Da Adan ken Eva, ni Douglas M. Fryer

Enero 10–16

Genesis 3–4; Moises 4–5

Ti Pannakatnag da Adan ken Eva

Bayat ti panagsaganam a mangisuro maipapan iti Genesis 3–4 ken Moises 4–5, panunotem maipapan iti no ania dagiti saludsod wenno aktibidad a mabalin a makatulong kadagiti miembro ti klase a makaawat a nasaysayaat iti Pannakatnag da Adan ken Eva.

Isuratmo dagiti Impresionmo

Yawis ti Panagbibinninglay

Mabalin nga irebyu biit dagiti miembro ti klase ti Genesis 3–4 wenno Moises 4–5, mangpili iti maysa a bersikulo a napateg kadakuada, ket ibinglayda daytoy iti maysa a tao a nakatugaw iti asideg. Kalpasanna mabalin nga ibinglay ti sumagmamano a tao ti maysa a nalawag a pannakaammo ken pannakaawat iti klase.

Isuro ti Doktrina

Moises 4:1–13; 5:1–12

Kasapulantayo ti karbengan nga agpili ken pagsusupadian tapno dumur-as.

• Gapu iti karbengan nga agpili—ti kalintegan nga inted ti Dios nga agaramid kadagiti pili—ket napateg a paset ti biag a mortal, no dadduma tagtagilag-anentayo daytoy. Tapno paunegen ti panagyaman dagiti miembro ti klase iti daytoy a sagut, mabalinda a basaen ken paglilinnawagan ti Moises 4:1–4. Ania ti isuro kadatayo dagitoy a pakaammuan maipapan iti pateg ti karbengan nga agpili? Kasano a madadael ti plano ti Dios no awanantayo iti karbengan nga agpili? Makaited ti adaw iti “Dagiti Nainayon a Resources” iti sumagmamano a nalawag a pannakaammo ken pannakaawat.

• Nalabit nga inadal dagiti miembro ti klase ti mensahe ni Presidente Dallin H. Oaks nga “Opposition in All Things” (Liahona, Mayo 2016, 114–17) kas paset ti bukod ken sangapamiliaan a panagadalda iti daytoy a lawas. Kabayatan daytoy a lawas, mabalinmo nga ibilang ti panagawis iti sumagmamano a tao nga umay a nakasagana a mangibinglay iti maysa a banag manipud iti mensahena a nangtulong kenkuana a makaawat iti Pannakatnag da Adan ken Eva (kitaen nangnangruna kadagiti benneg I ken II). Apay a palugodannatayo ti Nailangitan nga Ama a mangpadas iti “pagsusupadian iti amin a banag”? (kitaen iti 2 Nephi 2:11–16). Mabalinmo nga awisem dagiti miembro ti klase a mangbasa iti Doktrina ken Katulagan 29:39–40 ket paglilinnawagan no apay a kasapulan dagiti sulisog ni Satanas iti plano ti Dios. Kasano a tulongannatayo ti Nailangitan nga Ama ken ni Jesucristo no maipasangotayo iti sulisog?

  

  Ipapanaw iti Eden, ni Annie Henrie Nader

Moises 4:4–12; 5:13–33

Kalikaguman ni Satanas “a mangallilaw ken mangbulsek” kadatayo.

• Moises 4:4–12; 5:13–33 ket makatulong kadagiti miembro ti klasem a mangilasin iti sumagmamano a wagas a pangsulisogan ni Satanas kadatayo nga agaramid iti dakes. Mabalin nga idawatmo iti kagudua ti klase a mangbasa iti Moises 4:4–12 ket ti sabali pay a kagudua a mangbasa iti Moises 5:13, 18–33. Bayat ti panagbasada, mabalinda nga ilista dagiti wagas a nangpadasan ni Satanas nga inallilaw da Adan ken Eva ken dagiti annakda. Kasano ti panaggandatna kadagitoy isu met la a banag iti agdama? Kasano a matulongannatayo ti Nailangitan nga Ama a mangliklik kadagiti panangallilaw ni Satanas?

Genesis 3:1–7; Moises 4:22–31; 5:4–15

Mangidiaya ti Pannubbot ni Jesucristo iti namnama ken pannakasubbot manipud iti Pannakatnag.

• Ti ad-adda a pannakaawattayo kadagiti epekto ti Pannakatnag, ad-adda met a bigbigentayo ti pateg ti Pannubbot ni Jesucristo. Mabalin a sukisoken dagiti miembro ti klase dagiti epekto ti pannakatnag iti Genesis 3:1–7; Moises 4:22–31 ket ilista no ania ti masarakanda iti pisarra. Kalpasanna mabalinda a sukisoken ti Moises 5:4–12, 14–15 tapno masursuruan maipapan iti plano ti Dios a mangsubbot kadatayo manipud kadagita nga epekto (kitaen iti 2 Nephi 2:19–25; Alma 12:22–34) ket ilista no ania ti masarakanda iti pisarra. Mabalinda pay nga ibinglay no ania ti makaawis iti riknada maipapan kadagiti pammaneknek da Adan ken Eva ken ni Jesucristo a masarakan kadagiti bersikulo 10–12. Kasano ti riknatayo maipapan iti plano ti Dios kalpasan ti panangbasa kadagitoy a nasantuan a kasuratan?

• Ti estoria da Adan ken Eva iti namnama ken pannakasubbot ket makaallukoy kadagiti miembro ti klase no narigat ti biag. Ibilang ti panangawis kadakuada a mangsapul kadagiti balikas ken ragup dagiti balikas iti Moises 5:7–12 a mangyebkas iti namnama a narikna da Adan ken Eva idi maammuanda a masubbot ida ti Mangisalakan. Kaano a nariknatayo ti namnama a maipada iti no ania ti narikna da Adan ken Eva? Ibilang ti panangawis kadagiti miembro ti klase a mangibinglay kadagiti paggugustoda a himno a mangyebyebkas iti namnama nga umay babaen ti Pannubbot ti Mangisalakan. Mabalinyo nga aggigiddan a kantaen ti sumagmamano kadagitoy.

Dagiti Nainayon a Resources

Mapilitayo ti agbabawi para iti bagbagitayo.

Insuro ni Elder Dale G. Renlund:

“Panggep a tun-oyen ti Amatayo iti Langit iti panagbalin a nagannak ket ti saan a panangpaaramid kadagiti annakna ti umno; daytoy ket pagpilienna ida nga agaramid iti umno ken iti kamaudiananna agbalin a kas Kenkuana. No simple a kayatnatayo nga agbalin a natulnog, usarenna dagiti madagdagus a gunggona ken pannusa a mangimpluensia kadagiti ugalitayo.

“Ngem saan nga interesado ti Dios kadagiti annakna iti panagbalin laeng a nasanay ken natulnog a ‘maaywanan’ a saanto a manggalgal kadagiti tsinelasna iti salas ti celestial. Saan, kayat ti Dios a dumakkel a naespirituan dagiti annakna ken kumaduada Kenkuana iti aramiden ti pamilia” (“Choose You This Day,” Liahona, Nob. 2018, 104).

Panangpadur-as iti Panangisurotayo

Paaduem ti pannakiraman dagiti miembro ti klase. Mabalin a maaramid ti adu nga aktibidad kas maysa a klase, iti babassit a grupo, wenno iti kada paris. Usarem ti nadumaduma a pamay-an a mangpalugod kadagiti tao a makiraman a mabalin a no saan a maaddaan iti gundaway. (Kitaen iti Panangisuro iti Wagas ti Mangisalakan, 33–34.)