Xjalam-uuch laj Noe naq x’el sa’ li jukub’ kab’l, xb’aan laj Sam Lawlor

31 enero–6 febrero

Genesis 6–11; Moises 8

“Laj Noe kixtaw usilal sa’ rilob’aal li Qaawa’ ”

Li tusb’il na’leb’ a’in naxk’ut li na’leb’ sa’ Genesis 6–11 ut sa’ Moises 8, a’b’an naru taak’ut ajwi’ jalaneb’ chik li na’leb’. Paab’ li k’a’ru naxye aawe li Santil Musiq’ej naq yookat chixtzolb’al li loq’laj hu.

Tz’iib’a li nakak’oxla

Xkanab’ankileb’ chi wotzok

Maare taawaj xpatz’b’al reheb’ li komon naq te’xch’olob’ jun li na’leb’ sa’ li resil laj Noe malaj sa’ li resil li najt xteramil kab’l re Babel. Patz’ reheb’ naq te’xwotz jun li raqal sa’ loq’laj hu li naxk’ut li na’leb’ a’an.

Xk’utb’al li tzolʼlebʼ

Genesis 6–8; Moises 8

Xtaaqenkil lix profeet li Qaawa’ naxkol qix.

• Wan li maakob’k sa’ qakutankil anajwan jo’ chanchan li maakob’k sa’ xkutankil laj Noe. Li komon naru te’xxok xna’leb’ sa’ li resil laj Noe wi taatz’iiba sa’ pizarron li aatin li xuwajel ut li chaab’il. Sa’ Genesis 6–8 malaj Moises 8:13–30, li komon naru te’xsik’ resil li k’a’ru xuwajel malaj li k’a’ru chaab’il (chi’ilmanq ajwi’ “Xkomon chik li k’anjeleb’aal”). Naru te’xtz’iib’a sa’ pizarron li k’a’ru neke’xtaw. K’a’ut naq toj wan rajb’al li resilal laj Noe sa’ qakutankil anajwan?

Genesis 9:8–17

Wan reetalil li qasumwank rik’in li Qaawa’ re naq ink’a’ taasachq sa’ qach’ool.

• Li tusb’il na’leb’ choq’ re li xamaan a’in sa’ Kim, Taaqehin, choq’ reheb’ li komon ut li junkab’al naxye naq naru taawil Genesis 9:8–17 re naq taak’oxla chan ru naq reetalinkil li qasumwank nokoxtenq’a re naq li sumwank ink’a’ taasachq sa’ qach’ool. Naru taatenq’aheb’ li komon chi aatinak chirix li na’leb’ a’in wi taak’am chaq sa’ li tzoleb’aal wiib’ oxib’ li eetalil—maare jun li matq’ab’ re sumlaak, lix bandeer laa tenamit, malaj lix gafeet jun li misioneer—ut teeye chan ru naq li kaqla nak’anjelak ajwi’ jo’ jun li eetalil. K’a’ru naxye sa’ Genesis 9:21–25 chi jaltesinb’il ru xb’aan laj Jose Smith (sa’ xraqik li roxichal li loq’laj hu) chirix li kaqla? Chan ru naq li Dios naroksiheb’ li eetalil re naq li sumwank ink’a’ taasachq sa’ qach’ool?

Genesis 11:1–9

Naru toowulaq sa’ choxa junes xb’aan xtaaqenkil li Jesukristo.

• Naru taqak’e reetal wiib’ paay chi na’leb’ sa’ li esilal chirixeb’ laj Babel ut sa’ li esilal chirix lix tenamit laj Enok. Li wiib’eb’ chi tenamit a’an yookeb’ chixsik’b’al li choxa, a’b’an jalan xna’leb’eb’ laj Babel. Maare taapatz’ reheb’ li komon naq te’xtz’iib’a sa’ li pizarron li k’a’ru ak neke’xnaw chirixeb’ laj Sion (chi’ilmanq Moises 7:18–19, 53, 62–63, 69) ut li na’leb’ li wan sa’ Genesis 11:1–9 ut sa’ Helaman 6:26–28 chirixeb’ laj Babel. Chan ru xna’leb’eb’ li wiib’ chi tenamit? Chan raj ru taqayal qaq’e laa’o re naq toosutq’iiq rik’in li Dios?

  

  Xjalaam-uuch li najt xteramil kab’l re Babel, xb’aan laj David Green

• Maak’a’ chik li najter tenamit Babel, a’b’an toj wan li maakob’k li eetalinb’il xb’aan. Patz’ reheb’ li komon naq te’ril Genesis 11:1–9 re naq te’ok chixtz’ilb’al rix chan ru te’xyu’ami li na’leb’ k’utb’il sa’ li esilal chirix li najt xteramil kab’l. Toja’ naq naru taajek’i ch’ina hu reheb’ re naq te’xtz’iib’a k’a’aq re ru li naxnajtob’resi qayanq rik’in li Dios; aran ut, sa’ jun chik li ch’ina hu naru te’xtz’iib’a k’a’aq re ru li nokoxjilosi rik’in li Dios. Maare taawaj xtuqub’ankileb’ li xb’een hu chiru li pizarron re naq te’k’utunq jo’ najt xteramil kab’l, ut eb’ li xkab’ hu naru te’tuqlaaq aran jo’ santil ochoch. K’a’ru naxk’e qe li Dios re naq naru “toowulaq sa’ choxa”? (Genesis 11:4; chi’ilmanq ajwi’ Jwan 3:16). Naru teeb’icha jun li b’ich chirix li na’leb’ a’in, maare “Nach’ aawik’in, Qaawa’ ” (Eb’ li B’ich, 5).

Xkomon chik li k’anjeleb’aal

Li na’leb’ k’utb’il xb’aan laj Noe.

Li Awa’b’ej Henry B. Eyring kixye:

“Li palto’k sa’ xpaab’ankil li profeetil aatin naxkub’si li qawankil chixpaab’ankil li na’leb’ li toj taak’utmanq moqon. Jwal us raj xtenq’ankil laj Noe chixkab’lankil li jukub’ naq kixtz’aama xb’een wa. Naq laj Noe naxk’iilasuti lix tz’aam, li k’iila palto’k chixsumenkil naxkub’si xwankil li aamej chixk’ulb’al li Santil Musiq’ej. Jo’kan naq timil timil, anchal maak’a’ xna’leb’ laj Noe sa’ li k’a’ru naxtz’aama, toj reetal naq kichal li hab’. Aran, ak x’oso’ li hoonal.

“Sa’ lin yu’am laa’in, ak xwil naq wi ta tinb’ayq sa’ xpaab’ankil li profeetil aatin, malaj ut wi ta tinye naq ink’a’ na’ajman choq’ we, aran ak xin’ok sa’ li k’a’ru xuwajel. A’b’an naq nawab’iheb’ li profeet, ut naweek’a sa’ tijok naq tz’aqal yaal lix na’leb’eb’, ut naq ninb’aanu jo’ naxye, ak xwil naq aran yookin chixjayalinkil li kole’k” (“Busquemos seguridad en la consejo,” Liahona, mayo 1997, 25).

K’a’ut naq li Dios kixtaqla li b’uut’iha’?

Wankeb’ li ink’a’ neke’xnaw ma tiik ta naq li Dios tixtaqla jun li b’uut’iha’ re naq “tixsach ruheb’ li winq” (Genesis 6:7). Li Elder Neal A. Maxwell kixch’olob’ naq sa’ xkutankil li b’uut’iha’, “ak xwakliik xwankil li maak toj reetal naq naxsach ru xwankil lix taql ch’oolej, jo’kan naq moko tiik ta xtaqlankil xkomoneb’ chik li aamej arin sa’ li ruchich’och’ ” (We Will Prove Them Herewith [1982], 58).

Xkawresinkil qib’ jo’ aj k’utunel

Xkanab’ankileb’ li komon chixtz’ilb’al rix li patz’om. Li chaab’il patz’om naxk’e laj sumenel chixtz’ilb’al rix, chi tzolok, ut chirab’inkil li Santil Musiq’ej. Naru tatb’ayq wiib’ oxib’ minuut re naq li komon te’xk’oxla jun li patz’om chi us naq maji’ neke’xsume. (Chi’ilmanq Li k’utuk jo’ li Kolonel, 31–34.)