“Disiembre 5–11. Haggeo, Zacarias 1–3; 7–14: ‘Kinasantuan ken Jehova,’” Umaykayo, Sumurot Kaniak—Para iti Sunday School: Daan a Tulag 2022 (2021)
“Disiembre 5–11. Haggeo; Zacarias 1–3; 7–14,” Umaykayo, Sumurot Kaniak—Para iti Sunday School: 2022
Templo iti Laie Hawaii
Disiembre 5–11.
Haggeo; Zacarias 1–3; 7–14
“Kinasantuan ken Jehova”
Bayat ti panagadalmo iti Haggeo ken Zacarias, utobem no kasano a matulongam dagiti miembro ti klase a mangsapul iti kaipapanan dagitoy a padto.
Isuratmo dagiti Impresionmo
Yawis ti Panagbibinninglay
Mabalin nga ibinglay dagiti miembro ti klase dagiti bersikulo manipud iti Haggeo ken Zacarias nga inutob wenno inlawlawagda iti dadduma iti daytoy a lawas ket paglilinnawagan no kasano a nakatulong dagitoy a bersikulo kadakuada nga umas-asideg iti Apo.
Isuro ti Doktrina
“Utobenyo dagiti daldalanyo.”
-
Ti balakad iti Haggeo 1 ket makatulong kadagiti miembro iti klase a mangpanunot maipapan kadagiti ipangpangrunada. Mabalinmo nga awisen ida a mangbasa iti Haggeo1:1–7 ket ammuem no kasano a mapapaay dagiti tao iti Jerusalem nga ipangruna no ania ti kayat ti Apo nga aramidenda. Ania dagiti sumagmamano a banag nga indawat ti Apo kadatayo a mangaramid kadagiti nangato a prayoridad iti biagtayo? Ania ti makasinga kadatayo iti panangipokus iti Nailangitan nga Ama ken ti Mangisalakan ken dagiti ipangpangrunada? Nalabit a mabalin dagiti miembro ti klase a mangibinglay kadagiti padas a nakatulong kadakuada nga “utoben[da] dagiti daldalan[da]” ken dagiti ipangpangrunada.
-
Tapno matulongan dagiti miembro ti klase a mangpanunot maipapan no kasano a maipokusda nga ad-adda a naan-anay dagiti ipangpangrunada ti Apo, mabalinmo nga idawat kadakuada a mangrebyu iti Haggeo 2:1–9. Ania a balakad ti inted ti Apo a makatulong kadatayo a mangaramid Iti trabahona? Mabalin nga ibinglay dagiti miembro ti klase no kasano a kabaelanda a yun-una iti biagda dagiti ipangpangruna ti Apo kabayatan ti pannakaipasangoda iti adu a dadduma pay a napapateg a pagrebbenganda. Ania ti isuro ti Haggeo 2:1–9 maipapan no kasano a bendisionannatayo ti Apo no Isu ti umuna nga ipangpangrunatayo iti biagtayo? (kitaen met iti “Dagiti Nainayon a Resources”). Ikkam dagiti miembro ti klase iti oras nga agsurat no ania ti mariknada a napateg nga aramidenda gapu iti daytoy a panaglilinnawag.
Maaramidnatayo a nasantuan ti Apo.
-
Tapno mangirugi iti maysa a panaglilinnawag maipapan iti kinasanto, mabalinyo ti aggigiddan nga agbasa iti Zacarias 14:20–21. Mabalin nga ibinglay dagiti miembro ti klase no ania ti kayat a sawen kadakuada ti ragup ti balikas a “Kinasantuan ken Jehova.” Ania nga impluensia ti mabalin nga adda iti tattao no nakitada ti ragup ti balikas a “Kinasantuan ken Jehova” a naikitikit iti aginaldaw a bambanag? Kasano nga apektuannatayo daytoy a ragup ti balikas no makitatayo daytoy iti templo ita? Kalpasanna mabalin a basaen dagiti miembro ti klase ti Zacarias 1:1–6; 3:1–7; 7:8–10; 8:16–17 ket paglilinnawagan no ania ti masursuroda maipapan no ania ti kaipapanan ti agbalin a nasantuan. Apay a napateg ti bukodtayo a kinasantuan iti Apo? Kasano a matulongannatayo ti Apo nga agbalin a nasantuan?
-
Mabalin nga irebyu dagiti miembro ti klase ti Zacarias 2:10–11; 8:1–8; 14:9–11, 20–21 ken mangibinglay kadagiti impresion maipapan no ania koma ti kayarigan ti agnaed iti sidong ti Mangisalakan iti maysa a kasasaad ti kinasantuan. Kasano nga isagananatayo ti Apo nga agbiag kadagiti kasasaad nga inladawan ni Zacarias? Kasano a maaddaantayo iti bilegna a makatulong kadatayo nga agbalin a nasansantuan?
“Adtoy, ti Arim umay kenka: isu a nalinteg, ken addaan panangisalakan; napakumbaba, ket agsakay iti maysa nga asno” (Zacarias 9:9). Naballigian nga Iseserrek, ni Harry Anderson
Zacarias 9:9–11; 11:12–13; 12:10; 13:6–7
Ni Jesucristo ti naikari a Mesias.
-
Tapno matulongan dagiti miembro ti klase a mangkita kadagiti koneksion dagiti balikas ni Zacarias ken ti biag ti Mangisalakan, kas iti inaramid dagiti tao iti panawen ni Jesus, mabalinmo a bingayen ti klase iti dua a grupo. Ikkam dagiti miembro ti klase iti umuna a grupo iti maysa kadagitoy a binatog: Zacarias 9:9–11; 11:12–13; 12:10; 13:6–7. Ikkam dagiti miembro ti klase iti sabali pay a grupo iti maysa kadagitoy a binatog: Mateo 21:1–11; 26:14–16; 26:31; Juan 19:37. Mabalin a padasen ti tunggal miembro ti klase a mangsapul iti maysa a tao manipud iti sabali pay a grupo nga addaan iti maysa a binatog iti nasantuan a kasuratan a maiparis iti kukuada. Ania ti masursurotayo maipapan iti Mangisalakan manipud kadagitoy a bersikulo?
-
Tapno matulongan dagiti miembro ti klase a mangutob ti Zacarias 9:9–11, mabalinmo nga ipakita ti ladawan ti naballigian nga iseserrek ti Mangisalakan iti Jerusalem (kitaen iti balabala itoy a lawas iti Umaykayo, Sumurot Kaniak—Para kadagiti Indibidual ken Pamilia). Wenno ipabuya ti video a “The Lord’s Triumphal Entry into Jerusalem” (ChurchofJesusChrist.org). Mabalin a paglilinnawagan dagiti miembro ti klase no ania ti mabalin a narikna koma ti maibilang kadagiti tao a nangpasangbay ken ni Jesus iti siudad. Kasano ti panangpasangbaytayo Kenkuana iti biagtayo, iti pagtaengantayo, ken iti komunidadtayo?
Dagiti Nainayon a Resources
“Utobenyo dagiti daldalanyo.”
Kalpasan ti panangadawna iti Haggeo 1:4–7, insuro ni Elder Terence M. Vinson:
“Mariknatayo ti napaut a rag-o no ti Mangisalakantayo ken ti ebangheliona ti agbalin a kapatgan a pangbangonantayo iti biagtayo. Nupay kasta, nakalaklaka para iti dayta pagbangonan tapno agbalin, ketdi, a bambanag ti lubong, a ditoy nga agtalinaed ti ebanghelio kas mainayon a mabalin nga aramiden no kayat wenno kas gagangay nga idadar-ay iti simbaan iti uneg ti dua nga oras kadagiti Domingo. No daytoy ti kaso, maipada daytoy iti panangipisok kadagiti sueldotayo iti ‘maysa a supot nga adda buttawna.’
“Ibagbaga ni Haggeo kadatayo nga agkumittayo.…
“Awan ti gameng, wenno ania man a pagliwliwaan, wenno ania man a kasasaad, wenno ania man a social media, wenno ania man a video games, wenno ania man nga isport, wenno ania man a pannikilangen iti maysa a celebrity, wenno ania man a banag iti daga a napatpateg pay ngem iti agnanayon a biag. Ngarud ti balakad ti Apo iti tunggal tao ‘utobenyo dagiti dalanyo’” (“True Disciples of the Savior,” Liahona, Nob. 2019, 9,11).
Panangpadur-as iti Panangisurotayo
Dumngeg. Maysa a tignay ti ayat ti panagdengngeg. Ti maysa a wagas tapno dumngeg a sisasamay ket ti kumita iti tao nga agsarsarita. Daytoy ti mangpalugod kenka a kumita ti ania man a saan a maisawang a pannakisarita. (Kitaen iti Panangisuro iti Wagas ti Mangisalakan, 34.)