“Oktubre 17–23. Jeremias 30–33; 36; Dagiti Un-unnoy 1; 3:‘Pagbalinekto ti Leddaangda a Rag-o,’” Umaykayo, Sumurot Kaniak—Para iti Sunday School: Daan a Tulag 2022 (2021)
“Oktubre 17–23. Jeremias 30–33; 36, Dagiti Un-unnoy 1; 3,” Umaykayo, Sumurot Kaniak—Para iti Sunday School: 2022
Ti Araraw ni Jeremias a Propeta, manipud iti kitikit a ladawan ti Pagadalan a Nazareno
Oktubre 17–23
Jeremias 30–33; 36; Dagiti Un-unnoy 1; 3
“Pagbalinekto ti Leddaangda a Rag-o”
Utobem dagiti impresion a naawatmo kabayatan ti bukod a panagadalmo iti Jeremias ken Dagiti Un-unnoy. Ania dagiti binatog manipud kadagitoy a kapitulo a mariknam nga agbalinto a napnuan kaipapanan kadagiti sursuruam?
Isuratmo dagiti Impresionmo
Yawis ti Panagbibinninglay
Tapno matulongan dagiti miembro ti klase a mangibinglay no ania ti nasursuroda manipud iti panagadalda iti nasantuan a kasuratan, mabalinmo nga isurat iti pisarra dagiti ragup ti balikas kas iti Nasursurok a…, Addaanak iti pammaneknek ti…, wenno Napadasak ti… Mabalin nga ibinglay dagiti miembro ti klase ti maysa a banag manipud iti Jeremias wenno Dagiti Un-unnoy a mangkumpleto kadagitoy a binatog.
Isuro ti Doktrina
Jeremias 30–31; 33; Dagiti Un-unnoy 1:1–7; 3:1–5
Iruarto ti Apo ti Israel manipud iti pannakabalud ken ummongenna ida.
-
Dagiti mensahe ti namnama kadagiti padto iti Jeremias ti makaited kadagiti miembro ti klase iti namnama iti bukodda a kasasaad. Nalabit a mailawlawag ti klasem dagiti kasasaad a mabalin a makaigapu kadagiti tao iti aldawtayo a makarikna ti kinaawan iti namnama kas iti narikna dagiti tao iti panawen ni Jeremias (kitaen iti Jeremias 30:5; 31: 15; Dagiti Un-unnoy 1:1–7; 3:1–5; ken ti adaw iti “Dagiti Nainayon a Resources”). Kalpasanna mabalinmo a bingayen dagiti miembro ti klase iti tallo a grupo ket awisem ti tunggal grupo a mangrebyu iti Jeremias 30; 31; ken 33 para kadagiti mensahe a makaisangbay iti namnama kadagiti tao iti agdama. Kasano a nakatulong kadatayo ti namnama iti Apo nga agibtur kadagiti pannubok?
“Isudanto dagiti taok, ket Siakto ti Diosda.”
-
Ti panangrebyu iti Jeremias 31:31–34; 32:37–42 ket makatulong iti klasem a mangutob kadagiti katulagan nga inaramidda. Maysa a wagas a pangyallukoy iti panaglilinnawag maipapan kadagitoy a bersikulo ket ti panangted kadagiti miembro ti klase iti sumagmamano a minuto a mangbasa kadagiti bersikulo ket kalpasanna isuratda iti papel ti maysa a saludsod a kayatda a damagen iti klase maipapan iti no ania ti nabasada. Kas pagarigan, mabalin a kayatda nga ilawlawag no ania ti kayat a sawen ti naisurat ti linteg ti Dios iti puspusotayo (kitaen iti Jeremias 31:33) wenno no kasano a tulongannatayo dagiti katulagan a mangam-ammo iti Apo (kitaen iti Jeremias 31:34). Mabalinmo ti mangkolekta kadagiti saludsod ket mangala iti sumagmamano a paglilinnawagan a sangkamaysa. Ania ti masursurotayo manipud kadagitoy a bersikulo a mangparegta kadatayo nga agbalin a natured iti panagtungpal kadagiti katulagantayo?
Dagiti nasantuan a kasuratan ket mabalin a maparegtanatayo nga agbabawi ket agsubli iti Apo.
Adda bileg dagiti nasantuan a kasuratan a mangyadayo kadatayo manipud iti dakes.
-
Mabalin a nakagun-od dagiti miembro ti klasem kadagiti nalawag a pannakaammo ken pannakaawat maipapan kadagiti nasantuan a kasuratan bayat ti panagadalda iti Jeremias 36 iti pagtaengan. Awisem ida a mangibinglay no ania ti nasursuroda. Mabalinmo pay nga idutok kadagiti miembro ti klase ti nagan ti maysa a tao iti kapitulo ket awisem ida a mangbasa maipapan iti no ania ti inaramid dayta a tao iti balikas ti Dios. Mabalin nga adalen dagiti miembro ti klase dagiti balikas ken tignay ti Apo (kitaen kadagiti bersikulo 1–3, 27–31); Jeremias (kitaen kadagiti bersikulo 4–7,32); Baruc (kitaen kadagiti bersikulo 4, 8–10, 14–18); Jehudi ken Ari Jehoiakim (kitaen kadagiti bersikulo 20–26); ken Elnatan, Dalaias, ken Gemarias (kitaen iti bersikulo 25). Kasano nga ipakita dagiti balikas ken tignaytayo no kasano ti riknatayo maipapan kadagiti nasantuan a kasuratan?
Dagiti Nainayon a Resources
Maaddaanka a kanayon iti namnama.
Dinakamat ni Presidente M. Russell Ballard ti sumagmamano a kasasaad a mabalin a makaigapu iti sumagmamano a mapukawan iti namnama, ket indiayana ti balakad maipapan iti no sadino ti pakasarakan iti namnama:
“Sumagmamano kadatayo ti mabalin a makasarak iti biagtayo a napnuan iti pannakaupay, pannakapaay, ken panagleddaang. Adu dagiti maupay a mangsaranget iti riribuk nga agpannuray iti lubong. Maluksaw dagiti dadduma kadagiti miembro ti pamiliada a maisungsong iti maysa a napegges, rumungrungsot nga ayus dagiti kumapkapuyen nga ik-ikkan pateg ken bumabbaban a pagrukodan iti kinadalus ti dayaw. … Adu payen ti nangipalubos iti bagbagida nga umawat iti saanen a maatur a kinadangkes ken kinaranggas ti lubong. Insukodan ti namnamada.…
“… Sumagmamano kadatayo ti mabalin a nakapukawen iti amin a namnama gapu iti basol ken salungasing. Mabalin a napalaus ti pannakairarem ti maysa a tao kadagiti wagas ti lubong ta awan ti makitana a pakaruaran ken mapukawna ti amin a namnama. Ti pakaasik iti amin a matnag iti daytoy a palab-og ti kabusor ket ti saan nga isusuko iti kaano man! Iti laksid ti mabalin a kasla kinaawan namnama dagiti banag wenno mabalin a kinaawan namnama ti pagbalinanda, mamatikayo koma kaniak, maaddaankayo a kanayon iti namnama. Kanayon” (“The Joy of Hope Fulfilled,” Ensign, Nob. 1992, 31–32).
“Simple laeng, ti panangiturongtayo kadagiti panunottayo ken pusotayo ken ni Jesucristo ti maysa a namnamatayo para iti naespirituan a kinatalged kadagitoy naririgat a panawen. … Ti pammati iti Dios ken iti Anakna, ni Jesucristo, isu ti kangrunaan a kasapulan tapno mapagtalinaedtayo ti natimbeng a pannirigan iti panawen ti pannubok ken rigat” (“The Joy of Hope Fulfilled,” 32).
Panangpadur-as iti Panangisurotayo
Suroten ti Espiritu. Dimo maipadles no kasanonto a maisuro ti tunggal adalen, ngem no denggem dagiti parikna ti Espiritu, tarabayennanto ti adalen. No naespirituan a nakasaganaka, itedto ti Apo kenka “iti mismo a kanito, no anianto ti isaom“ (Doktrina ken Katulagan 100:6; kitaen met iti Panangisuro iti Wagas ti Mangisalakan, 10).