Da Abraham ken Sara

Ladawan da Abraham ken Sara ni Dilleen Marsh

Pebrero 7–13

Genesis 12–17; Abraham 1–2

“Tapno Agbalin a Nain-indaklan a Pasurot ti Kinalinteg”

Ania ti insuro ti Espiritu kenka iti daytoy a lawas bayat ti panagadalmo iti Genesis 12–17 ken Abraham 1–2? Siguraduem ti mangted kadagiti miembro ti klase iti gundaway a mangibinglay no ania ti insuro kadakuada ti Espiritu Santo.

Isuratmo dagiti Impresionmo

icon iti panagbibinninglay

Yawis ti Panagbibinninglay

Tapno maikkam dagiti miembro ti klase iti gundaway a mangibinglay iti maysa a banag a nasursuroda manipud iti Genesis 12–17 ken Abraham 1–2, mabalin a saggaysada a mangpili iti maysa a tao a nadakamat kadagitoy a kapitulo ket mangileppas iti maysa a binatog kas iti sumaganad: “Insuronak ni Abraham ” wenno “Insuronak ni Sara .”

icon iti panangisuro

Isuro ti Doktrina

Genesis 15:1–6; 17:15–22; Abraham 1:1–19

Bendisionannatayto ti Dios gapu iti pammati ken nalinteg a tarigagaytayo.

• Makatulong dagiti padas da Abraham ken Sara a nairekord iti Genesis 15; 17; Abraham 1 kadagiti miembro a mangpatalinaed iti pammatida a maipatungpalto dagiti nalinteg a tarigagayda iti panawen ti Apo. Kasano a marugiam ti panaglilinnawag maipapan iti daytoy a pagbatayan? Maysa a kapanunotan ket mangawis iti klase a mangsukisok iti Genesis 15:1–6 ken Abraham 1:1–19 ken mangilawlawag kadagiti tarigagay ken narigat a kasasaad ni Abraham. Kasano nga impakita da Abraham ken Sara ti pammatida iti panawen ti kinarigat? (kitaen iti Hebreo 11:8–13). Kasano naipatungpal iti kamaudiananna dagiti nalinteg a tarigagayda? (kitaen iti Genesis 17:15–22; 21:1–3; Doktrina ken Katulagan 132:29; Abraham 1:31). Kasano a maipakitatayo ti pammatitayo no saan pay a naipatungpal dagiti nalinteg a tarigagaytayo kas iti kayattayo a maaramid kadagitoy? Nalabit a mabalin nga ibinglay dagiti miembro ti klase no kasano a tinulongan ida ti Mangisalakan kadagiti kasta a kasasaad.

• Mabalin nga umawat ti sumagmamano a miembro ti klasem iti bassit a suporta manipud kadagiti pamiliada bayat ti panagkagumaanda nga agbiag iti ebanghelio—ken mabalin a maipasangoda iti pagsusupadian. Ania dagiti kinapudno a masursurotayo manipud iti pagwadan ni Abraham iti Abraham 1:1–19 a makatulong kadagiti agkagkagumaan nga agbiag a nalinteg kadagiti kasta a kasasaad?

• Mabalin nga idawatmo kadagiti miembro ti klase a mangbasa iti Patarus ni Joseph Smith, Genesis 14:36–40 (iti Pangiwanwan iti Nasantuan a Kasuratan) ken ibinglay no ania ti masursuroda maipapan iti pammati ken tarigagay ni Abraham. Mabalinda pay nga ibinglay no kasano a nabendisionanda idi inaramatda ti pammatida nga agbayad iti apagkapullo.

Abraham 2:6–11

Bendisionannatayo amin ti katulagan ni Abraham.

• Tapno matulongan dagiti miembro ti klase a makaawat no ania ti katulagan ni Abraham, mabalinmo nga ibinglay dagiti palawag ni Presidente Russell M. Nelson iti “Dagiti Nainayon a Resources” (kitaen met iti Gospel Topics, “Abrahamic Covenant,” topics.ChurchofJesusChrist.org). Mabalin a nasursuron dagiti miembro ti klase maipapan iti katulagan ni Abraham manipud iti Abraham 2:6–11, kas naisingasing iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia. Nalabit a makaibinglay dagiti miembro ti klase no ania ti nasursuroda, wenno mabalin nga aggigiddan nga adalen ti klase dagitoy a bersikulo. Ania dagiti kari ken pagrebbengan nga awatentayo babaen ti katulagan ni Abraham? Makatulong ti video a “Special Witness—President Nelson” a mangsungbat iti daytoy a saludsod (ChurchofJesusChrist.org/media-library/video/2011-04-18-special-witness-president-nelson). Ania ti nasken nga aramidentayo tapno umawat kadagiti bendision daytoy a katulagan? Kas bukel ni Abraham, kasano a maparaburantayo ti “amin a kaamaan iti daga”? (Abraham 2:11).

Genesis 14:18–19; Patarus ni Joseph Smith, Genesis 14:25–40

“Tao ni Melchizedek a napnuan iti pammati.”

• Gapu iti Pannakaisubli ti ebanghelio, kaadduan a miembro ti Simbaan ti pamiliar iti Melchizedek Priesthood, ngem adda dagiti saan a makaam-ammo maipapan iti tao a ni Melchizedek. Tapno matulongan dagiti miembro ti klase a makasursuro iti ad-adu pay maipapan kenkuana, nalabit a mabalinmo nga awisen ida a mangipapan a naidawat kadakuada a mangyam-ammo kenkuana iti maysa a tao a di nakaam-ammo kenkuana ket ilista iti pisarra dagiti banag nga isaoda koma. Mabalinda nga ibatay dagitoy a banag iti no ania ti nabasada iti Patarus ni Joseph Smith, Genesis 14:26–27, 33–38 (iti Pangiwanwan iti Nasantuan a Kasuratan); Alma 13:13–19; ken Doktrina ken Katulagan 107:1–4. Ania ti masursurotayo maipapan iti Melchizedek Priesthood manipud kadagitoy a bersikulo?

  Ni Melchizedek a mangbembendision ken ni Abram

  Bendisionan ni Melchizedek ni Abram, ni Walter Rane

dagiti nainayon a resources icon

Dagiti Nainayon a Resources

Dagiti bendision ti katulagan ni Abraham.

Insuro ni Presidente Russell M. Nelson:

“Dakkel ti kinapateg ti katulagan nga inaramid ti Dios ken ni Abraham ken iti kamaudiananna naipatalged kada Isaac ken Jacob. … Nagparang ti Apo kadagitoy ud-udina nga aldaw tapno pabaruen ti katulagan ni Abraham. … Iti daytoy a pannakapabaro, inawattayo, kas iti inaramidda idi un-unana, ti nasantuan a priesthood ken ti agnanayon nga ebanghelio. Addaantayo iti karbengan nga umawat iti pakabuklan ti ebanghelio, ken maikari iti kaindaklanan a bendision ti Dios—dayta ti agnanayon a biag” (“Covenants,” Liahona, Nob. 2011, 87–88).

“Maitalek kadagiti nasantuan a templo dagiti kangrunaan a bendision ti katulagan ti Abraham. Dagitoy a bendision ti mangpalugod kadatayo nga umay iti Umuna a Panagungar ken agtawid iti trono, pagarian, bileg, masakupan, ken, pagturayan, iti ‘pannakaitan-ok ken pannakaigloriatayo iti amin a banag’ [Doktrina ken Katulagan 132:19]” (“Special Witnesses of Christ,” Ensign, Abr. 2001, 7).

Panangpadur-as iti Panangisurotayo

Masansan a mangiburay iti pammaneknek. Ti simple, naimpusuan a pammaneknekmo iti naespirituan a kinapudno ket nabileg a makaimpluensia kadagiti sursuruam. Kas pagarigan, mabalinmo ti mangibinglay iti simple a pammaneknek maipapan no kasano a binendisionan dagiti katulagan ti biagmo.