“Agnanayon dagiti dalanna” (Habacuc 3:6). Idi Punganay Isu ti Balikas, ni Eva Timothy

Nobiembre 28–Disiembre 4

Nahum; Habacuc; Zofonias

“Agnanayon dagiti Dalanna”

Ti pagwadam kas maysa nga agad-adal iti ebanghelio ket mabalin a mangbendision kadagiti miembro ti klasem. Ibinglaymo kadakuada no kasano a tultulongannaka ti Espiritu Santo a makaaawat kadagiti nasantuan a kasuratan, ken ipeksam ti panagtalekmo nga Isu ti makatulong met kadakuada.

Isuratmo dagiti Impresionmo

Yawis ti Panagbibinninglay

Tapno mangted dagiti miembro ti klase iti gundaway a mangibinglay kadagiti nalawag a pannakaammo ken pannakaawat manipud iti panagadalda iti nasantuan a kasuratan, mabalinmo nga isurat ti Nahum, Habacuc, ken Zofonias kas paulo iti pisarra. Kalpasanna mabalin nga isurat dagiti miembro ti klase ti maysa a balikas wenno ragup ti balikas iti baba dagiti paulo a napateg kadakuada ken ti kapitulo ken bersikulo a nakasarakanda. Ikkam ida iti oras a mangilawlawag no apay a napateg dagitoy a balikas wenno ragup ti balikas ken no ania ti insuro ti Espiritu Santo kadakuada.

Isuro ti Doktrina

Nahum 1

Agpada a nabileg ken manangngaasi ti Apo.

• Isingasing tibalabala itoy a lawas iti Umaykayo, Sumurot Kaniak—Para kadagiti Indibidual ken Pamilia ti panangsukisok iti Nahum 1 para kadagiti bersikulo a mangiladawan kadagiti kababalin ti Apo. Mabalinmo nga idawat kadagiti miembro ti klase no ania ti nasursuroda maipapan iti Apo manipud iti bukodda a panagadal. Kas pagarigan, ania ti masursurotayo maipapan Kenkuana manipud kadagiti bersikulo 1–9? Mabalinmo nga ilawlawag a nangipadto ni Nahum maipapan kadagiti panangukom ti Apo a maibusor iti Nineve, ti kabisera ti Asiria, ken inrurumen ti Asiria dagiti Israelita iti uneg ti adu a tawen. Apay a napateg kadagiti Israelita a dumngeg iti mensahe ni Nahum maipapan iti Dios? Apay a napateg daytoy kadatayo ita?

  

  “Ni Jehova naimbag, maysa a sarikedked iti aldaw ti riribuk” (Nahum 1:7).

Habacuc 1:1–4; 2:1–4;3

Makapagtalektayo iti pagayatan ti Apo ken iti panagorasna.

• Mabalin a makatulong kadagiti miembro ti klase a mangammo a, kas iti kaaduan kadatayo, nariribukan ni Habacuc iti no ania ti nakitana iti lubong nga aglawlawna. Nalabit a mabalin a basaen dagiti miembro ti klase ti Habacuc 1:1–4 ken manggupgop kadagiti pakaseknan ni Habacuc. Mabalinda met nga idilig dagiti saludsodna kadagiti dadduma iti nasantuan a kasuratan, a kas kadagiti masarakan iti Marcos 4:37–38 ken Doktrina ken Katulagan 121:1–6. Ania dagiti maipada a saludsod a damagen dagiti tao maipapan iti Dios iti agdama? Ania a balakad nga inted ti ti Apo iti Habacuc 2:1–4 a makatulong kenka nga agtalek iti pagayatanna ken panawenna? (kitaen met iti Marcos 4:39–40; Doktrina ken Katulagan 121:7–8). Mabalin a mangsapul dagiti miembro ti klase iti dadduma pay a makatulong a nalawag a pannakaammo ken pannakaawat iti “Dagiti Nainayon a Resources.” Mabalinda pay nga ibinglay no kasano a nakatulong ti Mangisalakan kadakuada nga “agbiag babaen iti pammati[da]” uray pay adda dagiti di pay nasungbatan a saludsodda.

• Tapno mangirugi iti panaglilinnawag iti Habacuc 3, mabalinmo nga awisen dagiti miembro ti klase a mangrebyu iti kapitulo ken mangibinglay kadagiti panangipeksa iti panagdayaw ken pammati a masarakanda. Tapno makatulong kadakuada a mangyaplikar kadagitoy a balikas iti bagbagida, mabalinmo nga awisen ti tunggal miembro ti klase a mangisurat iti listaan dagiti bendision nga inted kadakuada ti Dios. Awisem ida a mangutob no ania ti mapasamak no mapukawda ti sumagmamano kadagiti temporal a bendisionda. Aggigiddan a mangbasa iti Habacuc 3:17–19, ket paglilinnawagan no apay a mabalin a narigat nga “agragsak ken ni Jehova” (bersikulo 18) kabayatan ti rigrigat a kas kadagiti nailadawan iti bersikulo 17. Kasano a mapadur-astayo ti pammati a kas iti pammati ni Habacuc?

Zofonias 3:14–20

Makipagrag-onto ti Apo kadagiti taona iti Sion.

• Tapno matulongan dagiti miembro ti klase a makasarak iti namnama para iti masakbayan iti Zofonias 3:14–20, mabalinmo nga isurat iti pisarra ti “Agrag-o ken agragsakka iti isu amin a puso” gapu ta… Kalpasanna mabalin a sukisoken dagiti miembro ti klase dagitoy a bersikulo para kadagiti bendision a naikari a para iti masakbayan a makatulong kadakuada nga agrag-o ita. Kasano a matulongandatayo dagitoy a kari kabayatan dagiti narigat a panawen?

Dagiti Nainayon a Resources

Ti pammati ket kaipapananna ti panagtalek iti sirib, panangngaasi, ken panagoras ti Dios.

Kinuna ni Elder Jeffrey R. Holland:

“Kasano ti kapaut ti panagur-uraytayo iti pannakagin-awa manipud iti rigrigat a sumangbay kadatayo? Ania ngarud ti panagibtur kadagiti bukod a pannubok bayat ti panagur-uraytayo, ken kasla nakabaybayag ti idadateng ti tulong? Apay a maitantan no kasla napalpalalon dagiti dagensen ngem iti maibturantayo?…

“… Addanto dagiti panawen iti panagbiagtayo no uray ti kasayaatan a naespirituan a panagkagumaantayo ken kapasnekan, umar-araraw a karkararag ket saan a mangipaay kadagiti balligi a tinarigagayantayo, maipanggep man dayta iti dadakkel a banag iti lubong wenno dagiti babassit a banag a personal. Isu a kabayatan ti panagtrabaho ken panaguraytayo a sangkamaysa kadagiti sungbat iti sumagmamano kadagiti kararagtayo, idiayak kadakayo ti karik kas apostol a nangngegan ida ken nasungbatan ida, nupay nalabit a saan nga iti panawen wenno iti wagas a tinarigagayantayo. Ngem kanayon a masungbatanda iti kanito ken iti wagas a nasken a sungbatan ida ti maysa a mannakaammo iti amin ken awan patinggana a manangngaasi a nagannak.…

“…Ti pammati kaipapananna ti panagtalek iti Dios iti nasayaat a panawen ken dakes a panawen, uray pay no iraman dayta ti sumagmamano a panagitured agingga a makitatayo ti takiagna a naipalgak para kadatayo” (“Waiting on the Lord,” Liahona, Nob. 2020, 115–16).

Panangpadur-as iti Panangisurotayo

Agdamag kadagiti mangrugi ken maigibus a saludsod. Iti panagdamag kadagiti miembro ti klase maipapan kadagiti padasda iti nasantuan a kasuratan, “ipakaammom kadakuada a saanka nga agsapsapul iti masinunuo a sungbat ngem sipupudnoka nga interesado iti no ania ti masursuroda” (Panangisuro iti Wagas ti Mangisalakan, 29). Para iti sumagmamano a pagarigan dagiti mangrugi ken maigibus a saludsod, kitaen iti Panangisuro iti Wagas ti Mangisalakan, 31–32.