“Disiembre 27–Enero 2. Moises 1; Abraham 3: ‘Daytoy ti Aramidko ken Gloriak’” Umaykayo, Sumurot Kaniak—Para iti Sunday School: Daan a Tulag 2022 (2021)
“Disiembre 27–Enero 2. Moises 1; Abraham 3,” Umaykayo, Sumurot Kaniak—Para iti Sunday School: 2022
Disiembre 27–Enero 2
Moises 1; Abraham 3
“Daytoy ti Aramidko ken Gloriak”
Bayat ti panangbasam iti Moises 1 ken Abraham 3, pagtalinaedem a nakalukat ti panunotmo ken pusom kadagiti impresion manipud iti Espiritu. Isunto ti mangparegta kenka kadagiti kapanunotan ken ideya a mangtulongto kenka nga agsagana a mangisuro.
Isuratmo dagiti Impresionmo
Yawis ti Panagbibinninglay
Mabalin a naaddaanen dagiti miembro ti klasem iti napapateg a padas iti panangbasa iti Moises 1 ken Abraham 3 iti pagtaengan. Kasano a maikkamto dagiti miembro ti klase kadagiti gundaway a mangibinglay kadagita a padas? Mabalin a simple daytoy kas iti panagdamag kadagiti saludsod kas kadagitoy: Ania ti nakaawis iti riknam bayat ti panagbasam kadagiti nasantuan a kasuratan iti daytoy a lawas? Ania ti namagsiddaaw kenka? Ania ti namagsardeng ken namagpanunot kenka? Ania ti nangtulong kenka a nangrikna nga as-asidegka iti Nailangitan nga Amam ken ni Jesucristo?
Isuro ti Doktrina
Moises 1:1–10, 37–39; Abraham 3:22–26
Kas annak ti Dios, addaantayo iti nadiosan a pagtungpalan.
-
Dagiti kinapudno a naipalgak kadagiti parmata da Moises ken Abraham ket mabalin nga addaan iti nabileg nga impluensia kadagiti pilitayo ken iti kabaelantayo a mangparmek kadagiti karit ti biag. Kasano a matulongam dagiti miembro ti klase a mangtakuat kadagitoy a kinapudno iti Moises 1 ken Abraham 3? Maysa a kapanunotan ket ti panangbingay iti klase iti kada grupo ket dutokan ti tunggal grupo iti maysa kadagiti sumaganad a binatog: Moises 1:1–10; Moises 1:37–39; Abraham 3:22–26. Mabalin a sapulen ti tunggal grupo dagiti sungbat kadagiti saludsod a kas iti “Asinoak?” “Apay nga addaak ditoy?” ken “Asino ti kayat ti Dios a pagbalinak?” Kalpasan ti umdas nga oras, mabalin dagiti grupo ti mangibinglay iti sungbatda. Kasano a makaimpluensia dagitoy a sungbat kadagiti inaldaw a tignaytayo?
LadawanNi Jesucristo iti baet dagiti bituenNi Cristo ken ti Panagparsua, ni Robert T. Barrett
Mapagkedkedantayo ti impluensia ni Satanas.
-
Ti komprontasion ni Moises ken ni Satanas, a masarakan iti Moises 1:12–23, addaan kadagiti adalen a makatulong kadagiti miembro ti klasem bayat ti pannakaipasangoda iti pannulisog wenno pannakaallilaw manipud iti kabusor. Ania dagiti masursurotayo manipud iti sungbat ni Moises? Ti video “I Am a Son of God” (ChurchofJesusChrist.org) makatulong kadagiti miembro ti klase a mapaglilinnawagan ti maysa kadagiti taktika ni Satanas—a mangal-allilaw kadatayo tapno agduadua kadagiti naespirituan a padastayo (kitaen met iti “Dagiti Nainayon a Resources”). Mabalin a napnuan kaipapanan no dagiti naibinglay a kapanunotan dagiti miembro ti klase ket ti panangparegta a panagtitinnulong iti tunggal maysa a mangilasin ken mangsupring kadagiti panagkagumaan ni Satanas.
-
Maysa nga adalen manipud iti padas ni Moises ket ti panangsulisog ni Satanas kadatayo kadagiti panangballikug iti kinapudno ken bileg ti Dios. Tapno mailadawan iti panunot dagiti miembro ti klase daytoy, mabalinmo ti mangitugot iti klase ti sumagmamano a banag a peke a bersion dagiti dadduma a banag, kas iti artipisial a mula wenno maysa a munieka a maladaga. Kasano a maibagatayo a peke dagitoy? Ania ti sumagmamano a panagballikug nga us-usaren ni Satanas ita a pangsulisog kadatayo? Kasano a mailasin ken pinagkedkedan dagitoy? (Tapno maammuan no kasano nga inaramid ni Moises daytoy, kitaen iti Moises 1:13–18.) Kasano a tulongannatayo ti Apo kadagiti panagkagumaantayo? (Kitaen iti Moises 1:24–26).
Daytoy a biag ti gundawaytayo a mangipakita nga aramidentayonto no ania ti ibilin ti Dios.
-
Kasano a matulongam dagiti miembro ti klase a makitada ti biagda kas maysa a gundaway a mangsubok iti kinapudnoda kadagiti bilin ti Dios? Mabalinmo nga irugi babaen ti panangidawat kadakuada a mangisarita kadagiti padasda idi nasken nga ipakitada ti kabaelanda iti maysa a paglaingan—kas pagarigan, iti pagadalan, iti pagtrabahuan, wenno iti maysa a bunggoy dagiti atleta. Mabalinda nga isarita maipapan no ania ti naidawat a kasapulan nga aramidenda a mangsubok iti bagbagida. Kasano a maipada dagitoy a padas iti nailadawan iti Abraham 3:24–26? Kasano ti paggidiatanda? Kasano ti panangiramantayo iti Nailangitan nga Ama ken ti Mangisalakan kadagiti panagkagumaantayo a “mangsubok” iti bagbagitayo? (Abraham 3:25). Kasano a ti panangammotayo nga addatayo ditoy a mangsubok iti bagbagitayo a natulnogtayo ket mangapekto iti wagas a panagrespondetayo kadagiti karit ti biag?
-
Ania pay ti masursurotayo manipud iti Abraham 3:22–28 maipapan iti biag sakbay daytoy a biag, wenno ti “immuna a kasasaad[tayo]”? (bersikulo 26). Apay a napateg kadatayo dagitoy a kinapudno?
Dagiti Nainayon a Resources
Saanka nga agduadua no ania ti naipalgak kenka.
Insuro ni Elder Jeffrey R. Holland daytoy maipapan iti padas ni Moises iti Moises 1: “Daytoy ti mensahe ni Moises kadakayo ita: Agan-annadkayo. Dimo ipapan a ti naindaklan a paltiing, maysa a datdatlag, makaparegta a kanito, ti panaglukat ti naparegta a dana, isu ti gibus daytoy. … Apaman nga adda pammaregta, agannad iti sulisog nga agsanud manipud iti dayta nasayaat a banag. Umisu daytoy no inkararagam maipapan iti daytoy ken nagtalekka iti daytoy ket nagbiagka para iti daytoy, umisu daytoy ita. Saanka a sumuko no umadu ti pammilit. Awan duadua a saanka nga agtulnog iti dayta a tao a determinado a mangdadael iti panagragsakmo. Sangnguem dagiti panagduaduam. Parmekem dagiti butengmo. ‘Dikay ngarud pukawen ti pananginanamayo.’ [Hebreo 10:35]. Agtalinaedkayo iti dalan ket kitaenyo ti kinapintas ti biag a naipalgak kadakayo” (Cast Not Away Therefore Your Confidence,”,” Ensign, Mar. 2000, 7–9).
Panangpadur-as iti Panangisurotayo
Tulongam dagiti agad-adal a mangtakuat kadagiti kinapudno kadagiti nasantuan a kasuratan. Sakbay ti panangawis kadagiti miembro ti klase a mangbasa iti maysa a binatog iti nasantuan a kasuratan, mabalinmo nga ikkan ida iti maysa a banag a naipangruna a sapulen wenno panunoten. Kas pagarigan, mabalinda a sapulen ti maysa a banag a sursuruenda maipapan iti Mangisalakan wenno maysa a banag a kayatda nga ibinglay iti maysa a miembro ti pamilia. (Kitaen iti Panangisuro iti Wagas ti Mangisalakan,21.)