Ladawan ni Noe a pumampanaw iti daong, ni Sam Lawlor

Enero 31–Pebrero 6

Genesis 6–11; Moises 8

“Nasarakan ni Noe ti Parabur kadagiti Mata ni Jehova”

Daytoy a balabala ti mangilawlawag ken mangyunay-unay kadagiti pagbatayan a masarakan iti Genesis 6–11 ken Moises 8, ngem saan laeng a dagitoy a pagbatayan ti mabalinmo nga ipokus bayat ti panangisurom. Agtalekka kadagiti naespirituan a parikna a maawatmo bayat ti panagadalmo kadagiti nasantuan a kasuratan.

Isuratmo dagiti Impresionmo

Yawis ti Panagbibinninglay

Ibilang ti panangidawat kadagiti miembro ti klase a mangibinglay iti naespirituan a mensahe para iti aldawtayo manipud iti estoria ni Noe wenno ti Torre ti Babel. Allukoyem ida a mangibinglay iti maysa a nasantuan a kasuratan a mangsuporta iti daytoy a mensahe.

Isuro ti Doktrina

Genesis 6–8; Moises 8

Adda naespirituan a kinatalged iti panangsurot iti propeta ti Apo.

• Ti kinadangkes kadagiti aldaw ni Noe ket mabalin a mangipalagip kadatayo maipapan iti kinadangkes a makitatayo iti aglawlawtayo iti agdama. Tapno matulongan dagiti miembro ti klase a mairanud manipud kadagiti adalen iti estoria ni Noe, mabalinmo nga isurat iti pisarra ti Dagiti Ballaag ken Dagiti Pammatalged. Mabalin nga irebyu dagiti miembro ti klase ti Genesis 6–8 wenno Moises 8:13–30 ket mangsarak iti maysa a banag a mariknada a napateg a ballaag para iti aldawtayo ken maysa a banag nga ibilangda a makapatalged (kitaen met iti “Dagiti Nainayon a Resources”). Mabalinda nga isurat no ania ti masarakanda iti babaen ti maitutop a paulo iti pisarra. Apay a napateg ti estoria ni Noe kadatayo iti agdama?

Genesis 9:8–17

Dagiti tanda wenno simbolo ti mangtulong kadatayo a manglagip kadagiti katulagantayo iti Apo.

• Ti balabala iti daytoy a lawas iti Umaykayo, Sumurot Kaniak—para kadagiti Indibidual ken Pamilia ket mangisingasing iti panangbasa iti Genesis 9:8–17 ken panangutob no kasano a makapagserbi dagiti simbolo ken tanda kas pammalagip kadagiti katulagantayo. Tapno matulongan a maibinglay dagiti miembro ti klase dagiti kapanunotanda, mabalinmo nga itugot iti klase ti sumagmamano a banag a mangipalagip kadatayo kadagiti napapateg a banag—kas iti wedding ring, national flag, wenno name tag ti missionary—ket idilig dagitoy iti “tanda” ti bullalayaw. Ania ti isuro kadatayo ti Patarus ni Joseph Smith, Genesis 9:21–25 (iti Pangiwanwan iti Nasantuan a Kasuratan) maipapan iti daytoy a tanda? Kasano nga usaren ti Dios dagiti tanda wenno simbolo a pangtulong kadatayo a manglagip kadagiti katulagantayo?

Genesis 11:1–9

Ti laeng wagas tapno madanon ti langit ket babaen ti panangsurot ken ni Jesucristo.

• Ti pakaammuan dagiti tao ti Babel a mangbangbangon iti maysa a torre ket mangipaay iti makaay-ayo a pagdumaan iti pakaammuan ni Enoc ken dagiti taona a mangbangbangon iti Zion, nga inadal dagiti miembro ti klase itay napalabas a lawas. Padpadasen ti agpada a grupo a dumanon iti langit ngem iti aggidiat a wagas. Mabalinmo nga awisen dagiti miembro ti klase a mangilista iti pisarra ti ania man a banag a malagipda maipapan kadagiti tao ti Zion (kitaen iti Moises 7:18–19, 53, 62–63, 69) ken ania ti masursuroda iti Genesis 11:1–9 ken Helaman 6:26–28 maipapan kadagiti tao ti Babel. Ania dagiti pagdudumaan a masarakanda? Ania ti maisuro daytoy kadatayo maipapan kadagiti bukodtayo a panagkagumaan tapno makasubli iti sidong ti Dios?

  

  Panangiladawan iti Torre ti Babel, ni David Green

• Awanen ti nagkauna a siudad ti Babel, ngem adda ti kinapannakkel ken kinainlubongan nga isimbolo daytoy. Tapno matulongan a mayaplikar dagiti miembro ti klase dagiti adalen manipud iti Torre ti Babel iti biagda, irugi babaen ti panangawis kadakuada a mangrebyu iti Genesis 11:1–9. Kalpasanna mabalinmo ti mangibunong kadagiti panid ti papel ket mangawis kadagiti miembro a mangisurat kadagiti banag nga aramiden dagiti tao a mangyadayo kadakuada ti Dios; kalpasanna, iti dadduma pay a panid ti papel, mabalinda nga isurat dagiti banag nga aramiden dagiti tao a mangyas-asideg kadakuada iti Dios. Mabalin a kaay-ayo dagiti agtutubo ti panangurnos iti umuna a ragup dagiti papel iti pisarra iti sukog ti maysa a torre ken ti maikadua a ragup dagiti papel iti sukog ti maysa a templo. Ania ti impaay ti Dios a mangtulong kadatayo a “dumanon iti langit”? (Genesis 11:4; kitaen met iti Juan 3:16). Mabalinyo ti agkanta ti maysa a himno maipapan iti daytoy a topiko, kas iti “Nearer, My God, to Thee” (Hymns, no. 100).

Dagiti Nainayon a Resources

Dagiti Adalen manipud ken ni Noe.

Kinuna ni Presidente Henry B. Eyring:

“Ti pannakapaay a sumurot iti naimpadtuan a balakad ket mangpabassit iti bilegtayo nga umawat iti naparegta a balakad iti masakbayan. Ti kasayaatan nga oras a panangeddeng a mangtulong ken ni Noe a mangbangon iti daong ket ti umuna a gundaway a panagkiddawna. Tunggal kanito a nagkiddaw kalpasan dayta, tunggal pannakapaay nga ireresponde ket nangpabassit koma iti kinasensitibo iti Espiritu. Ket ngarud iti tunggal kanito a kasla namamaag ti kiddawna, agingga nga immay ti tudo. Ket idin naladawen unay daytoy.

“Tunggal kanito iti biagko idi pinilik nga itantan ti panangsurot iti naparegta a balakad wenno inkeddengko a maysaak a pakailaksidan, naammuak nga impasangok ti bagik iti pagpeggadan. Tunggal kanito a dimngegak iti balakad dagiti propeta, a nariknak a daytoy a naipatalged iti kararagko, ket kalpasanna sinurotko daytoy, naammuak a nagbalinak a nataltalged” (“Finding Safety in Counsel,” Ensign, Mayo 1997, 25).

Apay nga impatulod ti Dios ti Layus?

Masdaaw ti sumagmamano a tao maipapan iti hustisia ti Dios iti panangipatulodna iti maysa a layus tapno “pukawen ti tao” (Genesis 6:7). Inlawlawag ni Elder Neal A. Maxwell nga iti panawen ti Dakkel a Layus, “pimmalalo ti korapsion a nangpabassit iti karbengan a pumili dagiti tao nga agbalin a nalinteg tapno saan a nasayaat a mangibaon kadagiti espiritu nga agindeg iti daga gapu iti kinadangkes ditoy” (We Will Prove Them Herewith [1982], 58).

Panangpadur-as iti Panangisurotayo

Mangted iti gundaway para iti panangutob. Agkasapulan dagiti nasayaat a saludsod iti panangutob, panagsukisok, ken inspirasion. Mangted kadagiti miembro ti klase iti sumagmamano a minuto a mangutob iti maysa a saludsod sakbay ti panagkiddaw kadagiti sungbat. (Kitaen iti Panangisuro iti Wagas ti Mangisalakan, 31–34.)