Ni Jesus a mangag-agas iti bulsek a lalaki

Ni Jesus a Mangag-agas iti Bulsek a Lalaki, ni Carl Heinrich Bloch

Septiembre 19–25

Isaias 40–49

“Liwliwaenyo dagiti Taok”

Mabalin nga agkedked ti sumagmamano a tao a mangibinglay kadagiti kapanunotanda iti klase gapu ta mariknada a saanda unay ammo dagiti nasantuan a kasuratan. Kasano a matulongam amin dagiti miembro ti klase a makarikna a napateg dagiti naespirituan a pannakaammo ken pannakaawatda?

Isuratmo dagiti Impresionmo

icon iti panagbibinninglay

Yawis ti Panagbibinninglay

Ibilangmo ti panangisurat iti maysa a saludsod iti pisarra kas iti sumaganad: Ania ti insuro ti Espiritu kenka bayat ti panagadalmo iti Isaias 40–49? Mabalin nga utoben dagiti miembro ti klase daytoy a saludsod ken isuratda dagiti sungbat, ken mabalin nga ibinglay ti sumagmamano dagiti kapanunotanda.

icon iti panangisuro

Isuro ti Doktrina

Isaias 40–49

Maliwliwanatayo ni Jesucristo ken maikkannatayo iti namnama.

• Tibalabala itoy a lawas iti Umaykayo, Sumurot Kaniak—Para kadagiti Indibidual ken Pamilia isingasingna ti panangsapul kadagiti mensahe ti liwliwa ken namnama iti Isaias 40–49 ket ilistana iti sumagmamano a binatog a pangrugian. Mabalinmo a kiddawen kadagiti miembro ti klase a mangibinglay iti ania man a balakad a nasarakanda. Allukoyem ida a mangisarita maipapan iti no apay a mabalin a nakatulong dagitoy a mensahe kadagiti Judio iti pannakabalud ken no kasano a makatulongda kadatayo iti agdama. Mabalinmo met nga itudo kadakuada dagiti binatog a nasarakam iti bukodmo a panagadal. Ania ti kayat ti Apo a maammuantayo maipapan Kenkuana? Kasano a liwliwaennatayo? Mabalinmo nga ipalagip kadagiti miembro ti klase a “ti Apo” iti Daan a Tulag ket maitudo ken ni Jehova, wenno ni Jesucristo.

• Ti himno a “How Firm a Foundation” (Hymns, no. 85.) naadaw kadagiti balikas ni Isaias iti Isaias 41:10; 43:2–5; 46:4. Kalpasan ti panagbasa kadagitoy a nasantuan a kasuratan ken panagkanta kadagiti mainaig a berso ti himno, mabalin nga isarita dagiti miembro ti klase maipapan kadagiti panawen a nariknada nga adda ti Apo kadakuada ken no kasano a nakatulong dagiti padasda tapno “dida agbuteng.”

Ni Jesus a nakatugaw iti daga ken mangisursuro kadagiti tao

“Pakanenna ti arbanna kas maysa a pastor” (Isaias 40:11).

Isaias 40:1–3, 9–11; 43:8–13; 48:20–21; 49:1–9

“Dakayo dagiti saksik.”

• Ania ti kaipapanan ti panagbalin a “dagiti saksi” ti Apo? Mabalin dagiti miembro ti klase a mangutob iti daytoy a saludsod bayat ti panangbasada iti maysa wenno ad-adu pay kadagiti sumaganad a binatog: Isaias 40:1–3, 9–11; 48:20–21; 49:1–9. Ti palawag iti “Dagiti Nainayon a Resources” ket makaited pay ti sumagmamano a sungbat. Ania dagiti “naimbag a damag“ a maibinglaytayo kas saksi ti Apo? Ania kadagitoy a bersikulo ti makatulong kadatayo a “ditayo agbuteng” a mangibinglay iti pammaneknektayo? (Isaias 40:9). Mabalin a pagsasaritaan dagiti miembro ti klase maipapan kadagiti gundaway nga adda kadakuada a nasken nga agbalinda a saksi ti Apo ken no kasano a mabendisionan dagiti dadduma babaen kadagiti pammaneknekda.

• Tapno matulongan dagiti miembro ti klase a mangyaplikar kadagiti pannursuro iti Isaias 43:8–13, mabalinmo nga awisen ida a mangipapan a naawaganda nga agsaksi iti maysa a pagusigan a korte. Iti daytoy a pannakausig, naisaklang ni Jesucristo iti panagsaona a naisurat iti Isaias 43:11. No naawagantayo a kas saksi a mangsuporta iti panagsao ni Jesus (kitaen iti bersikulo 10), ania a pammaneknek a maidiayatayo? Ania ti pakakitaan nga idatagtayo manipud iti biagtayo?

Isaias 48:10; 49:13–16

Mapalinisnatayo ti Apo babaen kadagiti rigattayo.

• Nalabit a mabalin a paglilinnawagan dagiti miembro ti klase no kasano a makatulong kadatayo dagitoy a balikas manipud iti mensahe ni Elder Quentin L. Cook a makaawat iti Isaias 48:10: “Dagiti kalidad ti kababalin ken kinalinteg a natenneb iti urno ti pakarigatan ket mangpaan-anay ken mangpatarnaw kadatayo” (“The Songs They Could Not Sing,” Liahona, Nob. 2011,106). Mabalinda pay nga isarita maipapan no kasano a nakatulong ti bukodda nga “urno ti pakarigatan” a nangpalinis kadakuada a naespirituan. Kasano a tulongannatayo ti Isaias 49:13–16 no agrigattayo? Kitaen met iti video a “The Refiner’s Fire” (ChurchofJesusChrist.org).

dagiti nainayon a resources icon

Dagiti Nainayon a Resources

Panagtakder kas maysa a saksi.

Inlawlawag ni Presidente Margaret D. Nadauld no ania ti kaipapanan ti “agtakder a saksi ti Dios iti amin a kanito ken iti amin a banag, ken iti amin a lugar” (Mosiah 18:9):

“Iti panagtakder a saksi iti amin a kanito, ikaritayo nga ayatentayo ti Apo, agdayaw Kenkuana iti amin a gundaway—aldaw ken rabii, kalgaw ken panaglalamiis, nasayaat a panawen ken dakes a panawen—ayatentayo ti Apo ket maipakita koma dayta nga ayat babaen ti wagas a panagbiagtayo.…

“Ti panagtakder a saksi iti amin a banag kayatna a sawen nga amin a banag—dadakkel a banag, babassit a banag, iti amin a pannakisarsarita, iti ang-angaw, kadagiti ay-ayam nga ay-ayamen ken kadagiti libro a basaen ken musika a denggen, kadagiti panggep a suportaran, iti serbisio a maipaay, kadagiti lupot nga ikawes, kadagiti maaramid a pannakigayyem.…

“Kamaudiananna, kunatayo nga agtakdertayonto a saksi iti amin a lugar. Kayatna a sawen a saan laeng iti publiko a luglugar ngem iti pribado a luglugar, iti nalimed, iti nasipnget wenno iti nalawag a luglugar; iti simbaan, pagadalan, pagtaengan, wenno luglugan; iti luglugar ti bantay wenno luglugar iti igid ti baybay; iti kalsada wenno iti pagparadaan.…

“No panunotentayo ti kinangayed ti sagut ti [Mangisalakan] kadatayo, ania ti bassit a banag a mabalintayo nga aramiden para Kenkuana ken para iti Nailangitan nga Amatayo a nangibaon Kenkuana? Mabalintayo ti agtakder a saksi ti ayat ken dagiti pannursuroda iti amin a kanito, iti amin a banag, ken iti amin a lugar” “(Stand as a Witness,” Ensign, Mayo 2000, 93,95).

Panangpadur-as iti Panangisurotayo

Mangyawis iti napasnek a panagadal. “Dagiti agad-adal ket isuda dagiti kangrunaan a responsable para iti bukodda a panagsursuro. Ibilangmo no kasano a matulongam dagiti agad-adal a mangawat ken mangipatungpal iti daytoy a pagrebbengan” (Panangisuro iti Wagas ti Mangisalakan,29).