li rahok sa’ komonil

Chera eerib’, xb’aan li xEmma Donaldson Taylor

24–30 enero

Moises 7

“Ut li Qaawa’ Sion kixye re lix tenamit”

Naq yookat chirilb’al Moises 7, k’oxla li ani te’tzoloq aawik’in ut chan ru taatenq’aheb’ chixtawb’al ru li Sion ut xkomon chik li na’leb’ sa’ li raqal a’an.

Tz’iib’a li nakak’oxla

reetalil li wotzok

Xkanab’ankileb’ chi wotzok

Wan naq yal na’ajman xyeeb’al jun ch’ina patz’om malaj xnumsinkil jun ch’ina hoonal sa’ k’oxlank re naq li komon te’ok chixyeeb’al li na’leb’ li neke’xtzol sa’ rochoch. Maare taak’e xhoonaleb’ li komon re naq te’xsik’ jun raqal sa’ Moises 7, li naxtenq’aheb’ chirilb’al xloq’al lix hu laj Moises, re ajwi’ naq te’xk’ut li raqal a’an chiruheb’ li komon.

reetalil li k’utuk

Xk’utb’al li tzolʼlebʼ

Moises 7:16–21, 27, 53, 62–69

Naru taqawaklesi Sion sa’ qakutankil anajwan.

• Chan ru tat-ok chixch’olob’ankil li Sion chiruheb’ li komon? Maare chiru li xamaan taapatz’ reheb’ li komon naq te’xtaw k’a’aq re ru li nareetali li na’leb’ sa’ Moses 7:18 re naq te’xk’am li k’a’aq re ru a’an toj sa’ li tzoleb’aal. Naq yookex chi aatinak sa’ komonil chirix li Moises 7:18, naru te’xch’olob’ li eetalil xe’xk’am chaq.

  xk’ulb’al aawas aawiitz’in

  Aajel ru xyalb’al qaq’e re naq “junajaq li qach’ool ut junajaq li qak’a’uxl” (Moises 7:18).

• Maare taawaj xpatz’b’al reheb’ li komon jo’q’e xe’reek’a li junajil sa’ lix junkab’al, sa’ li Iglees, malaj rik’ineb’ li ras riitz’in. K’a’ru xb’aanuman re naq taawanq li junajil a’an? K’a’ru naxye sa’ Moises 7 chirix li Sion ut li junajil? (wan xk’ihal li na’leb’ sa’ li raqal 16–21, 27, 53, 62–69). Naru ajwi’ xtawb’al li na’leb’ sa’ Filipenses 2:1–4; 4 Nefi 1:15–18; Tzol’leb’ ut Sumwank 97:21; 105:5.

Moises 7:28–44

Li Dios nayaab’ak chirixeb’ li ralal xk’ajol.

• Wankeb’ li neke’xk’oxla naq najt chaq nakana li Dios, naq ink’a’ naru raatinankil, ut naq ink’a’ nokoxk’oxla. Chan ru taach’olob’ li raatin laj Enok re naq li komon te’xk’e reetal naq li Dios na’oken sa’ qayu’am ut naq nokoxk’oxla? Maare taapatz’ reheb’ li komon naq te’ril Moises 7:28–44 re naq te’xtz’iib’a wiib’ oxib’ li na’leb’ li nayaab’ak wi’ li Dios. Sa’eb’ li raqal a’an, k’a’ru nareek’a li Dios chirixeb’ li ralal xk’ajol? Li aatin sa’ “Xkomon chik li k’anjeleb’aal” naru texxtenq’a chi aatinak chirix li na’leb’ a’an.

• Li tusb’il na’leb’ choq’ re li xamaan a’in sa’ Kim, Taaqehin—choq’ reheb’ li komon ut li junkab’al naxye naq naru taak’oxla k’a’ru naxk’utman chirix li Dios sa’ Moises 7:28–31, 35. Maare wankeb’ li komon li ak xe’xb’aanu chi jo’kan sa’ rochoch ut te’raj xyeeb’al resil sa’ li tzoleb’aal k’a’ru xe’xk’oxla. Malaj ut naru teek’oxla ut tex’aatinaq chirix li raqal a’an sa’ komonil.

Moises 7:59–67

Taasutq’iiq li Qaawa’ sa’ roso’jikeb’ li kutan.

• Chan ru taatenq’aheb’ li komon chixk’eeb’al reetal k’a’ru naxye sa’ Moises 7:59–67 chirix li xkab’ xk’ulunik li Qaawa’? Naru taatz’iib’a sa’ pizarron wiib’ oxib’ li na’leb’ li natawman sa’ li raqal a’an re naq li komon te’xsik’ sa’ li hu, ut re naq te’xye xkomoneb’ chik li na’leb’ sa’ li raqal a’an. Jwal najter chaq xtz’iib’aman li raatin laj Enok chirix li xkab’ xk’ulunik li Qaawa’. K’a’ut naq nim xwankil li aatin a’an sa’ qayanq anajwan?

reetalil xkomon chik li k’anjeleb’aal

Xkomon chik li k’anjeleb’aal

Li Dios nayaab’ak chirixeb’ li ralal xk’ajol.

Li Elder Jeffrey R. Holland kixye:

“Naq xteeman ru li choxa chixk’utb’esinkil chixjunileb’ li aamej chiru laj Enok, laj Enok kiril li usilal jo’ ajwi’ li ch’a’ajkilal sa’ li ruchich’och’ a’in, toja’ naq ki’ok chirilb’al li Yuwa’b’ej, ut kisach lix ch’ool xb’aan naq yoo chaq chi yaab’ak li Dios. Chi sachso xch’ool laj Enok, kixye re li nimawjal Awa’b’ej li q’axal nim xwankil: “Chan ru naq naru nakatyaab’ak?” …

“Ut naq li Dios xkana chirilb’al li k’a’ru yoo chaq chi k’ulmank yalaq ta b’ar sa’ li ruchich’och’, kixye: “K’e reetaleb’ laa was aawiitz’in; a’aneb’ xyiib’ahom tz’aqal li wuq’. … Ut rehebʼ [a’an] … kinkʼe [jun li] taqlahom, naq teʼxra ribʼ chiribʼilebʼ ribʼ, ut naq teʼxsikʼ wu laaʼin, lix Yuwaʼebʼ; aʼbʼan kʼe reetal, wankebʼ chi maakʼaʼ xrahomebʼ, ut xikʼ nekeʼril tzʼaqal li rech kikʼelebʼ. … kʼaʼ ut naq inkʼaʼ taayaabʼaq li choxa, rikʼin naq ebʼ aʼin teʼxkʼul rahilal?” [Moises 7:29–33, 37].

“Sa’ li jun ajwi’ chi esilal a’an wan jun li na’leb’ li jwal nim wi’chik chiru chixjunil lix tz’iib’ahomeb’ li ani tzolb’il sa’ li paab’aal. … K’a’jo’ nareetali naq li Dios na’oken sa’ qayu’am! Jwal ra nareek’a jun li yuwa’b’ej naq li ralal xk’ajol ink’a’ neke’raj “lix evangelio li Dios”! [Romanos 1:1]. Jwal sa xraab’al li ani narahok junes qe laa’o!” (“La grandiosidad de Dios,” Liahona, noviembre 2003, 72).

Xkawresinkil qib’ jo’ aj k’utunel

Tenq’aheb’ li komon re naq te’raj xtzolb’al li loq’laj hu sa’ rochoch. Naru taatenq’aheb’ chi tzolok sa’ ochoch wi nakak’e xhoonaleb’ sa’ li tzoleb’aal re naq te’xye resil li na’leb’ li neke’xtaw xjuneseb’ rib’ malaj sa’ junkab’al. (Chi’ilmanq Li k’utuk jo’ li Kolonel, 29.)