“Enero 17–23. Genesis 5; Moises 6: ‘Isuroyo a Siwawayawaya Dagitoy a Banag kadagiti Annakyo’” Umaykayo, Sumurot Kaniak—Para iti Sunday School: Daan a Tulag 2022 (2021)
“Enero 17–23. Genesis 5; Moises 6,” Umaykayo, Sumurot Kaniak—Para iti Sunday School: 2022
Nasaysayaat ngem iti Paraiso, ni Kendal Ray Johnson
Enero 17–23
Genesis 5; Moises 6
“Isuroyo a Siwawayawaya Dagitoy a Banag kadagiti Annakyo”
Sakbay a basaem ti ania man a nayon a material iti panagadal, basaen ken utobem ti Genesis 5 ken Moises 6, ket isuratmo dagiti naespirituan nga impresionmo. Umaykayo, Sumurot Kaniak—Para kadagiti Indibidual ken Pamilia ken daytoy a balabala ti mabalin a mangted kadagiti kapanunotam maipapan iti no kasano a matulongan dagiti sursuruam a mangtakuat kadagiti kinapudno nga adda pakainaiganna kadakuada.
Isuratmo dagiti Impresionmo
Yawis ti Panagbibinninglay
Kasano a maallukoymo dagiti miembro ti klase a mangibinglay kadagiti nalawag a pannakaammo ken pannakaawat ken padasda bayat ti panagadalda iti Genesis 5 ken Moises 6? Mabalinmo nga isurat dagiti nagan nga Adan ken Enoc iti pisarra ket awisem dagiti miembro ti klase a mangisurat iti maysa a banag nga inaramid ken insuro ti maysa kadagitoy a propeta a napnuan iti kaipapanan kadakuada.
Isuro ti Doktrina
Awagannatayo ti Apo a mangaramid iti trabahona iti laksid dagiti pagkurangantayo.
-
Adda nasayaat a gundaway a narikna ti maysa a tao iti klasem—wenno marikriknana—nga adda pagkuranganna maipapan iti responsibilidad iti pagtaengan wenno iti simbaan. Tapno maparnuay ti pammati dagiti miembro iti klase a makatulong ti Apo kadakuada, mabalinmo nga awisen ida a mangbasa iti padas ni Enoc a masarakan iti Moises 6:26–39. Kasano a tinulongan ti Dios ni Enoc a mangaramid iti trabahona iti laksid dagiti panagamakna? Idawat kadagiti miembro ti klase a mangpanunot iti dadduma pay a pagarigan dagiti tao a nakaparmek kadagiti pagkapsutanda ket nakaipatungpal iti aramid ti Apo, manipud man kadagiti nasantuan a kasuratan wenno iti bukodda a biag. Ania dagiti pagarigan a maibinglaytayo? (kitaen met iti Exodo 4:10–16; Jeremias 1:4–10; 2 Nephi 33:1–4; Ether 12:23–29).
-
Adu kadagiti apostol ken propeta iti agdama nga aldaw ti nangipeksa kadagiti pakaseknanda a maipada iti pakaseknan ni Enoc idi inladawanda no kasano ti riknada idi umawatda kadagiti awagda. Dagiti padasda ti mabalin a mangpadakkel iti pannakaawat dagiti miembro iti klase iti Moises 6:26–39. Ibilangmo ti panagrebyu iti video “On the Lord’s Errand: The Life of Thomas S. Monson” (ChurchofJesusChrist.org; iti nagbaetan ti minuto 35:46 ken 39:40) wenno ti mensahe ti kaaw-awag a miembro ti Korum dagiti Sangapulo-ket-dua (kas pagarigan, kitaen dagiti pammaneknek da Elder Ronald A. Rasband, Elder Gary E. Stevenson, ken Elder Dale G. Renlund [Liahona, Nob. 2015, 89–94]). Paibinglay kadagiti miembro ti klase no ania ti nakaawis iti riknada maipapan kadagitoy a pagarigan. Ania ti masursurotayo manipud kadagitoy a lider maipapan iti bukodtayo a rikna ti kinakurang? Ti palawag ni Presidente Thomas S. Monson iti “Dagiti Nainayon a Resources” ti makatulong pay kas paset daytoy a panaglilinnawag.
Ti pammati, panagbabawi, panagbuniag, ken panangawat iti Espiritu Santo ti mangisagana kadatayo nga agsubli iti Dios.
-
Ti balabala iti daytoy a lawas iti Umaykayo, Sumurot Kaniak—para kadagiti Indibidual ken Pamilia ket mangisingasing iti panangbasa iti Moises 6:48–62 tapno mangsapul no ania ti nasken a maammuan ken aramiden ti tunggal maysa kadatayo tapno masubbot. Nalabit a mabalin nga ibinglay dagiti miembro ti klase iti ania man a nalawag a pannakaammo ken pannakaawat a naggapu manipud iti dayta a panagadal iti pagtaenganda. Wenno mabalinyo a paglilinnawagan ti Moises 6:48–62 a sangkamaysa iti klase. Kasano ti panangsungbattayo iti maysa a tao nga agsaludsod no apay a kasapulan ti pammati, panagbabawi, panagbuniag, ken panangawat iti sagut ti Espiritu Santo? Kasano a sungbatan ti Apo daytoy a saludsod kadagiti bersikulo 53–65, ken ania ti masursurotayo manipud iti sungbatna?
Ladawanpamilia nga agad-adal kadagiti nasantuan a kasuratanNasken a sursuruan dagiti nagannak dagiti annakda iti ebanghelio.
“Isuroyo a siwawayawaya dagitoy a banag kadagiti annakyo.”
-
Iti Moises 6:51–63 masursurotayo dagiti kinapudno ti ebanghelio nga insuro ti Apo ken ni Adan ken indawatna kenkuana a maisuro kadagiti masakbayan a kaputotan wenno henerasion. Nalabit a mabalin nga ilista dagiti miembro ti klase dagitoy a kinapudno babaen ti panangadal kadagiti babbabassit a ragup dagiti bersikulo, kas kadagiti bersikulo 51–52, 53–57, 58–60, 61–63. Apay a napateg dagitoy a kinapudno iti tumantanor a kaputotan iti agdama? Ania ti kayatmo a maammuan dagiti agtutubo maipapan iti Mangisalakan manipud kadagitoy a bersikulo? Mabalin nga agtallugod dagiti miembro ti klase a mangibinglay kadagiti kapanunotan wenno padas a mangtulong iti tunggal maysa a mangisuro kadagitoy a kinapudno a nasamsamay kadagiti ubbing ken agtutubo. Ania pay ti masursurotayo manipud kadagiti pangiturong ti Apo kadagiti nagannak iti Mosiah 4:14–15 ken Doktrina ken Katulagan 68:25–28; 93:40–50?
-
Tapno mangnayon no ania ti isuro ti Moises 6 maipapan iti responsibilidad dagiti nagannak a mangisuro kadagiti annakda, mabalinmo nga awisen dagiti miembro ti klase a mangbuya iti maysa wenno ad-adu pay a video: “Parenting: Touching the Hearts of Our Youth,” “Proclamation Series: Children,” or “Mother in Israel” (ChurchofJesusChrist.org). Ania ti masursurotayo manipud kadagitoy a video maipapan iti panangisuro iti ebanghelio kadagiti annaktayo? No mangisursurokayo kadagiti agtutubo, mabalinmo nga awisen ida a mangibinglay no kasano a makasuportada kadagiti nagannakda kadagiti panagkagumaanda a mangisuro iti ebanghelio iti pagtaengan.
Dagiti Nainayon a Resources
“No Asino ti Awagan ti Apo, maikari iti Apo.”
Insuro ni Presidente Thomas S. Monson: Mabalin a kadawyan a managbabain ti sumagmamano kadakayo wenno ibilangyo nga awan kabaelan ti bagiyo a sumungbat iti wen iti maysa nga awag. Laglagipen a saan a dakayo wenno siak laeng ti akinkukua iti daytoy nga aramid. Daytoy ti aramid ti Apo, ken no addatayo iti panangibaon ti Apo, maikaritayo iti tulong ti Apo. Laglagipem a no asino ti awagan ti Apo, maikari iti Apo” (“Duty Calls,” Ensign, May 1996, 44).
Panangpadur-as iti Panangisurotayo
Ti Espiritu Santo ti mannursuro. Napateg ti akemmo a kas maysa a mannursuro, ngem laglagipem a ti Espiritu Santo ti pudno a mannursuro. Tulongam dagiti miembro ti klase a masursuruan manipud iti Espiritu ken agbibinninglay iti tunggal maysa no ania ti nasursuroda.