“Oktubre 31–Nobiembre 6. Daniel 1–6: ‘Awan ti Sabali a Dios a Makaispal,’” Umaykayo, Sumurot Kaniak—Para iti Sunday School: Daan a Tulag 2022 (2021)
“Oktubre 31–Nobiembre 6. Daniel 1–6,” Umaykayo, Sumurot Kaniak—Para iti Sunday School: 2022
Ibuksilan ni Daniel ti Tagtagainep ni Nabucodonosor, ni Grant Romney Clawson
Oktubre 31–Nobiembre 6
Daniel 1–6
“Awan ti Sabali a Dios a Makaispal”
Adu a miembro ti klase ti pamiliarto iti sumagmamano nga estoria iti libro ni Daniel. Bayat ti panagadalmo ken panagsaganam a mangisuro, agkalikagum a manggun-od iti pannarabay manipud iti Espiritu maipapan no kasano a matulongam dagiti miembro ti klase a mangsapul iti personal a kaipapanan manipud kadagitoy a kapitulo.
Isuratmo dagiti Impresionmo
Yawis ti Panagbibinninglay
Mabalin a makatulong nga awisem dagiti miembro ti klase a mangibinglay no kumustan ti bukod ken sangapamiliaan a panagadalda iti nasantuan a kasuratan. No ibinglay dagiti miembro ti klase ti maysa a nalawag a pannakaammo ken pannakaawat maipapan iti maysa a banag nga insuro kadakuada ti Espiritu iti daytoy a lawas, mabalinmo a saludsoden kadakuada no ania ti ar-aramidenda a nangiturong kadagita a nalawag a pannakaammo ken pannakaawat.
Isuro ti Doktrina
Makapagtalektayo iti Apo no masubok ti pammatitayo.
-
Tapno mangirugi iti panaglilinnawag maipapan no kasano nga impakita da Daniel, Sidrac, Misac, ken Abdenago iti pammati iti Apo, mabalinmo a kiddawen iti sumagmamano a miembro ti klase a manggupgop kadagiti karit a nakaipasanguan dagitoy uppat a lallaki, a nailadawan iti Daniel 1, 3, ken6. Apay koma a narigat ti agbalin a napudno kadagitoy a situasion? Ania dagiti situasion a pakaipasanguantayo a mangkarit iti pammatitayo? Mabalin a sukisoken dagiti miembro ti klase ti Daniel 1:10–13; 3:15–18; 6:10, a mangsapsapul no kasano a nagresponde dagitoy uppat a lallaki kadagiti karitda. Kasano a matulongannatayo dagiti pagwadanda kadagiti panagkagumaantayo nga agbalin a napudno a disipulo ni Jesucristo?
-
Adu kadatayo, kas ken ni Daniel ken dagiti gagayyemna, a nakarikna iti pammilit a mangikompromiso kadagiti pagrukodantayo. Ania ti sumagmamano kadagiti paggapuan daytoy a pammilit iti biagtayo? Tapno matulongan dagiti miembro ti klase a masursuruan manipud iti pagwadan ni Daniel ken dagiti gagayyemna, mabalinmo a bingayen ti klase iti tallo a grupo ket dutokam ti tunggal grupo a mangrebyu iti maysa kadagiti sumaganad a kapitulo: Daniel 1, 3, wenno6. Kasano a binendisionan ti Apo da Daniel, Sidrac, Misac, ken Abdenago idi pinilida ti agbalin a napudno iti baet ti pammilit a naipasango kadakuada? Mabalin nga ibinglay ti tunggal grupo iti klase no ania ti natakuatanda. Kalpasanna mabalin nga agi-innuman dagiti miembro ti klase maipapan iti no kasano nga agtalinaed a napudno iti baet ti pammilit iti kagimongan wenno dadduma pay a kita ti pammilit. Mabalinda pay nga ilawlawag ti kinapateg ti panagsapul kadagiti nasayaat a gagayyem a mangsuporta kadatayo kadagiti pagrukodantayo.
Ti Simbaan ni Jesucristo dagiti Santo iti Ud-udina nga Aldaw ti pagarian ti Dios iti daga.
-
Ti panangilawlawag iti Daniel 2 ket makatulong iti klasem a makaawat no kasano nga ipatpatungpal ti Ti Simbaan ni Jesucristo dagiti Santo iti Ud-udina nga Aldaw ti pagtungpalanna kas naipadto a bato a “natikap iti bantay” (bersikulo 45). Tapno mangirugi, mabalinyo nga irebyu kas maysa a klase ti panangiladawan ken panangibuksil ni Daniel iti tagtagainep ni Nabucodonosor, a masarakan iti Daniel 2:31–45. Kalpasanna mabalinmo nga ipakita ti maysa a ladawan ti maysa a bato (wenno mangidrowing iti maysa iti pisarra). Awisem dagiti miembro ti klase a mangibinglay no ania ti masursuroda maipapan iti pagarian ti Dios babaen ti panangidilig iti daytoy kadagiti panangiladawan iti bato iti Daniel 2:34–35, 44–45. Nalabit a mabalin nga ammo dagiti miembro ti klase ti sumagmamano a pakasaritaan ti Simbaan iti lugaryo a mabalinda nga ibinglay. Kasano a nakitatayon dagiti padto ni Daniel a naipatungpal iti bukodtayo a biag?
Ti panangawat iti paltiing ket agkasapulan iti naespirituan a panagsagana.
-
Nalabit a pakairanudan dagiti miembro ti klase manipud iti panagsursuro maipapan no kasano nga insagana ni Daniel ti bagina nga umawat iti paltiing a kasapulan tapno mangiladawan ken mangyulog iti tagtagainep ni Nabucodonosor. Mabalinmo a rugian babaen ti panangkiddaw kadagiti miembro ti klase a mangrebyu iti Daniel 2:1–15 ken kalpasanna ibinglayda no kasano ti mariknada no addada koma iti sasaaden ni Daniel. Awisem ida a mangsukisok iti Daniel 2:16–18 tapno maammuan no ania ti inaramid ni Daniel. Ania ti masursurotayo manipud iti Daniel 1:17 maipapan no kasano nga insagana ti Dios ni Daniel? Ania ti masursurotayo manipud ken ni Daniel a makatulong kadatayo bayat ti panagkalikagumtayo a manggun-od iti bukod a paltiing? Ania ti masursurotayo manipud kadagiti balikas ken tignay ni Daniel kalpasan a naawatna ti tulong ti Apo? (kitaen iti Daniel 2:20–30).
Panangiladawan ken ni Daniel ken dagiti gagayyemna nga agkedkedked iti taraon ti ari, ni Brian Call
No mapagduaduaan ti ibungana, mapilitayo latta ti pammati.
-
Ti padas da Sidrac,Misac, ken Abdenago a masarakan iti Daniel 3 ket makatulong kadagiti miembro ti klasem nga ad-adda a naan-anay a maawatanda no ania ti kayat a sawen ti maaddaan iti pammati ken ni Jesucristo. Mabalinmo nga awisen dagiti miembro ti klase a manggupgop iti karit a nakaipasanguan da Sidrac, Misac, ken Abdenago (kitaen iti Daniel 3:1–12) ket kalpasanna paglilinnawagan no kasano a nagrespondeda (kitaen iti Daniel 3:13–18). Ania ti masursurotayo maipapan iti pammati manipud iti sungbat dagitoy a lallaki? Mabalinmo nga isurat iti pisarra dagiti ragup iti balikas a Kabaelan ti Diostayo a… ken Ngem no saan… manipud kadagiti bersikulo 17–18. Mabalin nga isingasing dagiti miembro ti klase no kasano a mabalinda a punuan dagiti blangko kadagiti kasasaad a mabalin a pakaipasanguanda. Kas pagarigan, mabalinda nga isingasing ti “Kabaelan ti Dios a sungbatan amin dagiti saludsodko” ken “Ngem no saan, siaanusakto nga agtalek Kenkuana.” Bayat ti panangibinglay dagiti miembro ti klase dagiti pagarigan, allukoyem ida a mangisarita maipapan no kasano a tulongan ken papigsaennatayo ti Mangisalakan uray no saantayo nga ammo no kasano ti pagbalinanto dagiti banag.
Panangpadur-as iti Panangisurotayo
Usarem dagiti tulong a ladawan [visual aids]. “Ti arte, agraman dagiti ladawan, video, ken panangidrama, ket makatulong a mangawis iti pasnek dagiti agad-adal—nangnangruna dagiti visual learner—ken mamagbalin nga ad-adda a nakallalagip dagiti pakaammuan iti nasantuan a kasuratan” (Panangisuro iti Wagas ti Mangisalakan, 22).