“Disiembre 19–25. Paskua: ‘Isu ti Inur-uraytayo, ken Isalakannatayto,’” Umaykayo, Sumurot Kaniak—Para iti Sunday School: Daan a Tulag 2022 (2021)
“Disiembre 19–25. Paskua,” Umaykayo, Sumurot Kaniak—Para iti Sunday School: 2022
Ta maysa nga Ubing ti Mayanak Kadatayo, ni Simon Dewey
Disiembre 19–25
Paskua
“Isu ti Inur-uraytayo, ken Isalakannatayto”
Kabayatan ti bukod a panagadal ken panagsagana a mangisuro, panunotem no kasano a matulongam dagiti miembro ti klase a makarikna iti maipekpeksa a rag-o ti pannakayanak ti Mangisalakan. Mangawis iti Espiritu nga agpaneknek kadakuada iti manangsubbot nga ayat ni Jesucristo.
Isuratmo dagiti Impresionmo
Yawis ti Panagbibinninglay
Ti panawen ti Paskua ti mabalin a maysa a nasayaat a gundaway a mangawis kadagiti miembro ti klase a mangibinglay no kasano a nangpatibker iti pammatida ken ni Jesucristo ti panagadalda iti Daan a Tulag.
Isuro ti Doktrina
Agrag-otayo iti Mannubbottayo.
-
Uray no ammo ti Paskua kas maysa a panawen ti rag-o, adu dagiti addaan iti kasasaad iti marigatan a mangsarak iti rag-o, uray pay kabayatan iti daytoy a panawen ti tawen. Ti napateg a mensahe ti Paskua ket mabalin a palag-anen ti Mangisalakan dagiti dagensentayo ken tulongannatayo a mangsapul iti talna ken uray pay iti rag-o. Tapno mangibinglay iti daytoy a mensahe, mabalinmo nga isurat iti pisarra dagiti sumaganad a reperensia: Salmo 35:9; Isaias 25:8–9; 44:21–24; 51:11; Zofonias 3:14–20; Moises 5:5–11. Kalpasanna mabalinmo nga isurat iti pisarra dagiti saludsod nga utoben dagiti miembro ti klase bayat ti panangbasada kadagiti binatog, kas iti Ania dagiti gapu nga ited dagitoy a binatog ti nasantuan a kasuratan tapno agrag-o? Idawatmo kadakuada a mangibinglay no ania ti masarakanda. Nalabit a mabalin pay nga ikkam dagiti miembro ti klase iti oras nga agsurat maipapan iti bukodda a rag-o iti Mangisalakan. Mabalin a masarakanda dagiti nayon a nalawag a pannakaammo ken pannakaawat manipud iti mensahe ni Presidente Russell M. Nelson iti “Dagiti Nainayon a Resources.”
-
Mangted ti Paskua kadagiti gundaway a mangisaknap iti rag-o ni Cristo babaen iti panagserbi kadagiti dadduma. Nasapsapa iti klase, mabalinmo nga awisen ti maysa a miembro ti klase a mangrebyu iti mensahe ni Elder Ulisses Soares nga “A Modern Angelic Host” (First Presidency Christmas devotional, Dis. 8, 2019, broadcasts.ChurchofJesusChrist.org) ket umay a nakasagana a mangibinglay no kasano a nakatulong iti aramid a panagserbi ken ni Elder Soares ken ti pamiliana a makarikna iti rag-o ti Paskua. Mabalinmo pay nga ibinglay dagiti paset ti mensahena iti klase. Mabalin nga ibinglay dagiti miembro ti klase ti bukodda a padas maipapan iti panangted wenno panangawat kadagiti aramid a panagserbi iti panawen ti Paskua. Kasano a makapagtignaytayo iti awis ni Elder Soares a mangsurot iti “naan-anay a pagwadan ti Mangisalakan iti ayat ken pagimbagan ti tattao”?
Matulongannatayo dagiti simbolo a manglagip ken ni Jesucristo.
-
Nailista itibalabala itoy a lawas iti Umaykayo, Sumurot Kaniak—Para kadagiti Indibidual ken Pamilia ti sumagmamano a simbolo iti Daan a Tulag a mangisuro maipapan ken ni Jesucristo. Mabalin nga ibinglay dagiti miembro ti klase a no ania ti nasursuroda maipapan iti Mangisalakan manipud kadagitoy ken dadduma pay a simbolo a nasarakanda iti panagadalda. Ania ti nasursurotayo maipapan iti panangsapul iti Mangisalakan kadagiti nasantuan a kasuratan? Ania dagiti padas a nakaisuro kadatayo nga “amin a banag naparsua ken naaramid a mangpaneknek [Kenkuana]”? (Moises 6:63).
Inted ti Dios kadatayo ti sagut ti Anakna.
-
Ti panangted iti sagut ti maysa a kannawidan ti Paskua iti kaaduan a kultura. Mabalinmo nga idauluan ti maysa a panaglilinnawag kadagiti miembro ti klase maipapan kadagiti sagut nga inted ti Dios kadatayo, nangnangruna iti sagut ti Anakna, ni Jesucristo. Tapno maaramid daytoy, mabalinmo nga ibinglay ti video nga “He Is the Gift” (ChurchofJesusChrist.org) ket awisem dagiti miembro ti klase a mangibinglay no ania ti kaipapanan kadakuada ti sagut ti Mangisalakan. Kasano a maipakitatayo iti Nailangitan nga Ama ti panagyamantayo para iti daytoy a sagut?
“Ti naganna maawaganto iti Nakaskasdaaw.”
-
Inaramat ni propeta Isaias ti adu a nagnagan ken pangawag a pangiladawan iti Mesias, a mayanakto iti Betlehem (kitaen kas pagarigan, iti Isaias 7:14; 9:6). Nalabit a magustuan dagiti miembro ti klase a makasursuro iti ad-adu pay maipapan iti Mangisalakan ken ti misionna babaen ti panagsursuro maipapan kadagitoy a pangawag. Mabalinda ti mangala iti maysa a paulo ket mangsapul iti sabali a binatog ti nasantuan a kasuratan a makatulong kadakuada a makaawat no ania ti kaipapananna. Kas pagarigan, makasursuroda iti ad-adu pay maipapan iti pangawag a “Prinsipe ti Kappia” (Isaias 9:6) babaen ti panangbasa iti Salmo 85:8; Isaias 52:7; Lucas 2:14; wenno Juan 16:33. Tapno matulongan dagiti miembro ti klase a mangsarak iti dadduma pay a nasantuan a kasuratan, isingasing a sapulenda iti Pangiwanwan iti Nasantuan a Kasuratan (scriptures.ChurchofJesusChrist.org). Ania ti isingasing dagitoy a pangawag maipapan iti Mangisalakan ken no ania ti aramidenna para kadatayo?
Dagiti Nainayon a Resources
Idiaya ni Jesucristo ti talna ken rag-o.
Insuro ni Presidente Russell M. Nelson:
“No ti pokus ti biagtayo ti plano ti Dios iti pannakaisalakan … ken ni Jesucristo ken ebangheliona, mariknatayo ti rag-o ania man ti mapaspasamak—wenno saan a mapaspasamak—iti biagtayo. Umay ti rag-o manipud ken gapu Kenkuana. Isu ti pagtaudan ti amin a rag-o. Mariknatayo daytoy iti panawen ti Paskua no kantaentayo ti, “Agragsakkan itan lubong, ti Arimon adtoy’ [Hymns, no. 201]. Ken mariknatayo daytoy iti unos ti makatawen. Para kadagiti Santo iti Ud-udina nga Aldaw, ni Jesucristo ti rag-o!…
“Kas iti idiaya ti Mangisalakan a talna a ‘daegenna ti amin a pannakaawat’ [Taga Filipos 4:7], Idiayana met ti naindaklan unay a rag-o a mangkarit iti nalinteg a panagrason wenno mortal a pannakaawat” (“Joy and Spiritual Survival,” Liahona, Nob. 2016, 82).
Panangpadur-as iti Panangisurotayo
Agsaganaka a pampanunotem dagiti tao. “Bay-am a ti pannakaawatmo kadagiti tao a sursuruam ti mangtarabay kadagiti planom. … Dagiti mannursuro a kas ken Cristo ket saan a nakatalimudok iti masinunuo nga estilo wenno pamay-an; nakatalimudokda iti panangtulong kadagiti tao a mangbukel iti pammati ken Jesucristo” (Panangisuro iti Wagas ti Mangisalakan,7).