“Septiembre 26–Oktubre 2. Isaias 50–57: ‘Inturedna dagiti Lidaytayo, ken Inawitna dagiti Ladingittayo,’” Umaykayo, Sumurot Kaniak—Para iti Sunday School: Daan a Tulag 2022 (2021)
“Septiembre 26–Oktubre 2. Isaias 50–57,” Umaykayo, Sumurot Kaniak—Para iti Sunday School: 2022
Ti Pannakalalais ni Cristo, ni Carl Heinrich Bloch
Septiembre 26–Oktubre 2
Isaias 50–57
“Inturedna dagiti Lidaytayo, ken Inawitna dagiti Ladingittayo”
Ti kapatgan a wagas tapno agsagana a mangisuro isu ti panagbasa ken panagutob kadagiti nasantuan a kasuratan. Ania ti marikna ken masursurom bayat ti panangbasam iti Isaias 50–57?
Isuratmo dagiti Impresionmo
Yawis ti Panagbibinninglay
Tapno maguyugoy dagiti miembro ti klase a mangibinglay kadagiti adda a padasda bayat ti panangbasada iti Isaias 50–57, mabalinmo nga isurat iti pisarra ti maysa a binatog kas iti Napapigsa ti pammatik ken ni Jesucristo idi basaek ti… Awisem dagiti miembro ti klase a mangibinglay no kasano nga ileppasda ti binatog.
Isuro ti Doktrina
Nalawag ti masakbayan para kadagiti tao ti Apo.
-
Addaantayo amin iti panawen no mariknatayo ti panagkapsut. Tapno matulongan dagiti miembro ti klase nga agpannuray iti pigsa ti Apo, mabalinmo a dutokan ida a saggaysa a mangbasa iti sumagmamano a bersikulo manipud iti Isaias 51–52 ken mangibinglay iti maysa a banag a masarakanda a mangpapigsa iti maysa a tao a makarikna iti panagkapsut wenno pannakaupay. Mabalinmo met nga ilawlawag nga inulit ti nagungar a Mangisalakan ti sumagmamano a balikas ni Isaias iti tattao kadagiti kontinente ti America (kitaen iti 3 Nephi 20:32–45). Ania ti inayon dagiti balikas ti Mangisalakan iti 3 Nephi 20:30–34 iti pannakaawattayo intono maipatungpal dagitoy a padto?
-
Isingasing tibalabala itoy a lawas iti Umaykayo, Sumurot Kaniak—Para kadagiti Indibidual ken Pamilia ti panangilista iti amin a banag iti Isaias 50–52 a yawis ti Apo nga aramiden dagiti taona. Nalabit a mabalin nga ibinglay dagiti miembro ti klase no ania ti nasarakanda ken isaritada no ania ti kaipapanan kadakuada dagitoy nga awis. Mabalin a kayatmo nga ipamaysa dagiti awis iti Isaias 51:1–2, 6–8; 52:1–3, 9–11. Kasano a makapagtignaytayo kadagitoy nga awis? Mabalinmo nga ilawlawag a ti Doktrina ken Katulagan 113;7– 10 ket mangted iti naparegta a pannakailawlawag ti Isaias 52:1–2. Ania ti inayon dagitoy a balikas iti pannakaawattayo?
Gapu iti Ayat, ni iskultor Angela Johnson
Inawat ni Jesucristo iti Bagina dagiti basol ken ladinggittayo.
-
Tapno matulongan dagiti miembro ti klase a mangiladawan iti panunotda dagiti balikas ni Isaias iti Isaias 53, mabalinmo nga i-display ti sumagmamano a ladawan dagiti pasamak a nailikmut iti Pannubbot ni Jesucristo (kitaen iti Libro ti Arte ti Ebanghelio, dagiti num. 56–60). Kalpasanna mabalinmo a kiddawen kadagiti miembro ti klase a mangsapul kadagiti ragup ti balikas iti Isaias 53 a mangiladawan iti paspasamak kadagiti ladawan. Ania ti isuro dagiti balikas ni Isaias maipapan iti panagsagaba ti Mangisalakan para kadatayo? Ania ti isingasingda maipapan iti no apay a nagsagaba Isuna para kadatayo? Ania ti iparegta nga aramidentayo dagitoy a pannursuro?
-
Tapno maawis ti Espiritu Santo a mangipaneknek kadagiti kinapudno a naisuro iti Isaias 52:13–15; 53, mabalinmo nga idawat kadagiti miembro ti klase a mangbasa kadagitoy a bersikulo a siuulimek bayat ti panagpatokarmo iti maysa a recording ti maysa a himno maipapan iti Pannubbot ni Jesucristo. Awisem dagiti miembro ti klase a mangsapul kadagiti balikas wenno ragup ti balikas kadagiti nasantuan a kasuratan a mariknada a naisangsangayan a napateg. Kalpasanna paibinglaymo kadakuada no ania ti nasarakanda ken no kasano ti panagriknada maipapan iti Mangisalakan. Ibilangmo met ti panangawis kadagiti miembro ti klase a mangbasa iti Mosiah 15:10–12, a nangilawlawagan ni Abinadi no ania ti kayat a sawen ti ragup ti balikas a “ti bukelna.” Kasano a matulongannatayo daytoy a makaawat iti Isaias 53:10?
Kayat ni Jesucristo nga agsublitayo Kenkuana.
-
Ti panangadal iti Isaias 54 ket mabalin a mangparegta kadagiti miembro ti klase a makarikna iti pannakaupay gapu kadagiti basol wenno pagkapsutanda. Mabalinmo nga awisen dagiti miembro ti klase a mangsukisok iti kapitulo 54 para iti ragup ti balikas wenno bersikulo a mangipakita no kasano ti rikna ti Mangisalakan maipapan kadatayo. Kasano a kayatna a mariknatayo maipapan kadagiti napalabas a basoltayo ken pagkapsutan? Kasano ti kayatna a pannakariknatayo Kenkuana? Allukoyem dagiti miembro ti klase a mangibinglay iti ania man a banag a masursuroda maipapan ken ni Jesucristo manipud iti daytoy a kapitulo. Ti palawag ni Presidente Dieter F. Uchtdorf iti “Dagiti Nainayon a Resources” ket mabalin a mangnayon iti panaglilinnawagyo.
Dagiti Nainayon a Resources
Babaen ken ni Jesucristo maaddaantayo iti namnama.
Insuro ni Presidente Dieter F. Uchtdorf:
Saan a napateg no kasano man ti kadakkel ti mabalin a pannakadadael ti panagbiagtayo. Saan a napateg no kasano man ti mabalin a kadagsen dagiti basoltayo, no kasano man ti mabalin a kalaus ti sakit ti nakemtayo, no kasano man ti mabalin a kinaliday, pannakabaybay-an, wenno pannakapaaypuspusotayo. Uray pay dagiti naawanan iti namnama, agbibiag iti pannakaupay, nagulbod, nangisuko iti integridadda, wenno timmalikud iti Dios ket mabalin a mabukelda manen.…
“Daytoy ti naragsak a damag ti ebanghelio: gapu iti agnanayon a plano ti kinaragsak nga impaay ti managayat a Nailangitan nga Amatayo ken babaen ti awan inggana a sakripisio ni Jesus a Cristo, saantayo laeng a masubbot manipud iti natnag a kasasaadtayo ken mapatarnawtayo manen, no di ketdi mapadur-astayo pay iti wagas a di maipagarup ti tao ket agbalintayo nga agtawid ti agnanayon a biag ken makiranud iti gloria ti Dios a di mailadawan” (“He Will Place You on His Shoulders and Carry You Home,” Liahona, Mayo 2016,102).
Panangpadur-as iti Panangisurotayo
Agbiag a maikari iti pannarabay ti Espiritu. No agbiagka a maikari iti ebanghelio, agbiagka a maikari iti Espiritu, nga isu ti kalaingan a mannursuro. No kalikagumam a gun-oden ti pannarabay ti Espiritu Santo, ikkannakanto kadagiti kapanunotan, impresion, ken managpartuat nga ideya maipapan ti no kasano a maipaaymo ti kasapulan dagiti sursuruam. (Kitaen iti Panangisuro iti Wagas ti Mangisalakan, 5.)