“Enero 24–30. Moises 7: ‘Ninaganan ti Apo dagiti Taona iti Zion’” Umaykayo, Sumurot Kaniak—Para iti Sunday School: Daan a Tulag 2022 (2021)
“Enero 24–30. Moises 7,” Umaykayo, Sumurot Kaniak—Para iti Sunday School: 2022
Agiinnayatkayo, ni Emma Donaldson Taylor
Enero 24–30
Moises 7
“Ninaganan ti Apo dagiti Taona iti Zion”
Bayat ti panagadalmo iti Moises 7, panunotem maipapan kadagiti tao a sursuruam ken no kasano a matulongam ida a makaawat no ania ti isuro daytoy a kapitulo maipapan iti Zion ken dadduma pay a pagbatayan ti ebanghelio.
Isuratmo dagiti Impresionmo
Yawis ti Panagbibinninglay
No dadduma umdasen ti simple a saludsod ken sumagmamano a minuto nga agutob tapno mangtulong kadagiti tao a mangibinglay no ania ti masursuroda iti pagtaengan. Nalabit a mabalinmo nga ikkan dagiti miembro ti klase iti bassit nga oras a mangrebyu iti Moises 7, mangsapul iti maysa a bersikulo a mangiparikna kadakuada nga agyamyaman kadagiti kinapudno a naisubli iti libro ni Moises, ket kalpasanna ibinglayda daytoy.
Isuro ti Doktrina
Mabangontayo ti Zion iti aldawtayo.
-
Ania ti kasayaatan a wagas a pangyam-ammo iti konsepto ti Zion iti klasem? Maysa a kapanunotan ket ti panangkontak kadagiti miembro ti klase bayat ti lawas sakbay ti klase ket awisen ida a mangitugot iti maysa a banag manipud iti pagtaengan a mariknada a mangibagi kadagiti kababalin dagiti tao ti Zion, kas nailadawan iti Moises 7:18. Bayat ti panaglilinnawagyo iti daytoy a bersikulo a sangkamaysa, mabalin nga ilawlawag dagiti miembro ti klase ti kinapateg ti banag nga inyegda.
Ladawantattao nga agkikinnablaawMasapul nga ikarigatantayo ti agbalin a “sangsangkamaysa iti puso ken panunot” (Moises 7:18).
-
Makatulong kenka ti video “We Come Together and Unite as One” (ChurchofJesusChrist.org) a mangirugi iti panaglilinnawag maipapan iti no kasano a makapagbalintayo a “sangsangkamaysa iti puso ken panunot” (Moises 7:18) kadagiti ward ken pamiliatayo. Ibilang ti panangidawat kadagiti miembro ti klase a mangpanunot maipapan kadagiti panawen idi nariknada ti kaykaysa iti uneg ti pamiliada ken kabayatan ti panagserbida iti dadduma iti Simbaan wenno komunidad. Ania ti inaramid dagiti tao a nangparnuay iti panagkaykaysa kadagitoy a situasion? Ania ti masursurotayo maipapan iti Moises 7? (Kitaen nangnangruna kadagiti bersikulo 16–21, 27, 53, 62–69). Dagitoy ti sumagmamano a dadduma pay a nasantuan a kasuratan a makatulong: Taga-Filipos 2:1–4; 4 Nephi 1:15–18; Doktrina ken Katulagan 97:21; 105:5.
Agsangit ti Dios para kadagiti annakna.
-
Mabalin nga ipagarup ti sumagmamano a tao nga adayo, saan a maasitgan, ken saan a mangipatpateg ti Dios. Kasano a mausarmo ti parmata ni Enoc a pangtulong iti klasem a makaawat a mairaman ti Dios iti biagtayo ken ipatpategnatayo? Mabalinmo nga awisen dagiti miembro ti klasem a mangbasa iti Moises 7:28–44 ket mangilista iti sumagmamano a gapu ti panagsangit ti Dios. Ania ti isuro dagitoy a bersikulo maipapan iti no kasano ti rikna ti Dios maipapan kadagiti annakna? Mabalin a makatulong ti palawag iti “Dagiti Nainayon a Resources” iti daytoy a panaglilinnawag.
-
Ti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia ket mangisingasing iti panangutob iti no ania ti isuro ti Moises 7:28–31, 35 maipapan iti Dios. Dagiti nangaramid iti daytoy iti pagtaengan ket nalabit nga agtallugodda a mangibinglay kadagiti kapanunotanda iti klase. Wenno mabalinmo nga awisen dagiti miembro ti klase a mangutob kadagitoy a bersikulo ket paglilinnawaganda dagitoy iti klase.
Umayto manen ti Apo kadagiti maudi nga aldaw.
-
Kasano a matulongam a matakuatan dagiti miembro ti klase no ania ti isuro ti Moises 7:59–67 maipapan iti Maikadua a Yaay ti Mangisalakan? Nalabit a mabalinmo nga ilista ti dua wenno tallo a kinapudno wenno pasamak manipud kadagitoy a bersikulo iti pisarra ket idawat kadagiti miembro ti klase a mangsukisok kadagiti bersikulo ket inayonda iti listaan. Apay a maysa a bendision ti maaddaan iti kasuratan ti parmata ni Enoc—maysa kadagiti kaunaan a padto ti Maikadua a Yaay?
Dagiti Nainayon a Resources
Agsangit ti Dios para kadagiti annakna.
Insuro ni Elder Jeffrey R. Holland:
“Iti tengnga ti dakkel a naindaklan a parmata ti sangkataw-an a linuktan ti langit iti imatangna, ni Enoc, iti panangpaliiwna iti agpada a bendision ken karit ti mortalidad, ket inturongna ti panagmatmatna iti Ama ket nagsiddaaw a makakita Kenkuana nga agsangsangit. Kunana a masmasdaaw ken mangdaydayaw iti daytoy kabilgan a Kinatao iti uniberso: ‘Kasano a makapagsangitkayo?’ …
“Iti pananglagip kadagiti pasamak ti dumani ania man nga aldaw, sumungbat ti Dios: ‘Adtoy dagitoy kabsatmo; aramid ida dagiti imak. … Binilinko ida, a nasken nga agpipinnategda, ken nasken a piliendak, nga Amada; ngem adtoy, awan ti panangipategda, ken kagurada ti bukodda a dara. … Gapuna saan kadi nga agsangit ti langit, a makakita iti panagsagabanto dagitoy?’ [Moises 7:29–33, 37].
“Dayta maysa, makaay-ayo unay a buya ket ad-adu pay ti aramidna a mangisuro iti pudno a kinatao ti Dios ngem iti ania man a kabaelan nga iladawan ti estoria a mainaig iti relihion. … Anian a saan a malipatan a ladawan ti pannakiraman ti Dios iti biagtayo! Anian a sakit ti nakem iti maysa a naganak no saan a pilien dagiti annakna Isuna wenno ‘ti ebanghelio ti Dios’ nga impatulodna! [Taga Roma 1:1]. Anian a naglaka ti agayat iti maysa a tao nga agmaymaysa nga agay-ayat kadatayo!” (“The Grandeur of God,” Liahona, Nob. 2003, 72).
Panangpadur-as iti Panangisurotayo
Allukoyem dagiti miembro ti klase nga agadal kadagiti nasantuan a kasuratan iti pagtaengan. Maysa a wagas a mayallukoymo ti panagadal iti pagtaengan ket mangted iti gundaway kadagiti miembro ti klase a mangibinglay kadagiti takuat ken nalawag a pannakaammo ken pannakaawat manipud iti bukod ken sangapamiliaan a panagadalda. (Kitaen iti Panangisuro iti Wagas ti Mangisalakan, 29.)