Laj Adan ut li xEva, xb’aan laj Douglas M. Fryer

10–16 enero

Genesis 3–4; Moises 4–5

Lix tʼanik laj Adan ut li xEva

Naq nakakawresi aawib’ chixk’utb’al Genesis 3–4 and Moises 4–5, tz’il rix k’a’ru teepatz’ malaj k’a’ru teeb’aanu sa’ komonil re naq li komon te’xtaw ru lix t’anik laj Adan ut li xEva.

Tz’iib’a li nakak’oxla

Xkanab’ankileb’ chi wotzok

Li komon naru te’ril Genesis 3–4 malaj Moises 4–5 xjuneseb’ rib’, re naq te’xtaw jun li raqal li naru te’xwotz rik’in li ani chunchu chixk’atq. Toja’ naq sa’ komonil teerab’i xna’leb’ wiib’ oxib’ li komon.

Xk’utb’al li tzolʼlebʼ

Moises 4:1–13; 5:1–12

Na’ajman jalan jalanq li b’e re naq taak’anjelaq lix taql ch’oolej.

• Wan naq ink’a’ naqak’e xloq’al lix taql li qach’ool xb’aan naq yal k’aynaqo chixk’anjelankil. Li komon naru te’reek’a xloq’al lix taql ch’oolej wi neke’ril Moises 4:1–4 ut wi neke’aatinak chirix sa’ komonil. K’a’ru naxye li raqal a’an chirix lix taql ch’oolej? K’a’ut naq taasachmanq raj xk’anjel li Dios wi ta maak’a’ lix taql ch’oolej? Li aatin sa’ “Xkomon chik li k’anjeleb’aal” naru tixk’e wiib’ oxib’ xsumenkil li patz’om a’an.

• Maare li komon ak xe’ril li raatin li Awa’b’ej Dallin H. Oaks “Taawanq chixka’pak’alil chixjunil li k’a’aq re ru” (Jolomil ch’utub’aj-ib’ re abril 2016) naq xe’tzolok chiru li xamaan a’in. Chiru li xamaan, maare taapatz’ re wiib’ oxib’ li komon naq te’xsik’ junaq na’leb’ sa’ raatin li Awa’b’ej Oaks re naq te’xwotz sa’ li Dominkil Tzoleb’aal, ut naq te’xch’olob’ k’a’ru naxye chirix lix t’anik laj Adan ut li xEva (wan xk’ihal li na’leb’ a’an sa’ li raqal I ut II). K’a’ut naq li qaChoxahil Yuwa’ naxk’e “xka’pak’alil chixjunil li k’a’aq re ru”? (chi’ilmanq 2 Nefi 2:11–16). Maare taapatz’ reheb’ li komon naq te’ril Tzol’leb’ ut Sumwank 29:39–40 ut naq te’xch’olob’ chirib’ileb’ rib’ k’a’ut naq na’ajman li aaleek sa’ xk’anjel li Dios. Chan ru nokohe’xtenq’a li qaChoxahil Yuwa’ ut li Jesukristo sa’ li aaleek?

  

  Li elk sa’ Eden, xb’aan li xAnnie Henrie Nader

Moises 4:4–12; 5:13–33

Laj Satanas naraj “qab’alaq’inkil ut xmutz’ob’resinkil qu.”

• Sa’ Moises 4:4–12; 5:13–33 li komon naru te’ril wiib’ oxib’ paay li aaleek li naxb’aanu laj Satanas. Maare taapatz’ naq jun xyijacheb’ li komon taaril Moises 4:4–12 ut naq li jun xyijach chik taaril Moises 5:13, 18–33. Naq yookeb’ chirilb’al, naru te’xtz’iib’a li jar paay chi aaleek li kixb’aanu laj Satanas re laj Adan ut li xEva. Chan ru naxb’aanu ajwi’ li aaleek a’an sa’ qakutankil laa’o? Chan ru nokoxtenq’a li qaChoxahil Yuwa’ chixkuyb’al li aaleek?

Genesis 3:1–7; Moises 4:22–31; 5:4–15

Lix tojb’al rix li maak xb’aan li Jesukristo naxyeechi’i li kolb’a-ib’ sa’ li T’ane’k.

• Wi naqanaw k’a’ru nak’ulman xmaak li T’ane’k, naqanaw ajwi’ k’a’ut naq nim xwankil lix tojb’al rix li maak xb’aan li Jesukristo. Li komon naru te’ril k’a’ru nak’ulman xmaak li T’ane’k sa’ Genesis 3:1–7; Moises 4:22–31 ut naru te’xtz’iib’a sa’ pizarron k’a’ru naxye aran. Toja’ naq naru te’ril Moises 5:4–12, 14–15 re naq te’xnaw chan ru nokoxkol li Dios (chi’ilmanq ajwi’ 2 Nefi 2:19–25; Alma 12:22–34) ut naru te’xtz’iib’a sa’ pizarron k’a’ru naxye aran. Naru ajwi’ te’xye k’a’ru nawulak chiruheb’ sa’ raatin laj Adan ut li xEva sa’eb’ li raqal 10–12. K’a’ru naqeek’a chirix lix k’anjel li Dios naq naqil li na’leb’ sa’eb’ li raqal a’in?

• Xk’oxlankil lix kolb’al laj Adan ut li xEva naru tixtenq’aheb’ li komon naq wankeb’ sa’ ch’a’ajkilal. Maare taawaj xpatz’b’al naq te’xsik’ junaq aatin sa’ Moises 5:7–12 li naxye k’a’ru ke’reek’a laj Adan ut li xEva naq ke’ok chixnawb’al naq taaruuq te’kole’q xb’aan li Kolonel. Ma xqeek’a ajwi’ laa’o chi jo’kan jun sutaq? Maare taawaj xpatz’b’al reheb’ li komon naq te’xye b’ar wankeb’ li b’ich li neke’xk’e xyo’onihom. Naru teeb’icha wiib’ oxib’ li b’ich a’an.

Xkomon chik li k’anjeleb’aal

Laa’o naqasik’ ru li qab’e.

Li Elder Dale G. Renlund kixye:

“Li rajom li qaChoxahil Yuwa’ maawa’ naq eb’ li ralal xk’ajol yal te’xb’aanu li us; naraj b’an naq te’raj xb’aanunkil li us, ut naq sa’ roso’jik te’wulaq jo’ a’an. Wi ta yal xraj naq too’ab’inq chiru, junpaat raj tooxq’ajkamu malaj tooxch’iila, re xb’eresinkil li qab’aanuhom.

“A’b’an li Dios ink’a’ yal naraj naq eb’ li ralal xk’ajol te’wanq jo’ li tzolb’il mascote li ink’a’ naxtiw lix xaab’ sa’ lix loq’laj hilob’aal.” Ink’a’. Li Dios naraj naq li ralal xk’ajol te’k’iiq sa’ musiq’ej re naq taaruuq tixnumsi lix k’anjel reheb’ ” (“Sik’omaq ru anajwan,” Jolomil ch’utub’aj-ib’ re octubre 2018).

Xkawresinkil qib’ jo’ aj k’utunel

Xtenq’ankileb’ li komon chi tz’aqonk. Naab’al li tzolok naru taab’aanumanq sa’ komonil, sa’ jar ch’uut, malaj sa’ ka’kab’il. B’aanu jar paay li aatinak re naq te’tz’aqonq li ani ink’a’ raj xe’ru chi okenk. (Chi’ilmanq Li k’utuk jo’ li Kolonel, 33–34.)