Ipadto ni Propeta Isaias ti Pannakayanak ni Cristo, ni Harry Anderson

Septiembre 5–11

Isaias 1–12

“Ti Dios Isu ti Pakaisalakanak”

Ibilangmo dagiti wagas tapno maallukoy dagiti miembro ti klase a mangibinglay kadagiti impresion ken pannakaawat a naawatda kabayatan ti bukod ken sangapamiliaan a panagadalda.

Isuratmo dagiti Impresionmo

Yawis ti Panagbibinninglay

Mangted tibalabala itoy a lawas iti Umaykayo, Sumurot Kaniak—Para kadagiti Indibidual ken Pamilia kadagiti kapanunotan para iti pannakaawat kadagiti sinurat ni Isaias. Mabalinmo nga awisen dagiti miembro ti klase a mangibinglay no kasano a ti maysa kadagitoy a kapanunotan, wenno maysa a banag, ket nakatulong kadakuada nga agsursuro manipud iti Isaias 1–12.

Isuro ti Doktrina

Isaias 1–12

Maipatungpalto amin dagiti balikas ni Isaias.

• Iti panangisarita maipapan ken ni Isaias, insuro ti Mangisalakan nga “amin dagiti banag a sawenna napasamaken ken mapasamakto, uray pay ti maipanggep kadagiti balikas nga insawangna” (3 Nephi 23:3). Mabalinmo nga irugi ti panaglilinnawag maipapan ken ni Isaias babaen ti panangibinglay iti daytoy nasantuan a kasuratan ken iti palawag iti “Dagiti Nainayon a Resources.” Mabalinmo nga isurat iti pisarra ti Aldaw ni Isaias, ken Ti mortal a panagministro ti Mangisalakan, ken Dagiti ud-udina nga aldaw. Mabalin a sapulen dagiti miembro ti klase dagiti binatog iti Isaias 1–12 a mabalin a mayaplikar iti maysa wenno ad-adu pay kadagiti ragup ti balikas iti pisarra (kas pagarigan, Isaias 2:1–5; 7:1–7; 7:10–14; 9:2–7; 10:20; 11:10; 12:1). Apay a maysa a bendision ti maaddaan kadagitoy a padto a sidadaan a magun-odtayo iti agdama?

Isaias 1; 3;5

“Agsardeng nga agaramid iti dakes.”

• Mabalinmo nga idawat kadagiti miembro ti klase a mangibinglay no ania ti nasursuroda manipud iti bukod ken sangapamiliaan a panagadalda iti Isaias 1, 3,5 maipapan iti naespirituan a kasasaad ti Pagarian ti Juda kadagiti aldaw ni Isaias. Nalabit a mabalinda a mangrebyu kadagitoy a kapitulo ket mangaramid iti listaan dagiti bersikulo ken dagiti kasasaad nga iladawanda. Ania dagiti mensahe ti namnama a masarakantayo kadagitoy a kapitulo? (No kasapulan, mabalinmo nga iturong dagiti miembro ti klase iti Isaias 1:16–20, 25–27; 3:10.) No adda maysa a mensahe ti nagkauna a Juda para kadatayo, ania koma daytoy?

• Mabalin nga agpammarang dagiti miembro ti klase a nagbibiagda iti Jerusalem idi nagipadto ni Isaias. Mabalinmo a kauman ti sumagmamano kadakuada, nga agsalsaludsod kadakuada no ania ti kinuna ni Isaias ken no kasano ti nariknada maipapan iti daytoy. Kas pagarigan, mabalinmo a saludsoden kadagiti miembro ti klase a mangisarita maipapan kadagiti balikas ni Isaias a masarakan iti Isaias 1:16–20; 3:16–26; 5:20–23. Ania ti kinuna ni Isaias a mangparegta kadatayo nga agbabawi?

Isaias 2; 4; 11–12

Agaramidto ti Dios iti naindaklan nga aramid kadagiti ud-udina nga aldaw.

• Tapno matulongan dagiti miembro ti klase a mangutob no kasano a maipatpatungpal dagiti padto ni Isaias maipapan kadagiti maudi nga aldaw, mabalinmo ti pumili iti sumagmamano a bersikulo manipud iti Isaias 2; 4; 11–12 (kas iti Isaias 2:2–3; 4:5–6). Kalpasanna idawatmo kadagiti miembro ti klase a mangsarak kadagiti verbo a future tense kadagitoy a bersikulo (kas iti “agbalinto” wenno “mapanto”). Awisem ida a mangsukat iti sumagmamano kadagitoy kadagiti verbo a present tense (kas iti “panagbalin a” wenno “mapmapan”). Kasano a maipatpatungpal dagitoy a padto iti biagtayo? Apay a napateg a maammuantayo maipapan kadagitoy a padto?

• Mabalinmo nga ilawlawag nga idi sinarungkaran ni Moroni ni Joseph Smith idi 1823, inadawna ti Isaias 11 ket kinunana a dandanin maipatungpal daytoy (kitaen iti Joseph Smith—Pakasaritaan 1:40; kitaen met iti Doktrina ken Katulagan 113:1–6). Mabalin dagiti miembro ti klase ti mangbasa iti sumagmamano a bersikulo manipud iti Isaias 11 (kas kadagiti bersikulo 6–12) ken manggupgop iti bukodda a balikas no ania ti nasirmata ni Isaias. Ania ti akemtayo iti pannakaipatungpal dagitoy a padto?

“Ta nayanak ti maysa nga ubing kadatayo, maysa nga anak a lalaki a naited kadatayo” (Isaias 9:6).

Isaias 7–9

Impadto ni Isaias ni Jesucristo.

• Mabalinmo a saludsoden kadagiti miembro ti klase no ania ti masursuroda maipapan ken ni Jesucristo manipud kadagiti binatog kas Isaias 7:14; 8:13–14; 9:2, 6–7. Kas pagarigan, apay nga Emmanuel ti napintas a paulo para iti Mangisalakan? (kitaen iti Mateo 1:23). Kasano a nagbalin ni Jesucristo a maysa a “Mamagbaga” wenno “Prinsipe ti Kappia” kadatayo? Mabalin pay nga ibinglay dagiti miembro ti klase dagiti dadduma a binatog a nasarakanda iti Isaias 1–12 a mangipalagip kadakuada maipapan ken ni Jesucristo. Ania ti isuro kadatayo dagitoy a binatog maipapan Kenkuana?

• Sakbay ti klase, mabalinmo nga awisen dagiti miembro ti klase a mangitugot iti maysa a ladawan ni Cristo a mariknada a mangibagi iti maysa kadagiti pangiladawan iti Mangisalakan a masarakan iti Isaias 7–9. Kabayatan ti klase, mangtedka kadakuada iti gundaway a mangipakita iti ladawan nga intugotda ken mangilawlawag no kasano a mainaig daytoy kadagiti balikas ni Isaias.

Dagiti Nainayon a Resources

Mabalin a namin-adun a naipatungpal dagiti padto ni Isaias.

Insuro ni Presidente Dallin H. Oaks insurona: “Ti libro ni Isaias naglaon iti adu a padto a kasla namin-adun ti pannakaipatungpalda. Ti maysa ket kasla mangiraman kadagiti tao iti aldaw ni Isaias wenno dagiti kasasaad ti sumaruno a kaputotan. Sabali pay a kaipapanan, a masansan a mangisimbolo, ket kasla maitudo kadagiti pasamak iti kangitingitan ti panawen, idi nadadael ti Jerusalem ken nawarawara dagiti tao kalpasan ti pannakailansa iti krus ti Anak ti Dios. Sabali pay a kaipapanan wenno pannakaipatungpal ti isu met laeng a padto ket kasla mainaig kadagiti pasamak a maigiddan iti Maikadua a Yaay ti Mangisalakan. Ti kinapudno nga adu kadagitoy a padto ti mabalin nga addaan iti adu a kaipapanan ti mangipagunamgunam ti kinapateg ti panagkalikagumtayo a manggun-od iti paltiing manipud iti Espiritu Santo tapno makatulong kadatayo a mangipatarus kadagitoy” (“Scripture Reading and Revelation,” Ensign, Ene. 1995,8).

Panangpadur-as iti Panangisurotayo

Awisen ti Espiritu. “Ti sagrado a musika, dagiti nasantuan a kasuratan, dagiti balikas dagiti propeta iti ud-udina nga aldaw, dagiti panangipeksa iti ayat ken pammaneknek, ken dagiti kanito ti naulimek a panagutob ket makaawis amin iti kaadda ti Espiritu” (Panangisuro iti Wagas ti Mangisalakan,10).