Ni Jesus a mangisursuro iti sinagoga

Ni Jesus iti Sinagoga iti Nazaret, ni Greg K. Olsen

Oktubre 3–9

Isaias 58–66

“Ti Mannubbot Umayto iti Zion”

Bayat ti panagadalmo iti napintas a doktrina kadagitoy a kapitulo, awisem ti Espiritu a mangtarabay kenka kadagiti mensahe nga agbalinto a kapatgan kadagiti miembro ti klase.

Isuratmo dagiti Impresionmo

icon iti panagbibinninglay

Yawis ti Panagbibinninglay

Mabalinmo nga awisen dagiti miembro ti klase a mangisurat iti pisarra dagiti reperensia kadagiti bersikulo a nangparegta kadakuada kabayatan ti panagadalda iti nasantuan a kasuratan itoy a lawas. Kas maysa a klase, mabalinyo kalpasanna a kitaen dagita a bersikulo ket pagsasaritaan maipapan kadagiti kinapudno a nasarakan idiay. Dagitoy a nalawag a pannakaammo ken pannakaawat ket mabalin a mangiturong iti naun-uneg a panaglilinnawag iti maysa wenno ad-adu pay kadagiti pagbatayan a nailista iti baba.

icon iti panangisuro

Isuro ti Doktrina

Isaias 58:3–12

Mangisangbay ti panagayuno kadagiti bendision.

• Tapno matulongan dagiti miembro ti klase a paglilinnawagan no apay ken no kasano nga imbilin ti Apo kadatayo nga agayuno, mabalin a mangaramidka iti dua a dasig wenno kolum iti pisarra a namarkaan iti “Saankanto nga Agayuno kas iti Panagayunom Ita nga Aldaw” ken “Ti Panagayuno a Pinilik.” Kalpasanna mabalin a basaen dagiti miembro ti klase ti Isaias 58:3–7, a mangpumpunno iti umuna a kolum kadagiti pannakailadawan no kasano ti panagayuno dagiti Israelita ken mangpumpunno iti maikadua a kolum kadagiti pannakailadawan ti panagayuno a kas isangrat ti Apo. Kasano nga apektuan dagitoy a panangiladawan ti wagas a pannirigantayo iti panagayuno? Mabalin met nga ibinglay dagiti miembro ti klase no kasano, iti bukodda a padas, a ti panagayuno ti mangiturong kadagiti bendision nga inkari ti Apo kadagiti bersikulo 8–12.

• Mabalin nga addaan ti sumagmamano a miembro ti klase kadagiti padas a mangilawlawag iti dadduma no apay nga agayunotayo. Awisem ida a mangibinglay no ania ti kinunada. Mabalinmo pay nga awisen ti maysa a miembro ti bishopric nga agsarita no kasano a maaramat dagiti daton iti panagayuno. Wenno mabalinmo pay nga ibinglay ti maysa kadagiti pagarigan manipud iti mensahe ni Presidente Henry B. Eyring “Is Not This the Fast That I Have Chosen?” (Liahona, Mayo 2015, 22–25). Kasano a mangtulong ti panagayuno ken panagbayad kadagiti daton iti panagayuno a “pangwarwar kadagiti patapat” iti bagbagitayo ken iti dadduma? (Isaias 58:6).

Isaias 61:1–3; 63:7–9

Ni Jesucristo ti Mangisalakan ken Mannubbottayo.

• Idi impakaammo ni Jesucristo kadagiti tao ti Nazaret nga Isu ti Mesias, inadawna manipud iti Isaias 61:1–3 (kitaen iti Lucas 4:16–21; kitaen met iti video a “Jesus Declares He Is the Messiah,” ChurchofJesusChrist.org). Nalabit a mabalin a basaen dagiti miembro ti klase ti Isaias 61:1–3 ket isaritada maipapan no apay dagitoy a bersikulo ti nasayaat a pangiladawan iti mision ti Mangisalakan. Mabalinmo nga ilista iti pisarra ti tunggal banag a naituding nga aramiden ti Mangisalakan ket paglilinnawagan no ania ti kaipapanan ti tunggal maysa. Kasano nga impatungpal ti Mangisalakan dagitoy nga aspekto ti misionna kabayatan ti mortal a panagbiagna? Kasano nga impatungpalna dagitoy iti biagtayo?

• Mabalin pay a basaen dagiti miembro ti klase ti Isaias 63:7–9 ken ibinglayda no kasano a nabendisionan ida ni Jesucristo kadagitoy a wagas.

• Nagusar tiIsaias 61:1–3 kadagiti napintas ken naindaniwan a pagsasao a pangiladawan iti bileg ni Jesucristo a mangsubbot kadagiti kasla nadadael. Tapno makatulong a mangiladawan kadagitoy a bersikulo, ibilangmo ti panangibinglay ti estoria maipapan ti maysa a banag a naipagarup a napukaw wenno nadadael ngem nagbalin a maysa a banag a napimpintas. Para kadagiti pagarigan, kitaen iti video a “Provo City Center Temple” (ChurchofJesusChrist.org; kitaen met iti “Dagiti Nainayon a Resources”) wenno ti estoria iti rugi ti mensahe ni Presidente Dieter F. Uchtdorf a “He Will Place You on His Shoulders and Carry You Home” (Liahona, Mayo 2016, 101–4). Mabalin nga isarita dagiti miembro ti klase maipapan no kasano a nakitadan ti Apo a nangted kadagiti tao iti maysa a banag a napintas idi impagarupda a nadadael ti biagda.

Isaias 65:17–25

Iti Maikadua a Yaayna, ti Apo “mangparsuanto iti baro a langlangit ken baro a daga.”

• Iladawan tiIsaias 65:17–25 dagiti kasasaad iti daga kalpasan ti Maikadua a Yaay ti Mangisalakan. Mabalinmo nga awisen dagiti miembro ti klase a mangrebyu kadagitoy a bersikulo a mangsapsapul kadagiti sungbat dagiti saludsod kas kadagitoy: Kasanonto a maiduma ti biag iti “baro a daga” iti wagas ti agdama a biag iti rabaw ti daga? Ania ti masarakam kadagitoy a bersikulo a makaigapu iti panagrag-om?

dagiti nainayon a resources icon

Dagiti Nainayon a Resources

Ti Apo “dinatay panawan iti tapok.”

Kalpasan ti panangisalaysayna no kasano a dumani dinadael ti apuy ti Tabernakulo ti Provo, a nangpalugod iti daytoy tapno maipasdek manen idi agangay kas Provo City Center Temple, kinuna ni Sister Linda S. Reeves: “Ipalubos ti Apo a mapadas ken masuboktayo, no dadduma agingga iti kadakkelan a kabaelantayo. Nakitatayon ti biag dagiti ipatpategtayo—ken nalabit ti bukodtayo—(figuratively) nauram iti daga ken nasdaawtayo no apay a pinalugodan ti managayat ken manangipateg a Nailangitan nga Ama a mapasamak dagiti kakasta a banag. Ngem dinatayo Isuna panawan iti tapok; nakatakder Isuna a nakatanggaya dagiti takiagna, a sigagagar nga aw-awisennatayo nga umasideg Kenkuana. Isu ti mangbangbangon iti biagtayo kadagiti nangayed a templo a sadiay a makapagindeg ti Espirituna nga agnanayon” (“Claim the Blessings of Your Covenants,” Liahona, Nob. 2013,119).

Panangpadur-as iti Panangisurotayo

Kaam-ammom dagiti sursuruam. Addaan ti tunggal tao a sursuruam iti naidumduma a nagtaudan, pannirigan, ken agduduma a kabaelan. Ibilangmo dagitoy paggigidiatan bayat ti panagkalikagummo a mangtulong iti amin nga agsursuro iti napnuan kaipapanan ken nakallalagip a wagas. (Kitaen iti Panangisuro iti Wagas ti Mangisalakan, 7)