Sagrado a Kakaywan, ni Brent Borup

Septiembre 12–18

Isaias 13–14; 24–30;35

“Maysa a Nakakaskasdaaw nga Aramid ken Datdatlag”

Sakbay a matulongam dagiti dadduma a mangtakuat kadagiti kinapudno iti libro ni Isaias, kasapulam ti mangtakuat kadagiti kinapudno para iti bagim. Bayat ti panangbasam iti daytoy a lawas, ibilangmo dagiti kinapudno no mariknam a nakaawisan ti riknam a mangyunay-unay iti klase.

Isuratmo dagiti Impresionmo

Yawis ti Panagbibinninglay

Tapno maallukoy dagiti miembro ti klase a mangibinglay no ania ti nasursuroda manipud ken ni Isaias, mabalinmo a saludsoden kadakuada no kasano ti isusungbatda iti maysa a tao nga agkuna, “nakarigrigat a maawatan ti libro ni Isaias.” Ania ti nakatulong kadatayo a mangsapul iti kaipapanan dagiti pannursuro ni Isaias? Ania dagiti binatog iti nasantuan a kasuratan a nangparegta kadatayo?

Isuro ti Doktrina

Isaias 24:21–23; 25:6–8; 26:9; 28:16

Itudonatayo ken ni Jesucristo dagiti sinurat ni Isaias.

• Kas ken ni Nephi, mabalin a maragsakan dagiti miembro ti klasem iti panangsaksi ni Isaias ken ni Jesucristo (kitaen iti 2 Nephi 11:2). Mabalinmo nga idawat kadakuada a mangibinglay iti ania man a bersikulo a nasarakanda iti panagbasada iti daytoy a lawas a nangisuro kadakuada iti maipapan iti Mangisalakan. Wenno mabalinmo nga awisen dagiti miembro ti klase a mangibinglay no ania ti masursuroda maipapan ken ni Jesucristo manipud iti Isaias 24:21–23; 25:6–8; 26:19; 28:16 wenno dadduma pay a bersikulo a nasarakam iti panagadalmo. Apay a napateg kadatayo dagitoy a kinapudno?

  

  Umay Manen tapno Agturay ken Agari, ni Mary R. Sauer

Isaias 24:1–5; 28:1–8; 29:7–10; 30:8–14

Ti ikakalilis iti kinapudno ket kaipapananna ti panangtallikud iti Apo ken dagiti propetana.

• Isingasing tibalabala itoy a lawas iti Umaykayo, Sumurot Kaniak—Para kadagiti Indibidual ken Pamilia ti panangutob iti sumagmamano kadagiti metapora nga inusar ni Isaias a pangiladawan kadagiti bunga ti panangtallikud iti Apo ken saan a panangawat kadagiti propetana. Awisem dagiti miembro ti klase a mangibinglay no ania ti nasarakanda. Wenno mabalinmo nga awisen ida a saggaysa a mangrebyu iti maysa kadagiti sumaganad a binatog: Isaias 24:1–5; 28:7–8; 29:7–10; 30:8–14. Batay iti no ania ti nabasada, mabalinda a mangileppas iti daytoy a binatog: “No tumallikudtayo iti Apo, maipadatayo iti …” Ania ti maaramidtayo tapno agtalinaed a napudno iti Apo ken maliklikan ti ikakalilis iti kinapudno? (Kitaen iti “Dagiti Nainayon a Resources” para iti sumagmamano a singasing.) Kasano a bendisionan ti Apo dagiti agtalinaed a napudno Kenkuana?

• Tapno mangirugi iti panaglilinnawag maipapan kadagiti galad ken ugali a makaiturong kadatayo iti ikakalilis iti kinapudno, mabalinmo nga awisen dagiti miembro ti klase a mangsukisok iti Isaias 24:1–5; 28:1–8; 29:7–10; 30:8–14. Kiddawem kadakuada nga agsukisok kadagiti banag a pinampanunot ken inar-aramid dagiti tao iti panawen ni Isaias. Agaramidka iti label ti ballaag [warning label] iti pisarra nga agkuna Ballaag: Mabalin nga agbanag dagiti sumaganad a galad ken ugali iti ikakalilis iti kinapudno. Mabalin nga ilista dagiti miembro ti klase iti pisarra no ania ti masarakanda kadagiti bersikulo. Mangted kadakuada iti gundaway a mangibinglay no kasano a masalaknibanda ti bagbagida wenno dagiti pamiliada manipud iti ikakalilis iti kinapudno.

Isaias 29:13–24; 30:18–26;35

Maisubli ti Apo dagiti banag a napukaw wenno nadadael.

• Adtoy ti maysa a saludsod a mabalinmo nga isurat iti pisarra a makatulong kadagiti miembro iti klase a mangutob iti Isaias 29: Kasano a mainaig dagiti sinurat ni Isaias iti Pannakaisubli ti ebanghelio iti aldawtayo? Allukoyem ida a mangpanunot maipapan iti daytoy a saludsod bayat ti naulimek a panangbasada ti Isaias 29: 13–24. No kasapulanda ti tulong, mabalinda pay nga irebyu dagiti binatog kas kadagitoy: 2 Nephi 27:6–26; Joseph Smith—Pakasaritaan 1:17–19, 63–65. Kalpasan nga agsaritada maipapan kadagiti saludsod iti pisarra, mabalinda a paglilinnawagan no apay a “nakaskasdaaw” ken ”pagsidsiddaawan nga aramid” (Isaias 29:14) dagiti nasayaat a balikas a mangiladawan iti Pannakaisubli ti ebanghelio. Ania ti masursurotayo maipapan iti Pannakaisubli manipud iti “Ti Pannakaisubli ti Pakabuklan ti Ebanghelio ni Jesucristo: Maysa a Waragawag iti Lubong para iti Maika-200 a Tawen nga Anibersario”? (ChurchofJesusChrist.org).

• Dagiti apitulo 30 ken35 ti Isaias ket naglaon iti sumagmamano a binatog a mabalin a mangparegta iti dakdakkel a pammati iti bileg ti Apo a mangbendision kadagiti agsubli Kenkuana. Tapno matulongan dagiti miembro ti klase a mangtakuat kadagitoy a binatog, mabalinmo nga awisen ida a mangadal iti Isaias 30:18–26 wenno Isaias 35. Kiddawem kadakuada a mangibinglay kadagiti balikas wenno ragup ti balikas a nasarakanda a makatulong iti maysa a tao nga agsubli iti Apo para iti pannakasubbot.

Dagiti Nainayon a Resources

Panagtalinaed a napudno iti Apo ken iti Simbaanna.

Nangted ni Presidente M. Russell Ballard iti sumaganad a balakad a makatulong kadatayo nga agtalinaed a napudno iti Apo ken iti Simbaanna:

“Kasapulantayo a mangpadas iti agtultuloy a kumbersion babaen ti panangpadur-as iti pammatitayo ken ni Jesucristo ken ti kinapudnotayo iti ebanghelio iti unos ti biagtayo—saan laeng a mamimpinsan ngem masansan [kitaen iti Alma 5:26].…

“… Masarakan dagiti balikas ti Apo kadagiti nasantuan a kasuratan ken pannursuro dagiti apostol ken propeta. Mangtedda kadatayo ti balakad ken pangiturong a, no suroten, agtignayto kas diaket iti naespirituan a biag ken makatulongto kadatayo a mangammo no kasano ti kumpet iti agpada nga ima.…

“Kas nayon iti panangpadur-as iti ugali a bukod a panagbasa iti nasantuan a kasuratan, nasken nga agbalintayo a kas kadagiti lallaki nga annak ni Mosiah ket mangted iti bagbagitayo ti ‘ad-adu a panagkararag, ken panagayuno’ [Alma 17:3]” (“Stay in the Boat and Hold On!” Liahona, Nob. 2014, 90–91).

Panangpadur-as iti Panangisurotayo

Yebkasmo ti panagtalek kadagiti kabaelan dagiti agad-adal. Mabalin nga awan panagtalek ti sumagmamano a tao iti klasem iti kabaelanda nga agsursuro iti ebanghelio. Ipanamnamam manen kadakuada a bayat ti panagkagumaanda a masursuruan, suruanto ida ti Espiritu Santo. (Kitaen iti Panangisuro iti Wagas ti Mangisalakan, 29–30.)