Estatua ni Cristo

Disiembre 12–18.

Malakias

“Siak Inayatkayo, Kinuna ni Jehova”

Mabalin a nangnangruna a napateg para iti klasem a mangsursuro iti sumagmamano a mensahe iti Malakias. Bayat ti panagadalmo, agkararagka tapno maammuam no ania dagita a mabalin a mensahe. Ti panangaramid iti daytoy ti mangtulongto pay kenka a mangrikna iti ayat nga adda iti Apo para kadagiti sursuruam.

Isuratmo dagiti Impresionmo

icon iti panagbibinninglay

Yawis ti Panagbibinninglay

Mabalinmo nga irugi iti panaglilinnawag maipapan iti libro ni Malakias babaen ti panangisurat iti balikas a Mensahe iti pisarra. Allukoyem dagiti miembro ti klase a mangibinglay kadagiti napapateg a mensahe a nasarakanda iti tunggal kapitulo ti Malakias. Tapno matulongan dagiti miembro ti klase a manglagip ken mangutob no ania ti naibinglay, mabalinmo nga isurat dagita a mensahe iti pisarra.

icon iti panangisuro

Isuro ti Doktrina

Malakias 1:6–14

Kiddawen ti Apo ti “nadalus a daton.”

• Tapno maallukoy dagiti miembro ti klase a mangibinglay no ania ti nasursuroda maipapan kadagiti daton manipud iti Malakias 1:6–14, mabalinmo nga awisen ida a siuulimek a mangrebyu kadagitoy a bersikulo ken mangilawlawag iti sabali pay a miembro ti klase ti maysa a banag a saan a naawatan dagiti Israelita a saserdote maipapan kadagiti daton Apay a dawaten ti Apo ti kasayaatan manipud kadatayo? Mabalin nga ilista dagiti miembro ti klase dagiti daton, wenno dagiti sakripisio, nga aramidentayo iti Apo ita. Para iti tunggal aytem iti listaan, mabalinda a paglilinnawagan no ania ti mamagbalin iti maysa a “narugit” a daton wenno ti maysa a “nadalus” a daton (Malakias 1:7, 11).

Malakias 3–4

Maipatpatungpal dagiti padto ni Malakias kadagiti ud-udina nga aldaw.

• Mabalinmo a rugian ti panaglilinnawag maipapan iti Malakias 3–4 babaen ti panangilawlawag nga imbinglay ni Moroni dagiti bersikulo manipud kadagitoy a kapitulo idi nagparang isuna ken ni Joseph Smith (kitaen iti Joseph Smith—Pakasaritaan 1:36–39). Ania dagiti kinapudno kadagitoy a kapitulo a marikna dagiti miembro ti klase a mabalin a nangnangruna a napateg ken ni Joseph—ken kadatayo—tapno ammuen? Mabalin nga aggrupo-grupo iti babassit dagiti miembro ti klase ket ilistada ti adu a kinapudno agingga a kabaelanda. Allukoyem dagiti grupo a mangibinglay iti listaanda ket paglilinnawagan no apay a napateg dagitoy a kinapudno kadagiti ud-udina nga aldaw.

Malakias 3:8–12

Luktan ti Apo dagiti tawtawa ti langit no agbayadtayo iti apagkapullo.

• Tapno maallukoy dagiti miembro ti klase a mangibinglay kadagiti pammaneknekda maipapan iti linteg ti apagkapullo, mabalinmo nga awisen ida a mangsapul kadagiti pagbatayan iti Malakias 3:8–12 ken tapno mangibinglay no kasano a naammuanda a pudno dagitoy a pagbatayan. Mabalinmo nga isarita maipapan no kasano a binendisionan ti Apo ida—a naespirituan ken temporal—gapu iti panagbayadda iti apagkapullo. Wenno mabalinda a paglilinnawagan dagiti adalen maipapan iti apagkapullo nga inbinglay ni Elder David A. Bednar iti mensahena a “The Windows of Heaven” (Liahona, Nob. 2013, 17–20) ken ibinglayda no ania ti nasursuroda bayat ti napasnek a panagkagumaanda nga agtungpal iti daytoy a linteg.

• Idawatmo kadagiti miembro ti klase a mangbasa a siuulimek ti Malakias 3:8–12 bayat ti panangutobda no kasano a makaisuroda iti maysa a tao no apay a kiddawen ti Apo nga agbayadtayo iti apagkapullo. Mabalinda pay a basaen ti palawag ni Presidente Gordon B. Hinckley iti “Dagiti Nainayon a Resources.” Ania ti kayattayo a maawatan ti dadduma maipapan iti apagkapullo? Kas pagarigan, ania ti kayat a sawen nga agbayad iti apagkapullo? Apay a kayat ti Apo nga aramidentayo daytoy? Kasano a maluktan dagiti “tawtawa ti langit” (bersikulo 10) no agbayadtayo iti apagkapullo? Ania dagiti mabalin a pakaseknan ti maysa a tao maipapan iti panagbayad iti apagkapullo, ken no kasano a sumungbattayo? Kiddawem kadagiti miembro ti klase a mangibinglay no kasano a ti panagtungpal iti daytoy a bilin ket nangpapigsa iti pammatida iti Nailangitan nga Ama ken ni Jesucristo.

Ni Elias iti panagparangna kada Joseph Smith ken Oliver Cowdery iti Templo ti Kirtland

Panangiladawan ken ni Elias iti panagparangna kada Joseph Smith ken Oliver Cowdery iti Templo ti Kirtland, ni Robert T. Barrett

Malakias 4:5–6

“Ibaonkonto kadakayo ni Elias a propeta.”

• Mabalin a magun-od dagiti miembro ti klase dagiti makatulong a nalawag a pannakaammo ken pannakaawat maipapan iti Malakias 4:5–6 babaen ti panangidilig kadagitoy a bersikulo iti wagas nga inadaw ida ni Moroni ken ni Joseph Smith iti Joseph Smith—Pakasaritaan 1:38–39. (Mabalin a makatulong ti panangpasurat iti maysa a tao iti tunggal bersion nga agabay iti pisarra.) Ania ti inayon dagiti balikas ni Moroni iti pannakaawattayo kadagiti bersikulo iti Malakias? Mabalinmo pay nga ilawlawag dagiti saludsod kas kadagitoy: Asino dagiti “amma”? (kitaen iti Deuteronomio 29:13). Kasano a maiturong ti puspusotayo kadagiti ammatayo, ken no kasano a maiturong ti puspusoda kadatayo? Tapno matulongan ti klasem a makaawat no kasano a naipatungpal ti padto ni Malakias, mabalinda a basaen maipapan idi impakumit ni Elias dagiti tulbek ti panaglantip ken ni Joseph Smith (kitaen iti Doktrina ken Katulagan 110:13–16). Apay nga agyaman dagiti miembro ti klase a naisublin dagitoy a tulbek?

• Mangted tiMalakias 4:5–6 iti naindaklan a gundaway a pagsasaritaan maipapan iti templo ken aramid iti family history. Nalabit a mabalin nga ibinglay dagiti miembro ti klase dagiti padas a napasaranda bayat ti panangitrabahoda iti daytoy nga aramid ken no kasano a nakatulong kadakuada nga iturong ti puspusoda kadagiti ammada. Ania ti maaramidtayo a makatulong kadagiti masakbayan a kaputotan a mangiturong iti puspusoda kadatayo?

dagiti nainayon a resources icon

Dagiti Nainayon a Resources

Ti apagkapullo ket maysa a banag ti pammati.

Kinuna ni Presidente Gordon B. Hinckley, “Adda kabaelantayo nga agbayad iti apagkapullotayo. Saan unay a banag daytoy maipapan iti kuarta no di ketdi maysa a banag daytoy maipapan iti pammati. Nasken nga agsapulak pay laeng iti napudno nga agbaybayad iti apagkapullo a saan a makapagpaneknek nga iti maysa a literal unay ken nakaskasdaaw a wagas naluktan dagiti tawtawa ti langit ken naibukbok dagiti bendision kenkuana” (“Let Us Move This Work Forward,” Ensign, Nob. 1985,85).

Panangpadur-as iti Panangisurotayo

Ibinglaymo dagiti panagkarigatam ken ti pammatim. No dadduma marikna dagiti tao nga agmaymaysada no mapadpadasanda dagiti pannubok. Mabalin a maitutop a sagpaminsan a mangibinglay iti bukod a padas maipapan iti maysa a panawen idi nagkarigatanka ken no kasano a nakatulong kenka ti Mangisalakan.