nobia ken nobio iti paraangan ti templo

Nobiembre 7–13

Oseas 1–6; 10–14; Joel

“Ayatekto Ida a Nawadwad”

Bayat ti panagadalmo ken panagsaganam iti daytoy a lawas, ibilangmo no ania kadagiti napintas ken makaparegta a mensahe manipud iti libro ti Oseas ken Joel a mabalin a makatulong a mangipaay kadagiti kasapulan dagiti sursuruam.

Isuratmo dagiti Impresionmo

icon iti panagbibinninglay

Yawis ti Panagbibinninglay

Tapno matulongan dagiti miembro ti klase a mangibinglay no ania ti nasursuroda itoy a lawas, mabalinmo nga awisen ida nga isurat iti pisarra ti maysa a balikas wenno ragup ti balikas a nangparegta kadakuada bayat ti panagadalda. Kalpasanna mabalinda nga ibinglay no apay a napateg ti balikas wenno ragup ti balikas kadakuada. Dagitoy a balikas ken ragup ti balikas ti mabalin a makatulong a mangtarabay kadagiti dadduma pay iti panaglilinnawagyo.

icon iti panangisuro

Isuro ti Doktrina

Oseas 1–3; 14

Ti Apo kanayon nga awisennatayo nga agsubli Kenkuana.

• Mabalinmo nga irugi ti panangilawlawag iti Oseas 1–3 babaen ti panangisurat iti kallaysa iti pisarra ken panangidawat kadagiti miembro ti klase a mangilista kadagiti balikas nga adda pakainaiganda iti kallaysa. Kasano a maipada ti panagaramid iti katulagan iti Apo iti iseserrek iti maysa a kallaysa? Kasano a maipada ti panaglabsing iti dayta a katulagan iti panagbalin a saan a napudno iti asawa? (kitaen iti Oseas 2:5–7,13). Kalpasanna mabalin a pagsasaritaan ti klase maipapan no kasano nga isimbolo ti relasion da Oseas ken Gomer ti relasion ti Apo ken dagiti taona. Ania ti isuro kadatayo ti Oseas 2:14–23 ken Hosea14 maipapan iti ayat ken asi ti Apo? Kasano nga ipakitatayo iti Apo ti ayat ken kinapudnotayo Kenkuana?

• Iladawan tiOseas 14 ti adu a napipintas a kari nga inaramid ti Apo iti balay ti Israel no agsublida Kenkuana. Nalabit a mabalin a sukisoken dagiti miembro ti klase daytoy a kapitulo a mangsapsapul kadagitoy a kari. Ania ti kinuna ti Apo nga aramidennanto? Ania ti mabalin a kayat a sawen ti ragup ti balikas nga “ayaten ida a nawadwad”? (bersikulo 4). Ania ti isuro kadatayo dagiti metapora iti mula kadagiti bersikulo 5–8 maipapan kadagiti bendision ti Apo kadatayo, a pakairamanan dagiti bendision ti panagbabawi?

  babai a nakatugaw iti daga a nakaparabaw ti ima ti lalaki iti ulona

  Ni Gomer a managbasol, a mangibagi iti Israel, ket naidiayaan iti pannubbot ti Apo. Panangiladawan ni Deb Minnard, nalisensiaan manipud iti goodsalt.com

Oseas 6:6; Joel 2:12–13

Ti debosion iti Dios nasken a marikna iti uneg, saan laeng a maipeksa iti ruar.

• TiOseas 6:6 ken Joel 2:12–13 ket maipanggep iti panagisakripisio iti animal ken ti panangpigis iti kawes kas tanda ti panagladingit. Idinto a saan a pamiliar dagita a kannawidan iti agdama, makaiturong dagitoy a bersikulo iti maysa a panaglilinnawag maipapan iti no ania ti kapatgan iti Apo. Mabalin nga aggigiddankayo a mangbasa iti Oseas 6:6 ket paglilinnawagan no ania ti kayat a sawen daytoy a bersikulo. Awisem ti sumagmamano a miembro ti klase a mangbasa iti Mateo 9:10–13 ken dagiti dadduma pay a mangbasa iti Mateo 12:1–8. Kalpasanna mabalin nga agsisinnuro dagiti miembro ti klase no kasano a dagitoy a pasamak iti panagministro ti Mangisalakan ti makatulong kadatayo a makaawat kadagiti pagbatayan a naisuro iti Oseas 6:6. Kasano a matungpaltayo daytoy a pagbatayan iti aldawtayo?

  Mabalin pay nga aggigiddankayo a mangbasa iti Joel 2:12–13 ket paglilinnawagan no ania ti mabalin a kayat a sawen ti panangpigis kadagiti pusotayo ken saan laeng a dagiti pagan-anaytayo. Ania ti masursurotayo manipud kadagitoy a bersikulo maipapan no ania ti kaipapanan ti agbalin a pudno a disipulo ni Jesucristo?

Joel 2

“Ibukbokkonto ti espirituk iti amin a lasag.”

• Tapno mangirugi iti panaglilinnawag iti Joel 2, mabalinmo nga ibinglay iti klase no ania ti kinuna ni Moroni maipapan iti daytoy a padto idi sinarungkaranna ni Joseph Smith iti 1823 (kitaen iti Joseph Smith—Pakasaritaan 1:41). Mabalin a mangibinglay dagiti miembro ti klase no kasano ti riknada a maipatpatungpalen dagiti padto iti Joel 2:28–32 iti aldawtayo. Mabalinmo pay nga ilawlawag no kasano a mainaig dagiti balikas ni Elder David A. Bednar iti “Dagiti Nainayon a Resources” iti padto ni Joel. Mabalin a paglilinnawagan dagiti miembro ti klase no ania ti kaipapanan kadakuada ti makarikna iti pannakaibukbok ti Espiritu Santo iti inaldaw a panagbiagda. Ania ti mabalin nga aramidentayo no mariknatayo a kasla saantayo nga umaw-awat iti dayta a panangibukbok? Kasano a matulongantayo dagiti “annak[tayo] a lallaki ken annak[tayo] a babbai” nga umawat iti daytoy? (bersikulo 28).

dagiti nainayon a resources icon

Dagiti Nainayon a Resources

“Makapagpannuraytayo iti Espiritu Santo a mangtartarabay kadatayo.”

Insuro ni Elder David A. Bednar:

“Masansan a parparigatentayo ti bagbagitayo nga umawat iti bukod a paltiing. Iti dayta kayatko a sawen, ti kari iti katulagan a no dayawentayo dagiti katulagantayo, mabalin nga adda a kanayon kadatayo ti Espiritu Santo nga agbalin a kanayon a kadkaduatayo. Ngem pagsasaritaantayo maipapan iti daytoy ket ibilangtayo a manmano a pasamak ti kasla dumdumngeg iti timek ti Apo babaen ti Espirituna. … Nasken nga adda kadatayo [ti Espiritu] iti amin a kanito. Saan nga iti tunggal apagdarikmat, ngem no ti maysa a tao ket ar-aramidenna ti amin a kabaelanna—saanmo kasapulan ti agbalin a perpekto—ngem no aramidentayo ti amin a kabaelantayo ket saantayo nga agar-aramid iti nadagsen a basol, ngarud mabilangtayo iti Espiritu Santo a mangtartarabay kadatayo.…

“… Kasla mamatitayo a ti Espiritu Santo ket dramatiko ken dakkel ken kellaat, idinto a naalumamay ken bassit ken dumakdakkel iti panaglabas ti panawen. Saanyo a kasapulan ti mangbigbig nga umaw-awatkayo iti paltiing iti kanito nga umaw-awatkayo iti paltiing” (“Elder David A. Bednar Discussion” [sardam iti maysa a General Authority, Peb. 7, 2020], broadcasts.ChurchofJesusChrist.org).

Panangpadur-as iti Panangisurotayo

Agbalin a nabara a mangpaspasangbay. Kasapulan dagiti agad-adal a mangammo nga ipatpategmo ida ken ti naespirituan a panagdur-asda. Ti maysa a nasayaat a wagas tapno ipakita daytoy kadakuada ket babaen ti panangkablaaw kadakuada a sibabara apaman a sumangpetda iti klase. (Kitaen iti Panangisuro iti Wagas ti Mangisalakany, 15.)