti maysa a dana iti pisarra ket awisem dagiti miembro ti klase a mangisurat kadagiti ragup ti balikas manipud iti Salmo 119 a mangibaga no ania ti inaramid ti Apo a mangtulong kadatayo nga agtalinaed iti dana ti katulaganna. Ibilang ti panangibinglay iti adaw ni Presidente Russel M. Nelson iti “Dagiti Nainayon a Resources” kas paset ti paglilinnawaganyo.

• Mabalin a mairanud dagiti miembro ti klasem manipud iti panangidasig no ania ti isuro ti Salmo 119 maipapan iti panagtalinaed iti dana ti Apo iti dadduma pay a nasantuan a kasuratan a mangisuro kadagiti kasta met la a kinapudno. Ibilang ti panangbingay iti klase iti kadai grupo ken panangidawat iti tunggal grupo a mangrebyu kadagiti binatog ti nasantuan a kasuratan kas kadagitoy: Salmo 119:33 – 40, 105; Dagiti Proverbio 4:11–19; 1 Nephi 8:20–28; 11:25; 2 Nephi 31: 17–21; Alma 7:9, 19–20. Mangawis iti tunggal grupo a mangibinglay no ania ti nasursuroda. Ikkam dagiti miembro ti klase iti oras nga agutob no ania ti makaparegta nga aramiden a maibatay iti no ania ti nasursuroda.

Salmo 139

Ammo ti Apo dagiti puspusotayo.

• Ti pannakaawat nga ammonatayo ti Apo—dagiti panunot ken tignaytayo, pagpigsaan ken pagkapsutantayo—ken ay-ayatennatayo ket addaan iti nabileg nga impluensia kadagiti pili nga aramidentayo. Mabalinmo nga awisen ti klase a mangsapul kadagiti ragup ti balikas iti Salmo 139 a mangisuro iti daytoy a napateg a kinapudno. Kasano a naapektuan ti biagtayo iti pannakaammotayo iti daytoy a kinapudno? Mabalin pay nga ilawlawag dagiti miembro ti klase dagiti wagas a mabalintayo nga awisen ti Apo nga “usigennak, O Dios, ket ammuem toy pusok” (bersikulo 23).

dagiti nainayon a resources icon

Dagiti Nainayon a Resources

Ti nailet ken akikid a dana

Kinuna ni Presidente Russell M. Nelson:

“No ti panagdaliasattayo iti biag ket tapno agballigi, nasken a surotentayo ti nadiosan a pangiturong. Kinuna ti Apo, ‘Kitaendak iti tunggal panunot; saankayo nga agduadua, dikayo agbuteng’ [Doktrina ken Katulagan 6:36]. Ken insurat ti Salmista, ‘Ti saom pagsilawan kadagiti saksakak, ket silaw kadagiti danak’ [Salmo 119:105]. …

“Iti panagdaliasatyo iti daytoy a biag, masabatyo iti adu a tubeng ken makaaramid kadagiti sumagmamano a biddut. Makatulong kadakayo ti pannarabay ti nasantuan a kasuratan a mangbigbig iti biddut ken agaramid kadagiti kasapulan a panagatur. Agsardengkayo a mapan iti biddut a turongen. Siaannadkayo a mangadal iti panangiturong a masarakan iti nasantuan a kasuratan. Kalpasanna agtultuloykayo iti panagbabawi ken pannakaisubli a kasapulan tapno makapan iti ‘nailet ken akikid a dana nga agturong iti biag nga agnanayon’ [2 Nephi 31: 18]” (“Living by Scriptural Guidance,” Ensign, Nob. 2000, 17).

Panangpadur-as iti Panangisurotayo

Iramanmo dagiti tao nga agkarkarigatan. No dadduma kasapulan laeng dagiti mangikarkarigatan a miembro ti klase a maibilangda tapno mariknada a maipatpategda. Ibilang ti panangidawat kadakuada a mangyakem iti sumaruno nga adalen, maawisda iti klase, wenno panangsigurado nga adda luganda nga umay iti simbaan. Saanka a sumuko no saanda nga agresponde kadagiti panagkagumaanmo iti damo. (Kitaen iti Panangisuro iti Wagas ti Mangisalakan, 8–9.)