lalaki nga agkarkaradap iti igid ti baybay nga adda baliena iti baybay iti likudanna

Ni Jonas iti Igid ti Baybay iti Nineve, ni Daniel A. Lewis

Nobiembre 21–27.

Jonas; Mikias

“Pagay-ayatanna iti Kinamanagayat”

Agkasapulan ti manayon a kumbersion iti ad-adu ngem iti maysa a makaparegta nga adalen iti Sunday School iti tunggal sabali a lawas. Allukoyem dagiti miembro ti klase nga agkalikagum a manggun-od iti bukod a naespirituan a padas iti unos ti panagbiagda.

Isuratmo dagiti Impresionmo

icon iti panagbibinninglay

Yawis ti Panagbibinninglay

Ibilangmo ti panangisurat iti ragup ti balikas a kas iti sumaganad iti pisarra: Maysa a kinapudno a mangipalagip kaniak, Maysa a baro a banag a nasursurok, ken Maysa a banag a kayatko nga adalen nga ad-adda pay. Ikkan dagiti miembro ti klase iti oras a mangrebyu iti no ania ti naadalda iti Jonas ken Mikias a mainaig iti maysa kadagiti ragup ti balikas iti pisarra.

icon iti panangisuro

Isuro ti Doktrina

Jonas 1–4; Mikias 7:18–19

Manangngaasi ti Apo iti amin nga umasideg Kenkuana.

Ti panangipalagip iti klasem maipapan iti asi ti Apo ket makatulong kadakuada a makarikna iti ayatna para kadakuada ken mangparegta kadakuada nga agbabawi. Mabalinmo nga awisen ti klase a mangbasa iti Mikias 7:18–19 ken mangilista iti pisarra ti sumagmamano a pasamak iti Jonas 1–4 a mangipakita nga agragsak ti Apo iti asi. Ania dagiti dadduma pay a padas maipapan iti asi ti Dios a maibinglaytayo—manipud kadagiti nasantuan a kasuratan wenno iti bukodtayo a biag?

Makaparegta kadatayo nga agbalin a naas-asi no mapadpadasantayo ti asi ti Apo. Daytoy ti maysa a kapanunotan a makatulong kadagiti miembro ti klase a masursuruan maipapan iti asi manipud iti libro ni Jonas. Mabalinmo nga isurat ti maysa a saludsod kas iti daytoy iti pisarra: Ania ti isuro kaniak ti asi ti Dios, kas naipakita iti Jonas 1–4, maipapan iti panagbalinko a naas-asi? Mabalin a pumili ti tunggal miembro ti klase iti maysa a kapitulo nga irebyu ket sapulen dagiti sungbat iti saludsod. Ikkam dagiti miembro ti klase iti oras a mangutob kadagiti gundaway nga adda kadakuada a mangsukat kadagiti managhusga a galad kadagiti manangngaasi a galad iti bagbagida wenno iti dadduma.

dua a tao nga agsarsarita iti karayan

Maibinglaytayo ti ebanghelio kadagiti annak ti Dios.

Jonas 1; 3–4

Nasken a dumngeg amin dagiti annak ti Dios iti ebanghelio.

• Maysa a wagas a pakagun-odan kadagiti adalen manipud iti estoria ni Jonas ket ti panangidilig iti daytoy kadagiti pakaammuan maipapan kadagiti misionario iti Libro ni Mormon. Ibilangmo ti panangaramid iti dua a kolum iti pisarra nga addaan kadagiti paulo a Jonas ken Ni Alma ken dagiti Lallaki nga Annak ni Mosiah. Awisem ti klase tapno pagdasigen ti ugali ni Jonas maipapan iti panangisuro kadagiti tao ti Nineve (kitaen iti Jonas 1; 3–4) ken ti ugali dagiti annak a lallaki ni Mosiah maipapan iti panangisuro kadagiti Lamanite (kitaen iti Mosiah 28:1–5; Alma 17:23–25). Ania ti masursurotayo manipud iti daytoy nga aramiden maipapan iti panangibinglay iti ebanghelio iti amin nga annak ti Dios?

• Kas ken ni Jonas, adu kadatayo ti makarikna iti panagkedked a mangawis kadagiti dadduma nga umasideg iti Apo. Ania dagiti posible a rason ti panaglibas ni Jonas manipud iti pagrebbenganna a managballaag kadagiti tao ti Nineve? Apay a no dadduma mabalin nga agkedkedtayo a mangibinglay iti ebanghelio? Mabalin nga ibinglay dagiti miembro ti klase kadagiti wagas a nakatulongan ti Apo kadakuada a mangparmek iti panagkedkedda. Ti balakad ni Presidente Henry B. Eyring iti “Dagiti Nainayon a Resources” ti nalabit a makatulong kadagiti miembro ti klase a mangilasin kadagiti pagbatayan a mabalin a mangpabileg kadagiti panagkagumaantayo a mangibinglay iti ebanghelio.

Mikias 6:6–8

“Ania ti itugotmonto iti saklang ni Jehova?”

• Dakamaten tiMikias 6:6–7 ti sumagmamano nga elemento dagiti nagkauna a ritual ti Judio. Ngem napatpateg pay ti sumagmamano a banag iti Dios ngem dagiti akinruar a seremonia. Awisem dagiti miembro ti klase a mangsarak kadagita a napapateg a banag iti bersikulo 8. Nalabit a mailasin dagiti miembro ti klase dagiti kangrunaan a ragup ti balikas iti daytoy a bersikulo ket paglilinnawagan no ania ti kaipapanan ti tunggal ragup ti balikas. Kalpasanna mabalinda ti mangala kadagiti paggugustoda a ragup ti balikas, mangsapul kadagiti mainaig a nasantuan a kasuratan iti Pangiwanwan iti Nasantuan a Kasuratan wenno maysa a mainaig a himno iti libro ti himno, ket ibinglayda no ania ti masursuroda. Apay a napateg dagitoy a pagbatayan iti Apo?

dagiti nainayon a resources icon

Dagiti Nainayon a Resources

Ayat, pagwadan, ken pammaneknek.

Kalpasan ti panangilawlawag iti pammallaag ni Jonas kadagiti tao ti Nineve, imbinglay ni Presidente Henry B. Eyring iti padas a nangtedan ni nanangna iti maysa a ballaag kenkuana:

“Malagipko pay laeng ni nanangko a nalanay a makisarsarita kaniak iti maysa a malem ti Sabado idi, ubingak pay a bassit, dinawatko ti pammalubosna iti panangaramidko iti maysa a banag nga impagarupko a naan-anay a nainrasonan ken ammona a napeggad. Masmasdaawak pay laeng iti bileg a naited kenkuana, a patiek a naggapu iti Apo, tapno mangbaliw iti panggepko iti sumagmamano laeng a balikas. Bayat ti pananglagipko, isu dagitoy: ‘O, panagkunak sika kabaelam nga aramiden dayta. Ngem ti pili ket adda kenka.’ Ti laeng ballaag ket adda iti panangyunay-unay nga inkabilna dagiti balikas a kabaelan ken pili. Ngem umdasen kaniak dayta.

“Ti bilegna a mangballaag nga addaan iti manmano unay a balikas ket nagtaud iti tallo a banag nga ammok maipapan kenkuana. Umuna, ammok nga ay-ayatennak. Maikadua, ammok a naaramidnan ti kayatna nga aramidek ket nabendisionan gapu iti daytoy. Ken maikatlo, impakitana kaniak ti awan duadua a pammaneknekna a ti pili a nasken nga aramidek ket napateg unay tapno ibaganto ti Apo kaniak no ania ti aramidek no kiniddawko Kenkuana. Ti ayat, pagwadan, ken pammaneknek: dagita dagiti tulbek iti dayta nga aldaw” (“A Voice of Warning,” Ensign, Nob. 1998, 32).

Panangpadur-as iti Panangisurotayo

Isaganam ti bagim. Mangrugi ti nabileg a panangisuro iti ebanghelio iti panangisagana iti bagbagitayo. Sakbay nga isaganam ti leksionmo, ipamaysam ti panangpunno iti pusom iti Espiritu Santo babaen iti napnuan kaipapanan a panagadal ken panagkararag. (Kitaen iti Panangisuro iti Wagas ti Mangisalakan, 12.)