li xSara ut lix k’uula’al laj Isaak

Li xSara ut laj Isaak, xb’aan laj Scott Snow

14–20 febrero

Genesis 18–23

“Ma ch’a’aj k’a’ruhaq chiru li Qaawa’?”

Naq nakakawresi aawib’ choq’ re li k’utuk, k’e reetal naq maare li komon ak xe’xk’ul xna’leb’ xjuneseb’ rib’ naq xe’ril Genesis 18–23. Chan ru taatenq’aheb’ chixyeeb’al resil li na’leb’ a’an? Maare taawaj naq li na’leb’ a’an tixb’eresi li k’a’ru tex’aatinaq wi’ sa’ li tzoleb’aal.

Tz’iib’a li nakak’oxla

reetalil li wotzok

Xkanab’ankileb’ chi wotzok

Wan naq li ch’a’ajkilal na’ok jo’ jun li yalb’a-ix choq’ qe. Sa’ Genesis 18–23 naxye resil jar paay li yalb’a-ix sa’ xyu’am laj Abraham ut laj Lot. Maare li komon te’xwotz jun raqal li xe’xtaw sa’ loq’laj hu li naxye resil jun li yalb’a-ix sa’ xyu’am laj Abraham. Toja’ naq naru te’xye k’a’ru naxk’ut chiqu li raqal a’an.

reetalil li k’utuk

Xk’utb’al li tzolʼlebʼ

Genesis 18:9–14; 21:1–7

Junes li Qaawa’ naxye jo’q’e tixb’aanu li k’a’ru naxyeechi’i.

• Li esilal sa’ li raqal a’in naru tixtenq’aheb’ li ani ink’a’ neke’xnaw ma toj te’xk’ul ta li k’a’ru yeechi’inb’il xb’aan li Qaawa’. Re xtikib’ankil li aatinak sa’ komonil, naru taach’utub’eb’ li komon chi ka’kab’il re naq te’ril li k’a’ru xyeechi’iman re laj Abraham sa’ Genesis 17:4, 15–22; 18:9–14 ut chan ru toj xk’eeman li yeechi’ink a’an sa’ Genesis 21:1–7. K’a’ru nawulak chiruheb’ li komon sa’eb’ li raqal a’an? B’ar wan jun li na’leb’ sa’ xyu’am laj Abraham ut li xSara li naru taqaye re li ani ink’a’ chik naxyo’oni lix yeechi’ihom li Dios? B’ar wan junaq chik li raqal sa’ loq’laj hu malaj junaq chik li na’leb’ sa’ qayu’am li naru taqaye re? (chi’ilmanq Romanos 8:28; Hebreos 11; Mormon 9:19–21; Tzol’leb’ ut Sumwank 88:64). Ma wan junaq li esilal sa’ xyu’ameb’ li komon li naxk’utb’esi naq li Dios naxb’aanu li k’a’ru naxyeechi’i reheb’? Chan ru taqakawresi li qapaab’aal wi ta ink’a’ naqak’ul lix yeechi’ihom li Dios sa’ li yu’am a’in? (chi’ilmanq Hebreos 11:8–13).

Genesis 19:15–26

Jo’ xtzolom li Jesukristo, too’eeleliq raj chiru li maa’usilal ut ink’a’ chik too’iloq chiqix.

• K’a’ru na’leb’ naru te’xtaw li komon sa’ resilal li relik laj Lot ut lix junkab’al sa’ Sodoma ut Gomora? Maare a’an li na’leb’ ch’olob’anb’il xb’aan li Elder Holland sa’ “Xkomon chik li k’anjeleb’aal.” Maare taawotz li na’leb’ a’an rik’ineb’ li komon chirix naq taachoy xch’olob’ankil li esil sa’ Genesis 19:15–26. Chan ru “noko-ilok chiqix” sa’ qayu’am (raqal 26) naq yooko raj b’an chirilb’al li Kolonel chi uub’ej? Maare li komon te’raj xyeeb’al k’a’ru ak xe’xk’ul sa’ xyu’am li naxk’utb’esi naq ink’a’ raj too’iloq chiqix. K’a’ru naxye sa’ Lukas 9:62 chirix li na’leb’ a’in?

  Xjalam-uuch laj Lot ut lix junkab’al naq yookeb’ chi elk Sodoma ut Gomora

  Li elk sa’ Sodom ut Gomora, xb’aan laj Julius Schnorr von Carolsfeld

Genesis 22:1–14

Li mayejankil laj Isaak xb’aan laj Abraham nareetali li Dios ut li Ralal.

additional resources icon

Xkomon chik li k’anjeleb’aal

“Li paab’aal junelik naxjayali rib’ chi uub’ej.”

Li Elder Jeffrey R. Holland kixye:

“Maare kiwan xjosq’il li rixaqil laj Lot naq ki’ilok chirix, xb’aan li k’a’ru naraj li Qaawa’ naq tixkanab’ chirix. … Jo’kan naq moko wan ta lix maak yal xb’aan naq ki’ilok chirix; wan b’an lix maak xb’aan naq toj naraj li wan chirix. Malaj ut narataw li k’a’ru ak numenaq ut ink’a’ naxpaab’ li k’a’ru toj chalel. …

“… Nin’elajink cheru re naq ink’a’ teek’oxla junes li ak numenaq ut re naq ink’a’ teerataw li kutankil junxil, us ta jwal chaab’il chaq li kutan a’an. Taataw laa na’leb’ sa’ li k’a’ru ak xnume’, a’b’an ink’a’ tatkanaaq aran. Noko’ilok chiqix re naq taqaxok li chaab’il saqen li toj lochlo sa’ xxamlel li qayu’am chaq, ink’a’ b’an re naq taqaxok li cha. Ut naq xqanaw li k’a’ru aajel ru choq’ qe, ut ak xqak’am chaq li k’a’ru chaab’il sa’ qayu’am, aran ut noko’ilok chi uub’ej ut naqak’e reetal naq li paab’aal junelik naxjayali rib’ chi uub’ej. …

“… Maak’a’ xpaab’aal [li rixaqil laj Lot]. Ink’a’ naxpaab’ naq li Qaawa’ naru tixq’ax ru li chaab’ilal li ak xk’ul chaq. Anchal naxk’oxla naq li k’a’ru toj chalel maajo’q’e tixk’e reeqaj li chaab’ilal li yoo chixkanab’ankil chaq chirix. …

“… Xk’oxlankil junes li qayu’am junxil, jo’ ajwi’ li qamaak junxil, moko us ta choq’ qe! Moko a’an ta lix evangelio li Jesukristo” (“Lo mejor aún está por venir,” Liahona, enero 2010).

Xkawresinkil qib’ jo’ aj k’utunel

Yeechi’iheb’ li osob’tesink. Naq nakab’oq’eb’ li komon chixyu’aminkil li k’a’ru neke’xtzol, ch’olob’ xyaalal naq li Dios taarosob’tesiheb’ wi neke’xb’aanu. (Chi’ilmanq ajwi’ Li k’utuk jo’ li Kolonel, 35.)