xjalam-uucheb’ li chahim

27 diciembre–2 enero

Moises 1; Abraham 3

“A’in lin k’anjel ut lin loq’al”

Naq yookat chirilb’al Moises 1 ut Abraham 3, k’e reetal li k’a’ru naxye aawe li Santil Musiq’ej. Li Musiq’ej tixk’e laa na’leb’ re naq taanaw chan ru xkawresinkil aawib’ jo’ aj k’utunel.

Tz’iib’a li nakak’oxla

reetalil li wotzok

Xkanab’ankileb’ chi wotzok

Maare li ani te’tzoloq aawik’in ak xe’xk’ul li na’leb’ jwal chaab’il naq xe’ril Moises 1 ut Abraham 3 sa’ rochocheb’. Chan ru taatenq’aheb’ chixyeeb’al resil li na’leb’ a’an? Maare yal taaye junaq aapatz’om chanchan a’in: K’a’ru x’ok sa’ laa k’a’uxl naq xatzol li loq’laj hu chiru li xamaan a’in? Ma xat-ok chixtawb’al ru junaq li ak’ na’leb’? Ma xwan junaq na’leb’ li xawaj xtz’ilb’al rix chi us? K’a’ru xatxtenq’a chi nach’ok rik’in laa Choxahil Yuwa’ ut li Jesukristo?

reetalil li k’utuk

Xk’utb’al li tzolʼlebʼ

Moises 1:1–10, 37–39; Abraham 3:22–26

Jo’ ralal xk’ajol li Dios, wan xjayal li qayu’am.

• Li na’leb’ sa’ raatin laj Moises ut laj Abraham naru tooxtenq’a chi us naq yooko chixsik’b’al ru li qab’e ut naq yooko chixyalb’al qaq’e sa’ jun li ch’a’ajkilal. Chan ru taatenq’aheb’ li ani te’tzoloq aawik’in re naq te’xk’e reetal li na’leb’ sa’ Moises 1 ut Abraham 3? Maare taak’eheb’ sa’atqeb’ li kok’ ch’uut, ut li junq ch’uut naru taaril jun reheb’ li raqal a’in: Moises 1:1–10; Moises 1:37–39; Abraham 3:22–26. Li junq ch’uut naru tixsik’ xsumenkil junaq li patz’om, maare “anihin laa’in?” “K’a’ut naq wankin arin?” malaj “K’a’ru naraj li Dios choq’ we?” Naq ak xe’xchoy xtz’ilb’al rix li patz’om, naru te’xye xsumenkil. Naq naqanaw xsumenkil li patz’om a’an, k’a’ru nokoxk’e chixb’aanunkil sa’ qayu’am?

  Li Jesukristo sa’ xyanqeb’ li chahim.

  Li Kristo ut lix yo’ob’tesihom, xb’aan laj Robert T. Barrett

Moises 1:12–13

Kawaqo chiru laj Satanas.

• Li esil chirix laj Moises ut laj Satanas sa’ Moises 1:12–23 naru tixtenq’aheb’ li komon naq yookeb’ chixk’ulb’al li aaleek malaj li b’alaq’ink xb’aan laj tza. K’a’ru nak’utman chiqu sa’ li raatin laj Moises? Li video “Soy un hijo de Dios” (ChurchofJesusChrist.org) naru tixtenq’aheb’ li komon chi aatinak chirix jun lix b’alaq’ laj Satanas—a’an li b’alaq’ li naxye naq maare moko yaal ta li chaab’il na’leb’ li ak xqak’ul sa’ qayu’am (chi’ilmanq ajwi’ “Xkomon chik li k’anjeleb’aal”). Maare us raj naq eb’ li komon te’xwotz xna’leb’ chirib’ileb’ rib’ re naq te’xk’e reetal b’ar wan xb’alaq’ laj Satanas sa’ xyu’am, ut re naq te’xkawresi rib’ choq’ re.

• Li esil chirix laj Moises ut laj Satanas naxk’ut naq laj Satanas naxk’utb’esi xb’alaq’ jo’ chanchan xna’leb’ li Dios. Naru taak’ut junaq li b’atz’uul li moko yaal ta, maare jun li muñeek, jo’ reetalil li b’alaq’ a’an. K’a’ru naqanaw wi’ naq moko yaal ta li b’atz’uul a’an? B’ar wankeb’ li b’alaq’ sa’ qayu’am li naxk’utb’esi laj Satanas jo’ chanchan xna’leb’ li Dios? Chan ru taqak’e reetal li b’alaq’ re naq taqatz’eq? (Naru taawil chan ru naq laj Moises kixtz’eq li b’alaq’ sa’ Moises 1:13–18.) Chan ru nokoxtenq’a li Qaawa’ chixtz’eqb’al li b’alaq? (chi’ilmanq Moises 1:24–26).

Abraham 3:22–28

Sa’ li yu’am a’in yooko chixk’utb’al chiru li Dios ma taqapaab’ lix taqlahom.

• Chan ru taatenq’aheb’ li komon chixk’eeb’al reetal naq sa’ li yu’am a’in yookeb’ chixk’utb’al ma te’ab’inq chiru li Dios? Maare taapatz’ reheb’ k’a’ru xe’xk’ul naq xe’wan sa’ junaq li yalb’a-ix—maare sa’ eskweel, sa’ trab’aaj, malaj sa’ li deporte. Naru te’xye resil chan ru xe’el chi us sa’ li yalb’a-ix a’an. Ma xe’xk’ul jo’ chanchan li naxye sa’ Abraham 3:24–26? Malaj ut ma jalan ajwi’ li xe’xk’ul? Chan ru taqakanab’ li qaChoxahil Yuwa’ ut li Jesukristo chiqochb’eeninkil sa’ li yalb’a-ix? (Abraham 3:25). Naq naqanaw naq wanko sa’ yalb’a-ix, chan ru naqasume li ch’a’ajkilal sa’ qayu’am?

• K’a’ chik ru naxk’ut chiqu li aatin sa’ Abraham 3:22–28 chirix li qayu’am naq maji’ nokoyo’la, malaj ut li “xb’een xwanjikeb’ ” li ralal li Dios? (raqal 26). K’a’ut naq nim xwankil li na’leb’ a’in choq’ qe?

reetalil xkomon chik li k’anjeleb’aal

Xkomon chik li k’anjeleb’aal

Maakanab’ xpaab’ankil li na’leb’ li ak xk’utb’esi li Dios chawu.

Chan li Elder Jeffrey R. Holland chirix li esilal sa’ Moises 1: “Li chaq’rab’ink tixye laj Moises aawe anajwan, a’an: maakanab’ xk’aak’alenkil aawib’. Maak’oxla naq junaq xnimal ru na’leb’, malaj junaq li nimla saqen, malaj junaq li chaab’il b’e tixchoy li yalb’a-ix. … Chirix naq ak xkutanob’resiik laa k’a’uxl, k’e reetal li aaleek li naraj naq taakanab’ li k’a’ru chaab’il. Wi ta ak tz’aqal yaal kiwan naq xattijok chirix, naq xat-ok chixpaab’ankil, ut naq xaq’axtesi laa yu’am choq’ re, toj tz’aqal yaal ajwi’ anajwan. Mat-elk naq yoo chi tamk li aal sa’ laa b’een. … Ut maapaab’ ajwi’ laj tza li naraj xsachb’esinkil lix sahil aach’ool. Sume laa k’a’uxl. Q’ax ru laa xiw. “Kawaq taxaq aach’ool sa’ laa paab’aal.” Chatkanaaq sa’ li b’e, ut chawil chi atz’umak chawu li k’a’ru ch’ina-us sa’ laa yu’am” (No perdáis, pues, vuestra confianza,”Liahona, junio 2000, 38).

Xkawresinkil qib’ jo’ aj k’utunel

Tenq’aheb’ li komon chixtawb’aleb’ li na’leb’ sa’ loq’laj hu. Naq ok aawe chixpatz’al reheb’ li komon naq te’ril jun li aatin sa’ loq’laj hu, maare xb’een wa taaye reheb’ k’a’ru te’xsik’ sa’ li aatin a’an. Maare te’xsik’ jun li na’leb’ chirix li Kolonel malaj jun li na’leb’ li te’raj xwotzb’al rik’in lix junkab’al. (Chi’ilmanq Li k’utuk jo’ li Kolonel, 21.)