“Oktubre 10–16. Jeremias 1–3; 7; 16–18; 20: ‘Sakbay ti Panangbukelko Kenka iti Tian Nabigbigankan,’” Umaykayo, Sumurot Kaniak—Para iti Sunday School: Daan a Tulag 2022 (2021)
“Oktubre 10–16. Jeremias 1–3; 7; 16–18;20,” Umaykayo, Sumurot Kaniak—Para iti Sunday School: 2022
Jeremias, ni Walter Rane
Oktubre 10–16
Jeremias 1–3; 7; 16–18; 20
“Sakbay ti Panangbukelko Kenka iti Tian Nabigbigankan”
Bayat ti panagadalmo, panunotem maipapan kadagiti miembro ti klasem, ken agkalikagum iti pannarabay ti Espiritu a mangammo no ania dagiti mensahe a mabalin a kapapatgan kadakuada.
Isuratmo dagiti Impresionmo
Yawis ti Panagbibinninglay
Maysa a wagas a mabalinmo a pangallukoyan iti panagbibinninglay ket ti panangawis kadagiti miembro ti klase a mangisurat iti maysa a papel ti maysa a kinapudno ti ebanghelio a nasursuroda kabayatan ti panagadalda iti Jeremias itoy a lawas. Kalpasanna mabalinmo a kolektaen ti papel ket pumilika iti sumagmamano a paglilinnawagan kas maysa a klase. Kasano a tulongannatayo dagiti sinurat ni Jeremias a mangawat kadagitoy a kinapudno?
Isuro ti Doktrina
Naawagan dagiti propeta a mangisao iti balikas ti Apo.
-
Mabalinmo nga irugi ti panaglilinnawag maipapan iti awag ni Jeremias a kas maysa a propeta babaen ti panangipakita iti maysa a ladawan ti sibibiag a propeta ken panangkiddaw kadagiti miembro ti klase a mangibinglay no kasano a naammuanda nga inawagan isuna ti Dios. Mabalinmo pay nga idawat kadakuada a mangibinglay no kasano a natulonganda dagiti dadduma a mangammo iti daytoy napateg a kinapudno. Kasano a bendisionan daytoy a pannakaammo ti panagbiagtayo? Mabalin nga ilista dagiti miembro ti klase iti pisarra dagiti banag a masursuroda maipapan kadagiti propeta manipud iti Jeremias 1:4–19. Ania ti “paruten” wenno “rebbaen” dagiti propeta iti aldawtayo? Ania ti “bangonen” ken “imulada”? (bersikulo 10).
-
Awisem dagiti miembro ti klase a mangibinglay no ania ti nasursuro ni Jeremias maipapan iti bagina iti Jeremias 1:5. Kasano a maapektuan daytoy a pannakaammo ti panagministrona? Mabalin a basaen dagiti miembro ti klase ti palawag iti “Dagiti Nainayon a Resources” ken dagiti sumaganad a nasantuan a kasuratan a mangsuporta iti daytoy a kinapudno: Alma 13:1–4; Doktrina ken Katulagan 138:53–56; Abraham 3:22–23. Kasano nga apektuan dagitoy a kinapudno maipapan iti biagtayo sakbay daytoy a biag ti wagas a panagbiagtayo iti daytoy a biag?
Nagaramat dagiti tao iti nagkauna nga Israel kadagiti tangke tapno pagurnongan iti napateg a danum.
“Naglikudandak nga ubbog dagiti dandanum a sibibiag.”
-
Tapno mangguyugoy iti maysa a panaglilinnawag maipapan iti Jeremias 2:13, mabalinmo ti mangidrowing iti pisarra iti maysa a tangke (maysa a dakkel a pagkargaan iti uneg ti daga) ken maysa nga ubbog (kas iti maysa a gagangay a waig). Kalpasanna mabalin a basaen dagiti miembro ti klase ti Jeremias 2:13 ket isarita no apay a nasaysayaat a mangala iti danum manipud iti maysa nga ubbog imbes a mangkali iti maysa a tangke. Ania ti mabalin a naespirituan a kapada ti panangtarimaan kadagiti naburak a tangke? Mabalinmo nga awisen dagiti miembro ti klase a mangbasa kadagiti bersikulo manipud iti Jeremias 2 ken7 ken mangibinglay iti sumagmamano a wagas a panangbaybay-an dagiti Israelita ti “ubbog dagiti dandanum a sibibiag” (kitaen, kas pagarigan, iti, Jeremias 2:26–28; 7:2–11). Apay a ti “danum a sibibiag” ti maysa a nasayaat a simbolo para iti no ania ti ited ti Mangisalakan kadatayo?
Ummongento ti Apo dagiti taona.
-
Gapu ta indilig ni Jeremias ti pannakaummong ti Israel iti pannakaisalakan ti Israel manipud iti Egipto babaen ken ni Moises, mabalin nga ipakitam ti maysa a ladawan ti Exodo (kitaen iti balabala para iti Abril 4–10 iti Umaykayo, Sumurot Kaniak—Para kadagiti Indibidual ken Pamilia). Awisem dagiti miembro ti klase a mangilawlawag no kasano a napnuan iti kaipapanan ti Exodo kadagiti Israelita para kadagiti kaputotan. Kalpasanna mabalin a basaen dagiti miembro ti klase ti Jeremias 16:14–15 ken pagsasaritaan maipapan iti no kasano nga agbalin a napatpategto pay kadagiti tao ti Dios ti panaguummong ti Israel iti ud-udina nga aldaw (kitaen met iti Jeremias 3:14–18). Dagiti miembro ti klase a nangrebyu iti “Namnama ti Israel” kas paset ti bukodda a panagadal ket mabalinda nga ibinglay no ania ti nasursuroda maipapan iti kinapateg ti panaguummong ti Israel (kitaen iti Russell M. Nelson ken Wendy W. Nelson, “Hope of Israel” [worldwide youth devotional, Hunio 3, 2018], suplemento iti New Era ken Ensign, Ago. 2018, 2–17, ChurchofJesusChrist.org). Wenno mabalinmo nga irebyu dagiti paset dayta a mensahe kas maysa a klase. Kasano a maum-ummong ti Israel iti lugartayo?
Dagiti Nainayon a Resources
Am-ammonakayo ti Nailangitan nga Ama.
Insuro ni President Russell M. Nelson:
“Agnanayon a parsua ti espirituyo. Kinuna ti Apo ken ni propetana Abraham: ‘Napilikan sakbay pay ti pannakaipasngaymo’ [Abraham 3:23]. Kinuna ti Apo ti maysa a banag a maipada maipapan ken ni Jeremias [kitaen iti Jeremias 1:5] ken iti adu a dadduma pay [kitaen iti Alma 13:2–3]. Kinunana pay daytoy maipapan kenka [kitaen iti Doktrina ken Katulagan 138:55–56].
“Am-ammonakan ti Nailangitan nga Amam iti nabayag unayen a panawen. Sika, a kas anakna, pinilinakan nga umay iti daga iti daytoy umisu a panawen, nga agbalin a maysa a lider ti naindaklan nga aramidna iti daga. Napilika a saan a para kadagiti pisikal nga ugalim ngem para kadagiti naespirituan a kababalinmo, kas iti kinamaingel, kinatured, integridad ti puso, pannakawaw iti kinapudno, panagbisin iti kinasirib, ken tarigagay nga agserbi kadagiti dadduma.
“Napadur-asmo ti sumagmamano kadagitoy a kababalin iti biag sakbay sakbay daytoy a biag. Mabalinmo a padur-asen dagiti dadduma pay ditoy daga bayat ti panagpursigim nga agkalikagum a manggun-od kadagitoy” (“Decisions for Eternity,” Liahona, Nob. 2013,107).
Panangpadur-as iti Panangisurotayo
Agbiagka iti ebanghelio iti amin a pusom. Agbalinkanto a maysa a mannursuro a kas ken ni Cristo bayat ti panangawatmo iti ebanghelio ken panangbiagmo iti daytoy iti inaldaw a panagbiagmo. Ti panangisuro a kas ken ni Cristo saan nga agkasapulan nga agbalinka aperpekto—ikarigatam laeng ken agtultuloyka iti panangikarigatan. No sireregtaka nga aramidem ti amin a kabaelam ken agkiddawka iti pammakawan no agkamtudka, makapagbalinka a disipulo ni Cristo a kasapulanna kenka a pagbalinam. (Kitaen iti Panangisuro iti Wagas ti Mangisalakan, 13–14.)