Agosto 29–Septiembre 4

Dagiti Proverbio 1–4; 15–16; 22; 31; Eclesiastes 1–3; 11–12

“Ti Panagbuteng ken ni Jehova Isu ti Punganay ti Pannakaammo”

Kasano a mabalin a mangbendision dagiti mensahe iti libro dagiti Proverbio ken Eclesiastes iti biag dagiti sursuruam? Surotem dagiti parikna ken impresion a maawatmo bayat ti panagadalmo ken panagsaganam a mangisuro.

Isuratmo dagiti Impresionmo

Yawis ti Panagbibinninglay

Adu dagiti napipintas ken nabibileg a mensahe iti libro dagiti Proverbio ken Eclesiastes. Sakbay ti panangilawlawag kadagiti masinunuo a binatog, kas dagidiay naisingasing iti baba, awisem dagiti miembro ti klase a mangibinglay iti sumagmamano a paboritoda manipud iti bukod wenno sangapamiliaan a panagadalda iti daytoy a lawas.

Isuro ti Doktrina

Dagiti Proverbio 1–4; 15–16; Eclesiastes 1–3; 11–12

“Iyallingagmo ta lapayagmo iti kinasirib.”

• Maulit ti awis nga agkalikagum a manggun-od iti sirib ken pannakaawat iti intero a libro Dagiti Proverbio. Kasano a matulongam dagiti miembro ti klase a mangibinglay no ania ti nasursuroda maipapan iti sirib kabayatan ti panagadalda? Mabalin a maysa a wagas ti panangisurat iti sirib iti pisarra ket awisem dagiti miembro ti klase a mangnayon kadagiti numero ti bersikulo wenno dagiti ragup ti balikas manipud iti libro dagiti Proverbio wenno Eclesiastes a mariknada a mangipaay iti nalawag a pannakaammo ken pannakaawat maipapan iti sirib. (No makatulong, mabalinmo nga isingasing a sukisoken dagiti miembro ti klase ti Dagiti Proverbio 1–4; 15–16; Eclesiastes 1–3; 11–12.) Ania ti masursurotayo maipapan iti kinasirib manipud kadagitoy nasantuan a kasuratan? Kasano a mabendisionantayo no agkalikagumtayo a manggun-od iti sirib nga aggapu iti Dios?

Dagiti Proverbio 1:7; 2:5; 3:7; 8:13; 15:33; 16:6; 31:30; Eclesiastes 12:13

“Saanka koma a masirib kadagiti matam met laeng: agbutengka ken ni Jehova.”

• Ti sabali a tema a masarakan iti libro dagiti Proverbio ken Eclesiastes ket “ti panagbuteng ken ni Jehova” (Dagiti Proverbio 1:7; kitaen met iti Dagiti Proverbio 2:5; 3:7; 8:13; 15:33; 16:6; 31:30; Eclesiastes 12:13). Nalabit a mabalin a basaen dagiti miembro ti klase dagiti sumagmamano kadagitoy a bersikulo ken mangibinglay no ania ti mariknada a kayat a sawen ti agbuteng ken ni Jehova. Kasano a maigiddiat ti panagbuteng iti Apo iti dadduma pay a kita ti panagbuteng? Mabalin nga ibinglay dagiti nalawag a pannakaammo ken pannakaawat manipud ken ni Elder David A. Bednar iti panangilawlawagna a masarakan iti “Dagiti Nainayon a Resources.”

Panangsursuro nga Agtalek iti Apo, ni Kathleen Peterson

Dagiti Proverbio 3:5–7

“Agtalekka ken ni Jehova iti amin a pusom.”

• Mabalin a magustuan dagiti miembro ti klase ti maysa a banag nga adalen (object lesson) a makatulong kadakuada a maawatan no ania ti kayat a sawen ti “agtalek ken ni Jehova” ken “di[da] agtalged iti pannakaawat[da] met laeng” (Dagiti Proverbio 3:5). Kas pagarigan, mabalinmo nga awisen ti maysa a miembro ti klase nga agsanggir iti maysa a banag a nalagda ken natibker, kas iti maysa a pader. Kalpasanna mabalin a padasen ti tao nga agsanggir iti maysa a banag a saan a nalagda, kas iti maysa a sagad. Kasano daytoy a panangipakita a matulongannatayo a maawatan ti Dagiti Proverbio 3:5? Ania ti isuro ti libro Dagiti Proverbio 3:5–7 maipapan iti no ania ti kaipapanan ti agtalek ken ni Jehova? Apay a saan a masirib ti agtalek iti bukodtayo a pannakaawat? Kasano a nariknatayo ti Apo a nangiturong kadagiti danatayo idi nagtalektayo Kenkuana?

Dagiti Proverbio 15:1–2, 4, 18,28; 16:24–32

“Ti naalumamay a sungbat pagbaw-ingenna ti pungtot.”

• Tapno matulongan dagiti miembro ti klase a paglilinnawaganda no kasano a maaddaanda iti dakdakkel a talna ken basbassit a panagsusupanget iti biagda, mabalinmo nga awisen ida a mangbasa iti Dagiti Proverbio 15:1–2,18; 16:32. Kalpasanna mabalinda nga ibinglay dagiti padas a napasaranda a magiladawan kadagiti kinapudno kadagitoy a bersikulo. Kas pagarigan, kaano a nakatulong ti panangusar iti “naalumamay a sungbat” a “[pagbaw-ingenna] ti pungtot”? Dagiti Proverbio 15:1). Wenno mabalinmo a panunoten dagiti panawen idi impagwadan ti Mangisalakan no ania ti insuro dagitoy a bersikulo (kitaen iti Juan 8:1–11; 18:1–11). Kasano a masurottayo ti pagwadanna bayat ti pannakipulapoltayo iti dadduma?

• Idinto a di ammo dagiti mannurat iti libro dagiti Proverbio maipapan iti adu a wagas ti komunikasion nga adda iti panawentayo, ti balakad iti Dagiti Proverbio 15 ken16 ket mabalin a mayaplikar iti amin a kita ti komunikasion. Tapno matulongan dagiti miembro ti klase a maawatanda daytoy, mabalinmo nga awisen ti tunggal tao a mangala iti maysa kadagiti sumaganad a nasantuan a kasuratan tapno basaenna: Dagiti Proverbio 15:1 2, 4, 18,28; 16:24, 27–30. Kalpasanna mabalin dagiti miembro ti klase a mangulit a mangisao iti proverbioda iti porma ti balakad maipapan iti pannakipulapol kadagiti dadduma pay iti social media, babaen iti panagteks, wenno iti online. Makasarakda iti nayon pay a makatulong a balakad iti “Pagsasao” iti Para iti Pigsa dagiti Agtutubo (2011), 20–21.

Dagiti Nainayon a Resources

“Nadiosan a buteng ti panagayat ken panagtalek Kenkuana.”

Inlawlawag ni Elder David A. Bednar:

“Dumakkel ti nadiosan a buteng manipud iti umno a pannakaawat iti nadiosan a kababalin ken mision ti Apo a ni Jesucristo, kinatallugod nga agtulnog iti pagayatantayo iti pagayatanna, ken ti pannakaammo a tunggal lalaki ken babai ket agsungbatto para iti bukodna a basol iti Aldaw a Panangukom.…

“Ti nadiosan a buteng ket panagayat ken panagtalek Kenkuana. Bayat ti ad-adda a naan-anay ti panagbutengtayo iti Dios, ad-adda a naan-anay ti panagayattayo Kenkuana. Ta ‘pukawen ti naan-anay nga ayat ti amin a panagbuteng’ (Moroni 8:16). Ikarik ti naraniag a silaw ti nadiosan a buteng paksiatenna ti nasipnget nga anniniwan dagiti mortal a panagbuteng (kitaen iti Doktrina ken Katulagan 50:25) no kumitatayo iti Mangisalakan, mangbangon Kenkuana kas pundasiontayo, ken agtultuloy iti dana ti katulaganna iti naikkan-pateg a panagkumit ” (“Therefore They Hushed Their Fears,” Liahona, Mayo 2015, 48–49).

Panangpadur-as iti Panangisurotayo

Agpokus ken ni Jesucristo. Awanen ti nasaysayaat pay a wagas tapno mapapigsa ti pammati dagiti sursuruam ngem iti panangisentrom iti adalem iti Mangisalakan. Bayat ti panangisurom, awisem dagiti miembro ti klase a mangbangon “iti bato ti Mannubbottayo, nga isu ni Cristo, ti Anak ti Dios” (Helaman 5:12).