Jwal us wi’chik, xb’aan laj Kendal Ray Johnson

17–23 enero

Genesis 5; Moises 6

“Teek’ut li k’a’aq re ru a’in chi moko ramb’il ta chiruheb’ lee ralal eek’ajol”

Naq maji’ nakawil xkomon chik li hu, tz’il rix Genesis 5 ut Moises 6, ut tz’iib’a li k’a’ru naxye aawe li Santil Musiq’ej. Kim, Taaqehin—choq’ reheb’ li komon ut li junkab’al ut li k’a’ru tz’iib’anb’il arin naru tatxtenq’a chixtenq’ankileb’ li komon re naq te’xtaw li na’leb’ li aajel ru choq’ re xyu’am.

Tz’iib’a li nakak’oxla

Xkanab’ankileb’ chi wotzok

Chan ru taatenq’aheb’ li komon chixyeeb’al resil k’a’ru xe’xtaw sa’ Genesis 5 ut sa’ Moises 6? Naru taatz’iib’a laj Adan ut laj Enok sa’ li pizarron re naq eb’ li komon te’xtz’iib’a aran jun xna’leb’ malaj xb’aanuhom li profeet a’an.

Xk’utb’al li tzolʼlebʼ

Moises 6:26–39

Li Qaawa’ nokoxb’oq chixb’aanunkil lix k’anjel us ta wan li qamajelal.

• Tz’aqal yaal naq maare wan ani sa’ laa tzoleb’aal li nareek’a xmajelal anajwan majal junxil sa’ lix k’anjel choq’ re lix junkab’al malaj choq’ re li Iglees. Naru taapatz’ reheb’ li komon naq te’ril resil laj Enok sa’ Moises 6:26–39 re naq te’xnaw naq li Qaawa’ naru tixtenq’aheb’. Chan ru naq li Dios kixtenq’a laj Enok chixb’aanunkil xk’anjel us ta naxuwak? Patz’ reheb’ li komon naq te’xk’oxla ani chik xyal xq’e sa’ xmajelal re naq tixb’aanu xk’anjel li Qaawa’, maare li wan resil sa’ loq’laj hu malaj li ani neke’xnaw ru. Ani xqak’oxla? (chi’ilmanq ajwi’ Exodo 4:10–16; Jeremias 1:4–10; 2 Nefi 33:1–4; Eter 12:23–29).

• Naab’aleb’ li profeet sa’ qakutankil laa’o neke’xye ajwi’ naq neke’xuwak jo’ chanchan laj Enok naq neke’xk’ul xk’anjel jo’ profeet. Maare lix xiweb’ li profeet a’an naru tixtenq’aheb’ li komon chixtawb’al ru Moises 6:26–39. Maare taawaj xk’utb’al li video “Presidente Monson: En la obra del Señor” (ChurchofJesusChrist.org; sa’ xyanqeb’ li ajl 35:46 ut 39:40) malaj li raatin jun reheb’ li ak’ apostol (maare li Elder Ronald A. Rasband, li Elder Gary E. Stevenson, malaj li Elder Dale G. Renlund [Jolomil ch’utub’aj-ib’ re octubre 2015]). Kanab’eb’ li komon chixyeeb’al k’a’ru neke’xk’oxla chirix li raatineb’ li profeet a’an. K’a’ru neke’xk’utb’esi li profeet a’an chirix li qamajelal laa’o? Li raatin li Awa’b’ej Monson sa’ “Xkomon chik li k’anjeleb’aal” naru ajwi’ chixtenq’ankileb’ li komon chi aatinak chirix li na’leb’ a’in.

Moises 6:48–65

Li paab’aal, li jalb’a-k’a’uxlej, li kub’iha’, ut xk’ulb’al li Santil Musiq’ej nokohe’xkawresi chi sutq’iik rik’in li Dios.

• Li tusb’il na’leb’ choq’ re li xamaan a’in sa’ Kim, Taaqehin—choq’ reheb’ li komon ut li junkab’al naxye naq naru taqil sa’ Moses 6:48–62 li k’a’ru tento taqanaw ut taqab’aanu re naq tookole’q. Maare li komon te’raj xyeeb’al k’a’ru xe’ril sa’ li raqal a’an naq xe’xtzol sa’ rochoch. Malaj ut naru tex’aatinaq chirix Moises 6:48–62 sa’ tzoleb’aal. K’a’ru taqaye re li ani naxpatz’ k’a’ut naq aajel ru li paab’aal, li jalb’a-k’a’uxlej, li kub’iha’, ut xk’ulb’al li Santil Musiq’ej? K’a’ru naxye li Qaawa’ sa’eb’ li raqal 53–65?

  

  Ebʼ li naʼbʼej yuwaʼbʼej tento teʼxkʼut li evangelio chiruhebʼ lix kokʼal.

Moises 6:51–63

“Teek’ut li k’a’aq re ru a’in chi moko ramb’il ta chiru lee ralal eek’ajol.”

• Sa’ Moises 6:51–63 naxye k’a’ru kixk’ut li Qaawa’ chiru laj Adan re naq laj Adan tixk’ut ajwi’ chiru li ralal xk’ajol. Li komon naru te’ril li raqal 51–52, 53–57, 58–60, 61–63 re naq te’xnaw k’a’ru kixk’ut li Qaawa’ chiru laj Adan. K’a’ru xtenq’ankil te’xk’ul li saaj kristiaan anajwan naq nak’utman ajwi’ li na’leb’ a’an chiruheb’? B’ar wan jun li na’leb’ chirix li Kolonel sa’eb’ li raqal a’in li taawaj naq eb’ li saaj kristiaan te’xnaw? Maare li komon te’raj xch’olob’ankil chirib’ileb’ rib’ chan ru te’xk’ut li na’leb’ a’an chiruheb’ li saaj ut li kok’al. K’a’ chik ru nayeeman reheb’ li na’b’ej yuwa’b’ej sa’ Mosiah 4:14–15 ut Tzol’leb’ ut Sumwank 68:25–28; 93:40–50?

• Re xch’olob’ankil wi’chik li na’leb’ sa’ Moises 6 chirix lix k’iresinkileb’ li kok’al, naru taapatz’ reheb’ li komon naq te’ril jun reheb’ li video a’in: “Ser padres: Tocar el corazón de nuestros jóvenes,” malaj “Madre en Israel” (ChurchofJesusChrist.org). K’a’ru neke’xk’ut li video a’in chirix xk’utb’al li evangelio chiruheb’ li qalal qak’ajol? Wi wankeb’ li saaj sa’ laa tzoleb’aal, naru taapatz’ reheb’ chan ru te’xtenq’aheb’ lix na’ xyuwa’ chixk’utb’al li evangelio sa’ xjunkab’al.

  Madre en Israel

Xkomon chik li k’anjeleb’aal

“Li Qaawa’ naxtenq’a li ani naxb’oq.”

Li Awa’b’ej Thomas S. Monson kixye: “Maare nakatxutaanak malaj anchal maak’a’ laa seeb’al choq’ re jun li k’anjel li tatb’oqe’q chixb’aanunkil. A’b’an k’e reetal naq ink’a’ naqak’ul li k’anjel a’in sa’ qajunes. Li Qaawa’, a’an tz’aqal aj eechal re li k’anjel, ut naq taqlanb’ilo xb’aan li Qaawa’, qak’ulub’ naq li Qaawa’ tooxtenq’a. K’e reetal naq li Qaawa’ naxtenq’a li ani naxb’oq” (“Duty Calls,” Ensign, mayo 1996, 44).

Xkawresinkil qib’ jo’ aj k’utunel

Li Santil Musiq’ej, a’an tz’aqal li k’utunel. Aajel ru laa k’anjel laa’at jo’ aj k’utunel, a’b’an k’e reetal naq li Santil Musiq’ej, a’an tz’aqal li k’utunel. Tenq’aheb’ li komon chi tzolok rik’in li Musiq’ej, ut chixwotzb’al chirib’ileb’ rib’ li k’a’ru neke’xtzol.