Umaykayo, Sumurot Kaniak, ni Scott Sumner

Oktubre 24–30

Ezequiel 1–3; 33–34; 36–37; 47

“Maysa a Baro nga Espiritu Isaadkonto iti Unegyo”

Tinaginayon ti Apo dagiti balikas ni Ezequiel para iti nainsiriban a panggep ken mabalin a mangbendision kadagiti miembro ti klasem. Utobem daytoy bayat ti panangadalmo kadagiti sinurat ni Ezequiel iti daytoy a lawas.

Isuratmo dagiti Impresionmo

Yawis ti Panagbibinninglay

Impagarup dagiti tao a nakangngeg kadagiti balikas ni Ezequiel a “napipintas” ken “makaay-ayo,” “ngem dida [inaramid] ida” (kitaen iti Ezequiel 33:30–33). Mabalin nga ibinglay dagiti miembro ti klase ti maysa a binatog a nasarakanda kadagiti sinurat ni Ezequiel a nangparegta kadakuada a mangaramid iti maysa a banag.

Isuro ti Doktrina

Ezequiel 34

Awisennatayo ti Apo a mangpakan kadagiti karnerona.

Tapno matulongan dagiti miembro ti klase a mangsapul iti personal a kaipapanan iti Ezequiel 34, mabalinmo nga isurat iti pisarra dagiti situasion a mabalin a pakaipasanguanda, kas iti panagsagana nga agserbi iti mision, panagpatanor kadagiti annak, wenno umaw-awat iti ministering assignment. Mabalin a mangala dagiti miembro ti klase iti maysa nga utobenda bayat ti siuulimek a panangbasada iti Ezequiel 34:1–10. Awisem ida a mangibinglay no ania a balakad a maibatay kadagitoy a bersikulo a mabalinda nga ited iti maysa a tao iti pinilida a situasion. Ania ti kayat a sawen ti mangpakan iti bagbagitayo imbes a dagiti pangen ti Apo? Kasano a makapagbalintayo a pastor kas iti Mangisalakan? (kitaen kadagiti bersikulo 11–16).

Mabalin a mariknam a naparegtaka nga agdamag kadagiti saludsod a makatulong kadagiti miembro ti klase a mangutob iti simbolismo iti Ezequiel 34:11–31. Kas pagarigan, ania ti mabalin nga ibagi ti “nasayaat a pagaraban” ken “nasayaat a pagapunan” iti bersikulo 14? Ania ti pagdumaan ti karnero a “napukaw“ ken ti maysa a “napapanaw”? (bersikulo 16). Kasano nga arayaten ti Mangisalakan dagiti agpada a kita ti karnero? Mabalin nga ibinglay dagiti miembro ti klase dagiti dadduma pay a simbolo a masarakanda kadagitoy a bersikulo ket pagsasaritaan no ania ti isuro kadakuada dagitoy a simbolo maipapan ken ni Jesucristo.

Ezequiel 37

Ummongen ti Apo dagiti taona ket ikkanna ida iti baro a biag.

• Ti panagbasa iti Ezequiel 37 ken panangpanunot maipapan iti kari ti Apo a mangummong iti Israel ket makaited kadatayo kadagiti nalawag a pannakaammo ken pannakaawat maipapan iti no ania ti kaipapanan ti panaguummong ken no kasano a makiramantayo iti daytoy. Tapno matulongan dagiti miembro ti klase a mangsapul kadagitoy a nalawag a pannakaammo ken pannakaawat [insights], mabalinmo nga isurat iti pisarra dagiti saludsod kas iti Ania ti padpadasen ti Apo nga ipatungpal babaen ti panangummong iti Israel? Kasano nga ipatpatungpalna daytoy? Kalpasanna mabalinmo nga idawat iti kagudua ti klase a mangbasa iti Ezequiel 37:1–14 ken ti sabali pay a kagudua a mangbasa iti Ezequiel 37:15–28 bayat ti panagsukisokda kadagiti nalawag a pannakaammo ken pannakaawat a mabalin nga ipaay dagitoy dua a binatog kadagiti saludsod iti pisarra. Mabalin a makatulong daytoy a mangilawlawag a dagiti sarukod da Jose ken Juda a nadakamat kadagiti bersikulo 16–19 ket mangibagi iti Libro ni Mormon ken Biblia. Kabayatan ti panangibinglay dagiti miembro ti klase kadagiti sungbatda, allukoyem ida a mangisarita maipapan iti akemda iti panangummong iti Israel iti ud-udina nga aldaw.

Nakita ni Ezequiel iti parmata ti maysa a karayan nga agayus manipud iti templo ket agasanna ti Natay a Baybay.

Ezequiel 47:1–12

Isangbay ti templo ti naespirituan a pannakaagas.

• Makatulong dagiti ladawan kadagiti miembro ti klase a maawatanda ti parmata a nailadawan iti Ezequiel 47:1–12. Kas pagarigan, mabalinmo nga ipakita ti ladawan ti maysa a templo, maysa a karayan, maysa a disierto, ken ti Natay a Baybay (kitaen dagiti ladawan iti balabala itoy a lawas iti Umaykayo, Sumurot Kaniak—Para kadagiti Indibidual ken Pamilia ken dagiti Ladawan iti Biblia, num. 3, “Langalang ti Juda”). Mabalin a makatulong nga ilawlawag a ti Natay a Baybay ket naapgad unay tapno saan a makapagbiag ti ikan ken mulmula ditoy. Mabalin a basaen dagiti miembro ti klase dagiti bersikulo 1–12 ket ibinglayda no ania ti nakaawisan ti riknada maipapan kadagiti danum a nailadawan iti parmata (kitaen met iti Apocalipsis 22:1 ken ti palawag iti “Dagiti Nainayon a Resources”). Mabalinda pay ti agdrowing kadagiti ladawan ti parmata ni Ezequiel. Ania ti mabalin nga isimbolo dagiti danum? Ania ti mabalin nga ibagi dagiti kayo a nailadawan iti bersikulo 12 ? Nalabit a mabalin nga ibinglay dagiti miembro ti klase no kasano a nangyeg kadakuada iti naespirituan a biag ken pannakaagas ti templo ken dagiti bendisionna.

Dagiti Nainayon a Resources

Maagasannatayo dagiti bendision ti templo.

Maipanggep iti danum nga agay-ayus manipud iti templo iti parmata ni Ezequiel (kitaen iti Ezequiel 47:1–12), napaliiw ni Elder Dale G. Renlund:

“Nakadidillaw dagiti dua a kababalin ti danum. Umuna, uray no awan dagiti pagayusan ti bassit a waig, dumakkel daytoy kas maysa a napigsa a karayan, agbalin a nalawlawa ken ad-adalem ken umad-adayo ti pagayusanna. Maysa a banag a maipada ti mapasamak kadagiti bendision nga agayus manipud iti templo bayat ti pannakailantip dagiti tao kas sangapamiliaan. Mapasamak ti napnuan kaipapanan a panagdur-as nga agsubli ken agtultuloy agingga kadagiti kaputotan kabayatan ti panamagkaykaysa dagiti ordinansa ti panaglantip kadagiti pamilia.

“Maikadua, pinabaro ti karayan ti amin a banag a nasagid daytoy. Kasta met kadagiti bendision ti templo nga addaan iti nakaskasdaaw a kabaelan a mangagas. Makaagas dagiti bendision ti templo iti puspuso ken biag ken pamilia” (“Family History and Temple Work: Sealing and Healing,” Liahona, Mayo 2018, 47–48; kitaen met ti video nga “And the River Will Grow,” ChurchofJesusChrist.org).

Panangpadur-as iti Panangisurotayo

Tulongam dagiti dadduma nga umawat iti Espiritu. “No dadduma mabalin a masulisog dagiti mannursuro a mangipagarup a ti pannakaammoda wenno wagas wenno personalidadda ti mangparegta kadagiti sursuruanda. … Panggepmo kas maysa a mannursuro ti saan a mangidatag iti maysa a napintas a presentasion ngem ketdi tapno makatulong iti dadduma pay nga umawat iti impluensia ti Espiritu Santo” (Panangisuro iti Wagas ti Mangisalakan, 10).